Luke 2 - Buki Kimaasabaina

Iyosepa be Meri sinonoina Bedeliyema goi tetelina

¹ E tuta amo goi sinaena adi katuyáiva siguinuwe idi takisi manuna.

² Amo atuyaivinayana Kureniyasi ina lovina ana tuta Siriya goi sivatowo.

³ E Sisa ina lovina iyato, tuwo tomota adi katuyaivayana manuna tomota liliudi sitaoya sina tubudiyao idi kasa goi.

⁴ E Iyosepa nakae. Asa Nasareta moe Galili sinaena goi tauyana Meri taiyao sitaoya, situko sina tubuna Devida ina kasa yoina Bedeliyema goi, Yudiya sinaena. Sina Devida ina kasa unana tauyana be Devida adi tayamo.

⁵ Tauyana Meri taiyao sina Bedeliyema goi bei yoidi siginidi. Meriyana Iyosepa ana nava ma keeuwamina.

Yeisu ina bíbina tetelina

⁶ E nava amoko goi sikaaiyaka go, Meri ina tuta venátuna isowóduwo.

⁷ Tuwo ivenátuna, natuna botomoya koroto ivenatuni. Ikavava, areko ikabi, gomanayana iutube. Iutube ikavava, ogaoga adi vabodaupa vada goi geya tayaamo baseko ikaaiyaka, tauna gomanayana ikabi yoguyogu adi valakiki vadayana sinaena goi iyato.

⁸ Ago adi tomatakavatayao yoyowo dadava amo goi sikaaiyaka, idi sipiyao sabamgo goi simatakaavatedi.

⁹ Simatakaavatedi go, tomoeeyalina itapasigikobudi. Tuwo tomatakavatayadi simatoita gagaina toina.

¹⁰ Tuwo aneroseyana idigo kana, ‘Taabu koomatōita! aba uyáwana gagaina atalavaite yaimi goi. Valayana moe tomota liliumi manumi. Tauna taabu koomatōita!

¹¹ Valayana moe sabamgo ame Devida ina kasa goi ami Toyava bogina ibíbina. Tauyana moe , ida Tomoya.

¹² Imi kaba kinana moe ame: Bei kona memeyayana kobabane areko goi bogina siutube be yoguyogu adi valakiki goi iimasisi. Moe gomanayana.’

¹³ Tuwo matabuwodi anerose badabadaaidi yábana goi sisowóduwo aneroseyana taiyao Yaubada siyaapaliye kadi,

¹⁴ ‘Maeko ee, Yaubada diligaema toina aba taimámina! Poyapoya goi tuboina Yaubada ina nuwonúwana ana toguinuwayao yaidi.’

¹⁵ Ago tutayana aneroseyadi sikalavedi sina yábana goi, kidi sipi adi tomatakavatayadi taudiva sibobóbwara kadi, ‘Tawou, tāna Bedeliyema goi dogoiyana Yauwe bogina ilatuuwokoida tagīte.’

¹⁶ Tuwo moitamo geya mgoninamo sitaoya, sina Bedeliyema goi gomanayana silusale. Silusale, Meri, Iyosepa be gomanayana yoguyogu adi valakiki goi iimasisi sibabanedi.

¹⁷ E sigite, anerose ina bóbwara moe gomanayana manuna sitalavaite.

¹⁸ Ava tomotava sipi adi tomatakavatayao idi bóbwara sinovedi, madabokidi sikainaopa.

¹⁹ E kina go Meriyana vala amo inove, inuwokavate be manuna nuwona goi inuwoleleu.

²⁰ Sipi adi tomatakavatayaoyadi sitalavaita ikavava, sitaoya sikaluvila sina idi kasa go, kaga liliuna siinovedi be siigitedi nakae anerose boi iidigedi manudi Yaubada ina togaga ana káeyana sikamoitamoe be nakae Tauyana siyapaliye.

²¹ Tutayana gomanayana maliyalina ainima aitonina bogina ibabane, . Namlieta sinana bei ikéuwama, moe youyana boi anerose igimivayou.

Simioni ina talavaita Yeisu manuna tetelina

²² Tutayana Iyosepa be Meri adi kimavada ana maliyalina bogina sikavava nakae boi Mosese ivini idige, natudi sikabi sime Yerusalema goi bei Yauwe yaina sikasale.

²³ Moe nakae Yauwe ina Katukedayana boi sigini kadi, ‘Botomoya koroto liliudi kukimasabēdi yau Yauwe umagu.’ Tateta 13:2

²⁴ Nakae sima Yerusalema goi idi vininabeso sikasale nakae Yauwe ina Katukeda idige. Vininabesoyana moe bunabuna aiyuwo o kesikesipo aiyuwo.

²⁵ Go konōve! Koroto tayamo Yerusalema goi ikaaiyaka yoina Simioni. Tauyana ikaaiyaka.

²⁶ Baloma Kimasabainayana bogina ivatuluko bei nava geya ikamaseta ana kadókana mainao , igite baige.

²⁷ E Balomayana Simioni nukotona isanayato be Vada Kimaasabaina go, vevina adi dadava goi isiu. Tuwo isiu go, tutayana Iyosepa be Meri natudi Yeisu sime moe dadavayana goi bei manuna siguinuwe nakae Yauwe ina Katukeda idige,

²⁸ Simioni ivalobodedi, gomanayana ikabi ikavale go, Yaubada iyapaliye kana,

^29-32 ‘Guna Tomoya, Toinigu matagu goi im yava ana kenao moe gómana ame bogina agite. Tauyana tomota liliudi matadi goi bogina kwatubayasi. Ame Tauyana mavada tayamo bei ikaiwoduwem yaidi go, kai Isileli tubunao im bodao ama taimámina manuna. Tauna ame tuta yau im kutagonēgu magu tuboina akámasa nakae kudige.’

³³ Go gomanayana tamana be sinana Simioni ina livala natudi manuna sinovedi, manudi nukotodi siwowówana.

³⁴ Gomanayana kina Simioni . Ikavava, sinana be tamana ikaipakuyedi go, gómana sinana Meri yaina Simioniyana idigo kana, ‘Kunōve. Ame gomanayana kina Yaubada ikinave bei tomota badabadaidi goi ivasobusobuyedi go, maniyedi ikilagasidi bei adi yava sibabane. Aiyuwoina Tauyana aba kinana tayamo Yaubada goi ima go, tomota maniyedi bei sivakaleye,

³⁵ e bei tomota badabadaidi idi nuwogau ikaiwoduwedi. Ego kom nakae bei kukategeda nakae neta sisi iginubasim.’

Tokabivalavala Ana ina talavaita Yeisu manuna tetelina

³⁶ Yaubada ina tayamo yoina Ana ikaaiyaka. Tauyana guma Aseri; Panuweli natuna. Tauyana bogina ikainamoya nakae tala maanawena bogina ikaaiyaka. Boi nimatu inai, tala ainima aiyuwo goi monena taiyao sikaaiyaka namlieta monenayana ikámasa.

³⁷ Vavinayana ma koobuina ikaaiyaka aaa, e ana tala eiti poa (84) bogina ibabane. Tuta liliuna Vada Kimaasabaina goi ikaaiyaka, mana diyakímwana be mana kawanoi itaaimámina Yaubada yaina.

³⁸ Moe tutayana Simioni nava ibobóbwara, Anayana ibala ima tauyadi yaidi goi Yaubada iyapaliye be gomanayana manuna itaalavaita da Yerusalema nakae Isileli tubunao liliudi yaidi goi neta adi tateta situuyaosi.

³⁹ Tutayana Iyosepa be Meri kaga liliuna bogina silukavavedi nakae Yauwe ina Katukeda idige, ma natudi sikaluvila sina toinidi idi kasa Nasareta moe Galili sinaena.

⁴⁰ E kina go gomanayana ibibíbina be nakae iitogaga, e nanamsa ivakayaaodei. Ago gomanayana kina Yaubada ikanuwoiye.

Yeisu Vada Kimaasabaina goi tovatulúkwana itaiyaakekedi tetelina

⁴¹ Gomanayana tamana be sinana tala tamo tamo sina situkotuko Yerusalema goi Basitáwana Aikanina manuna.

⁴² Tutayana Yeisu ana tala yawou aiyuwo bogina ibabanedi, nakae situkomna sina Yerusalema goi nakae tomota idi sinapu Basitáwana Aikanina ana tuta.

⁴³ Niga Aikayana mlina sikatubayasi bego sikaluvila sina idi kasa. Bogina sinonoina go, geya siyagoiyeta natudi Yeisu nava Yerusalema goi ikaaiyaka.

⁴⁴ E sinuwonúwana kadi, ‘Yeisu nakona boda taiyao siiketoiya’, tuwo maliyalina ana madabokina goi siiketoiya sinonoina. Go lavilavi goi bego sikanaliya go, sediyao be osediyao yaidi goi Tauyana siilusale, geya.

⁴⁵ Geya sibabaneyeta, tuwo sikaluvilamna sina Yerusalema goi Tauyana siilusale.

⁴⁶ Siilusale, siilusale, maliyalina aito mlidi Tauyana Vada Kimaasabaina moteoina goi sibabane, tovatulúkwana yaidi iitusobu, itaiyaakekedi be nakae ilumaadadedi.

⁴⁷ E tomota liliudi sikaaiyaka Tauyana sitaaiyakeke, ina nanamsa be ina katumapu pasidi sikainaopa.

⁴⁸ Ago tamana be sinana sigite, sikainaopa go, sinanayana idigo kana, ‘Natugu, kunōve. Kaga unana nakae kuguinuwe yaima? Tamam be yau mama kateyova kaluusalem.’

⁴⁹ Yeisu idigo kana, ‘Kaga unana geya itoboinemita kobabanegu? Manakae? Geya koyagoiyeta itoboine Tamagu ina vada goi akaaiyaka?’

⁵⁰ Ina bóbwara sinove go, geya siyagoiyeta kaga idigedige.

⁵¹ Tuwo isou sinana be tamana taiyao sina Nasareta goi. Ago ikabikaaonedi. Kina go sinana moe dogoiyadi liliudi nuwona goi inuwooleleudi.

⁵² Yeisu ina nanamsa ibíbina be nakae ikaitubuwaumatuwo go, Yaubada be tomota goi anuwóiya ibabane.