Luke 1 - Buki Kimaasabaina

Livala Vakuumgoina ( )

¹ Tomoya Tiyopilo, Tomota badabadaidi bogina sipoikíkina bei Yaubada ina guinuwa boi yaida goi simalatomota tetelidi buki goi siginidi.

² Kaga kaga boi ana topaisewao toinidi matadi goi sigimiigitedi be nakae sivadaamanedi kai yaima, e nakae tomotayadi idi buki goi sikaidamanedokoidi.

³ Tauna yau nakae anuwonúwana itoboinegu bei guinuwayadi buki goi aginidi. Kaga liliuna sigimiisowóduwo boi nimatu go, ima ame tuta bogina adovatusidokoidi, tauna buki goi aginidokoidi kom Tiyopilo manum

⁴ bego dogoiyadi liliudi boi sivatuulukoim, itoboinem kukamoitamoedokoidi.

Yeisu ina bíbina tetelina ( ) Iyoni ina bíbina ana talavaita tetelina

⁵ E tetalayana ame nakae: Tolovina .

⁶ E adi taiyuwokova kiboobosidi Yaubada matana goi. Nakae yawoidi goi geya adi pikwanamo ina Katukeda ana lovina be ina nuwonúwana liliudi sikabikaonedokoidi.

⁷ Ago Elisabetayana ikágala be nakae adi taiyuwo bogina siwowosobu, tauna geya natudimo.

⁸ E Sakaraiyayana ina bodao idi tuta paisewa isowóduwo, tauyana Tonúwala nakae Yaubada matana goi ipaaisewa go,

⁹ kinava ikabi bei Yauwe ina Vada Kimaasabaina goi isiu. Isiu, nakae Tonúwala idi sinapu, e bei iikasale.

¹⁰ Kidi go boda madabokina moetala goi sikaaiyaka, insensi ana kasala ana tuta goi liliudi sikaawanoi.

¹¹ E tuwo Sakaraiyayana Vada Kimaasabaina isiu go, Yauwe ina kakataina goi iitaoya.

¹² Sakaraiyayana ikandobala anerose igite, ikaliwoisa, tuwo atena iyova gagaina.

¹³ E aneroseyana idigo kana, ‘Sakaraiya, taabu kuumatōita. Im kawanoi Yaubada bogina inove, e ame tuta ikatumapu. Monem Elisabeta bei ivenátuna, natumiyana koroto. Tauyana bei kuvayou .

¹⁴ Gomanayana manuna bei kuuyáwana gagaina toina. Ina bibinayana manuna tomota badabadaidi nakae bei siuyáwana.

¹⁵ Moitamo. Tauyana bei toolagaina Yauwe matana goi. Taabu be bwae toogagaina iinīmdi. Nava sinana gamona goi ikaaiyaka bei ivakayaodei.

¹⁶ Niga bei komi badabadaimi ikaluvilemneimi, e Yauwe ida Yaubada komeko.

¹⁷ nakae Iyoniyana mana katepatu be mana togaga ivakumgo ima Yauwe manuna. Koroto atedi bei ikayagaviledi natudiyao yaidi goi, tokapipilova nuwodi ikayagaviledi bei tauyadi nakae, be tomota ikatubayasidi Yauwe ina sowóduwo manuna.’

¹⁸ Go kina Sakaraiyayana idigo kana, ‘Kaga goi bei ayagoi moe moitamo? Yau bogina akaitomoya. Monegu nakae bogina ikainamoya go!’

¹⁹ Go aneroseyana idigo kana, ‘Yau Gaberiyeli, tuta liliuna Yaubada matana goi aataoya ina nuwonúwana aguuinuwe. Tauyana ietunegu ama bei ame vala dedevinayana atalavaite yaim.

²⁰ Go kunōve. Guna livala tuta kaikaila goi bei simalatomota. Go guna livalayadi geya kunumisedita, tauna ame tuta maem imoumou, e geya itoboinemta kubóbwara ana kadókana ame dogoiyadi bogina simalatomota baige.’

²¹ Go bodayadi nava Sakaraiya situuyaosi go, nukotodi siwowówana sinuwonúwana kadi, ‘Kaga unana Vada Kimaasabaina goi nava ikaaimúmuna?’

²² E Sakaraiyayana isowóduwo go, geya itoboineyeta ibóbwara boda yaidi. Tauna bodayadi bogina siyagoi Vada Kimaasabaina goi ikaalayáusa. Tuwo nimana goi ikaaukedamo yaidi unana maena imoumou.

²³ Tauyana ina tapwaroro ana paisewa bogina ilukavave, ikaluvila ina ina kasa.

²⁴ E tuta amo mlina tauyana monena Elisabeta ikéuwama go, tukówana ainima goi vada sinaena ma keeuwamina anetava ikaaiyaka, e inuwonúwana kana,

²⁵ ‘Yauwe bogina inuwaisigu ame nakae: Guna omayamaya geya natugumo pasina tomota matadi goi bogina ikabi inave.’

Yeisu ina bíbina ana talavaita tetelina

²⁶ E tukówana sikisi Elisabetayana nava ma keeuwamina, Yaubada ina anerose Gaberiyeli ietune ina asa tayamo Galili sinaena, asayana yoina Nasareta.

²⁷ Ietune ina woiyai tayamo geya ana kanaotamo. Woiyaiyana ana tayamo. Woiyaiyana yoina Meri.

²⁸ E aneroseyana ima Meri ina vada goi isiu ima ilatuwoko idigo kana, ‘Kom Meri Yauwe ikanuuwoiyem, uyagu! Tomoya kom taiyao!’

²⁹ E livalayana pasina Meri nukotona taitáiya iuyoi, ina nuwonúwana kana, ‘Anerose ina bóbwara kaga nakona ana yagoina?’

³⁰ Go aneroseyana idigo kana, ‘Meri, taabu kuumatōita! Yaubada bogina ikanuwoiyem.

³¹ Kunōve. Nava bei kukéuwama. Niga natum koroto bei kuvenatuni, kuvayou .

³² Moe Tauyana nava bei toolagaina, bei sivayoko Tokanayatanatoina Natuna. Tuwo tubuna Devida ina kalibúbuna Yauwe Yaubada nava bei ivadamane Tauyana goi

³³ be Yakobo ina bodao ikalibubuvataedi unana ina kalibubunayana geya ikavaveta.’

³⁴ E Meriyana idigo kana, ‘Yau koroto taiyao geya kamamasisi, tauna moe manakaena bei isowóduwo yaigu?’

³⁵ Go aneroseyana idigo kana, ‘Baloma Kimaasabaina bei iwokoim o tadigo kada “Tokanayatanatoina ina togaga gaota nakae bei iumaim kukéuwama.” Moe pasina tauna natum kuveenatuni bei sivayoko , Yaubada Natuna.

³⁶ Go kunōve. Osiyam Elisabeta bogina ikainamoya go, bogina ikéuwama, gómana koroto. Tomota sinuwonúwana tauyana ikágala go, ina keuwamayana goi ina tukówana sikisi bogina sikavava.

³⁷ Geya kada kaga tayaamo imou Yaubada yaina geya, tauna kom be Elisabetayana imi kéuwama itoboinedi.’

³⁸ E Meriyana idigo kana, ‘Yau Yauwe ina . Moitamo, latuwogu isowóduwo yau yaigu kaga nakae bogina kudige.’ Amo ikavava, aneroseyana itaoya, Meri ikalave ina.

Meri ina Elisabeta iivadade tetelina

³⁹ E Meriyana itaoya, amo tutayana goi woilina ina Yuda asaina tayamo, asayana koya dadavina goi.

⁴⁰ Ima asayana goi isowóduwo ina Sakaraiya ina vada goi isiu Elisabeta yaina ikauyagu.

⁴¹ Tutayana Elisabetayana Meri ina kauyagu inove, memeya gamona goi mana uyáwana imoya go, Baloma Kimaasabaina Elisabeta ivakayaodei.

⁴² Tuwo niyana gagaina goi iduduwo kana, ‘Vevina yaidi goi kom gagaina. Gamom keuwoina nakae kaaipakuna.

⁴³ Ame aba wowoina yau yaigu bego kom ida Tomoya sinana go, yau kumekoigu.

⁴⁴ Ame moitamo. Kunōve. Im kauyagu anovenove, to memeya gamogu goi mana uyáwana imoya.

⁴⁵ Bogina kunumisa bego moitamo Yauwe ina livalayana yaim goi nava bei imalatomota, tauna am dedevina bogina kubabane.’

⁴⁶ Tuwo Meriyana idigo kana, ‘Ategu goi Yauwe akilagasi.

⁴⁷ Nakae Yaubada guna Toyava pasina balomaigu bogina iuyáwana gagaina

⁴⁸ bego yau Tauyana ina nuwotookaigu go, inuwokavategu. Moitamo toina. Ame tuta be nakae tuta simamaima malamalágata liliudi bei sinuwonúwana yau guna dedevina bogina bei ababane.

⁴⁹ Moe kina iguinuwedi yau manugu, Tauyana yoina kaakesaina

⁵⁰ be nakae ana towowoinayao malamalágata liliudi yaidi goi inuwokapisiyedi.

⁵¹ Tauyana nimana toogagaina goi ina togaga bogina ikaiwoduwe. Tonuwatue madi nuwogau goyogoyoidi atedi goi ikausapesapedi.

⁵² Tolovina kebadi goi ivasobusobuyedi go, tonuwotookaidi ikilagasidi.

⁵³ Kidi madi loga dogoi dedevidi goi ivakayaodeidi go, kidi toesaesa, nima kaka ivalilivedi.

⁵⁴ Yaubada ina kitomyao, moe Isileli tubunao, ivaitedi. Ina vaitayana moe ina nuwokapisi Eberamo mana bodao yaidi goi inuwokavatevatae

⁵⁵ nakae boi tubudao yaidi ikatótula.’

⁵⁶ E Meri osiyana taiyao tukówana aito nakae sikaaiyaka namlieta ikaluvila ina ina kasa.

Iyoni ina bíbina tetelina

⁵⁷ E kina go Elisabetayana ina tuta venátuna bogina isowóduwo, natuna koroto ivenatuni.

⁵⁸ Ivenátuna, senao be osenao sinove bego Yauwe Elisabeta inuwokapisiye gagaina, tuwo tauyana taiyao siuyáwana.

⁵⁹ Niga gomanayana maliyalina ainima aito bogina ibabanedi, boda sima siyoko. Sakavaina ana kúpwana ikavava, kidi bodayadi bego gómana sivayou tamana ana ebígana

⁶⁰ go, kina sinanayana idigo kana, ‘Geya toina, go sem tavayōu Iyoni.’

⁶¹ Go bodayadi sidigo kadi, ‘Go geya vatau tayaamo im boda yaimi goi yoina moe youyana.’

⁶² E tamana yaina goi sikaukeda, latuwodi siyagoi ava you ivayou.

⁶³ Tuwo ikawanoi aba gínina tayamo sime. Sime, tauyana ikabi igini kana, ‘Yoina Iyoni.’ Tuwo boda liliudi nukotodi siwówana.

⁶⁴ E Sakaraiyayana sopana be maena mainao sikakapu, nakae itoboine ibobwaramna. Tuwo ivatowo Yaubada iyapaliye.

⁶⁵ Ago kidi sediyao liliudi sigite, simatoita. Boda Yudiya koyaina madabokina goi sikaaiyaka moe dogoiyadi sivateetelidi.

⁶⁶ Ego avatauwa neta tetalayadi siinovedi, manudi sinuwoleleu kadi, ‘Amo gomanayana, gómana tayamo.’ Idi bobwarayadi moitamo. Yauwe nimana ikaaiyaka gomanayana yaina.

Sakaraiya ina yapali

⁶⁷ Kina go gómana tamana Sakaraiyayana, Baloma Kimaasabaina ivakayaodei, tuwo Balomayana goi Yaubada ina nuwonúwana ikabivalevale, idigo kana,

⁶⁸ ‘Yauwe kita Isileli tubunao ida Yaubada aba kaodedevina! Tauyana bogina ivadadeda be kita ina bodao itateteda.

⁶⁹ Ina kitom Devida ina bodao yaidi goi ada Toyava toogagaina ikaiwoduwe.

⁷⁰ Moe nakae boi nimatu Yauwe ina kimaasabaidi sopadi goi bogina ikatótula.

⁷¹ Ina katotulayana bego ada yava tababane ida kaleyayao yaidi goi nakae ada tokaoliliwo nimadi goi.

⁷² Nakae iguinuwe bei ina nuwokapisi tubudao yaidi boi ikaatotule bogina iguinuwe o tadigo kada, “Boi ina kaakesaina inuwokavate.”

⁷³ Moe anasiunayana goi ikatótula tubuda Eberamo yaina.

⁷⁴ Ina katotulayana ame nakae: Ida kaleyayao nimadi goi bei iyaveda, tauna geya ida matoitamo tataaimámina Tauyana yaina.

⁷⁵ Ida taimaminayana moe ma kimaasabaida Tauyana umana be nakae ma kiboobosida yawoida madabokina goi.

⁷⁶ E kom nakae, natugu. Kom bei Tokanayatanatoina ina tokabivalavala. Bei kuvakumgo kuna Yauwe ina kenao kuunai

⁷⁷ be nakae ina bodao kuvatulukoidi idi goyo ana nuwotao goi ida Yaubada iyavedi

⁷⁸ ina nuwokapisi gagaina yaida pasidi. Ina kanuwoiyayadi pasidi mavada olagaema goi bei ima ivadadeda,

⁷⁹ e bei tauyadi kokonótuya goi be nakae ámasa kikina goi itapasigidi. Aiyuwoina tuboina ana kenao goi bei ivakededa.’

Iyoni ikaituubuwau tetelina

⁸⁰ E kina go gomanayana ibibíbina be nakae balomaina goi iitogaga. Tauyana yoyowo goi ikaaiyaka ana kadókana ina tuta bego isowóduwo senao kidi Isileli tubunao yaidi goi.