Kolose 1 - Buki Kimaasabaina

Leta ana togínina be ana tokatuyaivayao ( )

^1-2 Komi Yaubada ina kimasabayao Kolose goi, Yau Paulo be spwagoogonimi Guyau taiyao yaimi. Yaubada Tamada ina kanuwóiya be ina tuboina bei ivinimi.

Paulo ina kauyagu be ina kawanoi ( ) Paulo ina kauyagu

³ Tuta liliuna Yaubada, Tauyana ida Tomoya Yeisu Tamana, yaina kakaauyagu tutayana komi manumi kakaawanoi.

⁴ Kakaauyagu nakae boi tutayana vala kagiminove imi numisa imi kidi Yaubada ina kimasabayao liliudi yaidi manuna go, ima ame tuta.

⁵ Imi numisayana be imi matakoiyana unadi moe imi lotuta go, imi lotutayana bego ami vaiwówana yábana goi Yaubada imataakavate nava bei ivinimi. Moe boi livala mooitamoina goi bogina konove; livalayana moe .

⁶ Valayana bogina iwo yaimi, nakae boi ina tomota liliuudi nakae poyapoya ana madabokiina goi yaidi. Amoko goi ikéuwo be nakae inúnuwo, nakae komi yaimi nakae boi tutayana kogiminove be Yaubada ina kanuwóiya kolotowodoko moe moitamo.

⁷ Moe nakae Epapira boi bogina ivatulukoimi. Tauyana ama tosavaiyuwo be nakae ida kalo, nakae Guyau ina tovaita aba numisa komi manumi.

⁸ Boi tauyana ilatuwokoima imi matakoi manuna. Imi matakoiyana unana moe .

Paulo ina kawanoi

⁹ Moe pasina kai nakae tutayana valemi kagiminove go, ima ame tuta ima kawanoi manumi geya kasayateta. Ima kawanoiyana bego Yaubada ina nuwonúwana ana yagoina goi ivakayaodeimi ame nakae: Baloma Kimaasabaina nanamsa liliuna ivinimi, e bei koyagoidoko.

¹⁰ Latuwoma ivakayaodeimi bego koketoiya dókana nakae kita ida Tomoya ina bodao itoboineda, e bei yawoimi madabokina goi Yaubada kovauuyaone. Koketoiya dōkana ame nakae: Imi guinuwa dedevidi madabokina goi kookēuwo, imi nanamsa Tauyana manuna ibíbina,

¹¹ ina togaga madabokina goi ikitogagemi nakae ana tomoeeyalina ana togaga ana kakainaki. Moe nakae bego itoboinemi tuta liliuna imi egamogamogu manukaina, kotaoyaakavata nakae ina togaga ana kakainaki be mami uyáwana

¹² kokaauyagu Tamada yaina. Tauyana itagoneda bei itoboineda ina kaiguyau boi ikaatotule ina kimasabayao liliudi bei ivinidi, e mavada ana dadava goi tababane.

¹³ Kita mamaníwana ina kaba lovina goi iyaveda namlieta ikaidamaneda Natuna, moe ina kakaya, ina kalibúbuna sinaena goi.

¹⁴ Kita ida spwagógana Natunayana taiyao pasina ada tateta bogina tababane, moe ida goyo adi nuwotao.

¹⁵ Natunayana moe Yaubada geya tagiteyeta ana tapata be nakae totubukumgo. Yaubada ina madaginayao madabokidi itobusavedi.

¹⁶ Tauyana goi Yaubada kaga liliuna imadagidi; kaga neta yábana goi be nakae kaga neta poyapoya yatana goi, kaga neta taagitedi be nakae kaga neta geya tagitedita: Yábana osasaina goi tolovina liliudi, aba lovina liliudi, sinitu liliudi be adi tovakumgoyao liliudi. Kaga liliuna Yaubada imaadagidi moe Natunayana nimana goi imadagidi be nakae Tauyana manuna imadagidi.

¹⁷ Tauyana namlieta kaga liliuna sisowóduwo, bogina ikaaiyaka, e yaidi goi Tauyana toosakina be nakae Tauyana goi ikikavateedokoidi.

¹⁸ Tauyana wowona moe kita ana totugugunayao go, dabada moe Tauyana. Tauyana yawana vau ana kaba vatowo; tokámasa yaidi goi Tauyana totubukumgo bego kaga liliuna goi Tauyana toosakina.

¹⁹ Moe unana Yaubada mana uyáwana iilovina bego toinina aderina madabokiina Natunayana goi ikaaiyaka

²⁰ be nakae Natunayana ina guinuwa goi kaga liliuna poyapoya yatana be yábana sinaena ikabivekovekomneidi ame nakae: Tauyana ikaikaina kerose goi Yaubada inuwolida. Tauna Natunayana toosakina.

²¹ Komi boi mainao imi guinuwa goyogoyoidi pasidi Yaubada yaina kotavilei be nuwomi goi Tauyana kovakaleye.

²² Go ame tuta Guyau wowona ina kámasa goi Yaubada ikabivekovekomneimi, e bei ivagitakoimi toinina matana goi kimaasabaimi Tauyana umana, maavadaimi be nakae geya ami pikwanamo.

²³ Moe nakae moitamo neta numisa goi kokaiyaka dókana. Numisayana ida dako nakae, yatana bogina tataoya ikasa. Ago numisayana goi geya tamoyamoya geya, go sem ada yava Vala Dedevina pasina talootutae. Vala Dedevinayana boi bogina konove, bogina inúnuwo Yaubada ina madaginayao liliudi yaidi goi. Valayana manuna yau Paulo bogina amalatovaita.

Paulo Vala Dedevina mooitamoina ana totalavaita aba numisa ( ) Paulo ina gedageda Vala Dedevina manuna

²⁴ Ame tuta guna gedageda komi ami dedevina manuna abaabanedi auyaaonedi unana gedagedayadi goi bei itoboinegu kaga boi bogina igimilovina tonumisayao ida gedageda ana kakainaki manuna yau wowogu goi alukavavedi Tauyana wowona manuna. Wowonayana moe kita Yeisu ana totugugunayao.

²⁵ Totugugunayami manumi yau bogina amalatovaita, nakae Yaubada bogina ikawoigu komi ami dedevina manuna bego ina Vala madabokina tomota liliudi yaidi goi atalavaite.

²⁶ Valayana moe Yaubada ina nuwogau boi nimatu vamoounina tubumao yaidi goi go, ame tuta bogina ikaiwoduwe kita ina kimasabayao yaida.

²⁷ Yaubada latuwona bego ina nuwogau ivatulukoida bei tayagoi ame nuwogauyana dedevina toina esaesa nakae go, nuumisaimi yaimi tagite. Nuwogauyana moe Guyau yaimi nakae ikaaiyaka. Tauna koolotuta bego Yaubada ana káeyana tomoeeyalina goi bei kokaaiyaka.

²⁸ Tauyana kai kataalavaite tutayana tomota liliumi kakatusinapumi be nakae mama nanamsa gagaina kavatulukoimi. Ima talavaitayana bego itoboinema tomota liliumi kavagitakoimi komi maatuwoimi Guyau matana goi.

²⁹ Moe manuna nakae apoisógana ame nakae: Tauyana ina togaga sinaegu goi ipaisewa makimaki, e moe togagayana goi aakokoila.