Iyona 2 - Buki Kimaasabaina

Iyona ina kawanoi

¹ E tuwo Iyonayana íyana sinaena goi ikawanoi ina Yaubada yaina

² idigo kana, ‘Guna kategeda goi Yauwe atumadadem, e kukatumapugu. Same 120:1 Ámasa ana dadava goi apodeda vaita manuna, e guna kawanoi kunove.

³ Boi kulavegu asou ana dimówana tututu goi, e négwasa ilataoigu be nakae im kaivaya gagaidi sikautumgu.

⁴ Tuwo yau guna nuwonúwana kagu, “Matam goi bogina kuvatapiyegu.” Go tuwo nava bei im Vada Kimaasabaina agitemnei.

⁵ Asou négwasa ituko ima nukotogu goi, nakae dimówana ilataoigu, e dodouna dabagu ipaimi.

⁶ Asou ana niku unana toina goi. Ana kaigigita aliupa ikaaiyaka ikaubodegu, tauna deri nakae akaaiyaka. Go Yauwe, guna Yaubada, ámasa goi ma yawoigu kwabimneigu.

⁷ E guna lotówana alotowo bego akámasa go, Yauwe anuwookavate. Tuwo akawanoiyem, e guna kawanoiyana ituko iwo im Vada Kimaasabaina goi kunovegu.

⁸ Avatauwa neta siinumisa tokwalu geya basabasaidimo yaidi goi, e Yauwe ina geya sibabaneyeta.

⁹ Go yau sem magu vesi yaapalina bei yoguyogu akasale kom yaim. Kaga boi akaatotuli moitamo nakae bei aguinuwe. Ada yava Yauwe goi ima!’ Same 3:8

¹⁰ E iyanayana kina Yauwe ilovinae Iyona ilagobe. Tuwo moitamo ilagobe ina mamaya goi itowo.