Iberiu 8 - Buki Kimaasabaina

Yeisu ina paisewa Tonúwala Toolagaidi liliudi idi paisewa idedevinasavedi ( ) Yeisu ina paisewa núwala goi anasiuna vau dedevina toina iguinuwe

¹ E guna bóbwara ana masi ame nakae: Kita mada . Tauyana aba wowoina Tokanayatanatoina kebana esaaesaina kakataina yábana goi iitusobu.

² Tauyana Yaubada ana katumapu toina sinaena goi ipaaisewa. Aba Kaiyakoyana yábana goi ikaaiyaka, tauna tomota geya siyowoeta, go sem Tomoya iyowo.

³ Moitamo Tauyana Bateta Kimaasabaina goi ipaaisewa. Tonúwala Toolagaidi tamo tamo poyapoya ame goi Yaubada ivayokoidi bei idi kauyagu ana yabobona be nakae vininabeso yoguyogu sikasaledi Tauyana yaina. Moe pasina tauna Yeisu ida Tonúwala Tolagainayana nakae itoboine vininabeso tayamo ikasale Yaubada yaina.

⁴ Tauna neta Yeisu poyapoya ame goi ikaaiyaka, geya itoboineyeta bei ietonúwala unana Tonúwala bogina sikaaiyaka, vininabeso sikaasaledi Yaubada yaina nakae ina goi boi bogina idige nakae.

⁵ Aba Kaiyakoyana poyapoya ame goi sitaaimámina moe Yaubada ina Kaba Kaiyaka yábana goi ana tapata o kada, ‘Makayauna.’ Moe pasina boi tutayana Mosese giyakainava Yaubada ina Kaba Kaiyaka ivatowo imadagi, Yaubada ikatusinapu idigo kana, ‘Mosese, am dodōkana bei kaga liliuna boi mainao koya goi bogina avatulukoim, e nakae kutapatēdi.’ Tateta 25:40

⁶ E ame tuta kita ida Tonúwala Toolagaina moe . Go ina paisewa Yaubada ivini moe tonuwalayadi idi paisewa idedevinasavedi unana Tauyana Yaubada ana katumapu, e ina guinuwa goi Yaubada ikanasiunamna kita taiyao. Go moe anasiuna vauyana anasiuna bogo idedevinasave. Atótula dedevidi goi toinina ilovina anasiuna vau manuna. Anasiuna vauyana unana moe atótula dedevidi, nakae anasiuna bogo ana katótula sidedevinasavedi.

⁷ Neta gimikanasiunayana geya ana goyomo, anasiuna vau geya iguinuweyeta ae?

⁸ Ame moitamo. Boi nimatu Yaubada Yeremaya italavaite idigo kana, ‘ idigo kana, “Gwa! Tuta imamaima bei anasiuna vau aguinuwe Isileli tubunao yaidi goi be nakae Yuda tubunao yaidi goi.”

⁹ Tuwaina Yauwe kana, “Go guna kanasiuna vauyana geya nakae boi akanasíuna tubudiyao yaidi tutayana nimadi akabidi avakededi Itipita goi sisowóduwo geya; unana amo anasiunayana geya siyoisikavateyeta, tauna akataedi.”

¹⁰ Yauwe tuwaina kana, “Bego amo tutayana akanasíuna Isileli tubunao yaidi goi ame nakae: Bei nuwodi goi guna lovina ayatoidi nakae kidi atedi goi aginidi, tuwo bei yau kidi idi Yaubada go, kidi yau guna bodao.

^11-12 Tuwo idi guinuwa goyogoyoidi bei anuwotaoidi nakae idi goyo geya anuwokaavatedi. Tauna tomota liliudi, tauyadi maa yoidi gagaidi nakae tauyadi you tagau, bei siyagoigu. Tauna geya vatau tayaamo itoboine semiyao o osemiyao bei ivatulukoidi idigo kana, ‘Yauwe koyagōi’, unana bogina siyagoigu.”’ Yeremaya 31:31-34

¹³ Tutayana Yaubada idigo kana, ‘Anasiuna vau bei aguinuwe’, moeko goi ina kanasiuna bogo bogina ikaibogo nakae geya basabasainamo. E anasiuna bogoyana giyakainava bogina isaosáwala.