Iberiu 3 - Buki Kimaasabaina

Yaubada ina livala tanumīse bei ina kaba waiwasi goi tasiu ( ) Taabu ida numisa taakalāve be nakae taabu Yaubada niyana takapiipilāve

¹ E tauna segowo kimaasabaimi Yaubada umana be nakae yábana goi mami duduwo yau nakae, Toolagaina takamooitamoe.

² Tauyana ina tovayókwana yaina goi nakae Mosese aba numisa tovayokwanayana ina bodayauwo yaidi goi.

³ Tauna Yeisu tanuwolelēuye. Tauyana itoboine taimámina ibabane namlieta baige Mosese. Moe nakae vada ana toyówana taimámina gagaina ibabane namlieta vadayana.

⁴ Bogina koyagoi. Vada liliudi sikaaiyaka tomota siyowóidi go, Yaubada kaga liliuna adi toyówana.

⁵ Go Mosese tovaita aba numisa, e Yaubada ina bodayauwo liliudi ivaitedi be kaga nava bei Yaubada iidigedi tauyana italavaitedi.

⁶ E kina go aba numisa, tuwo Yaubada ina vada irugwausidoko geya kada kitom nakae geya, go sem Natuna nakae. Vadayana moe kita, neta moitamo ida katepatu Yaubada yaina manuna be nakae ida uyawana gagágasa ida lotuta ina katótula manudi tayoisikaavatedi.

⁷ E idigo kana, ‘Ame neta Yaubada niyana konove,

⁸ taabu kodaabakāsa nakae boi nimatu tokapipilova idi tuta vakakona yoyowo goi sikapipilova.

^9-10 Amoko goi tala poti guna guinuwa toogagaidi siigitedi go, tuwo tubumiyaoyadi sikapipilavegu. Latuwodi bego sigite bei amesayágana yaidi o geya. Moe pasina ame tomotayadi aegamogamoguyedi, adigo kagu, “Tuta liliuna atedi goi siisuláiga. E kidi guna kenao geya siyagoidita.”

¹¹ Nakae boi guna egamogamogu goi bogina toinigu yoigu goi akatótula kagu, “Guna kaba waiwasi goi bei geya sisiuta!”’ Same 95:7-11

¹² Tauna nakae Baloma Kimaasabaina ina bobwarayana, segowo, e alatuwokoimi komi nakae mami nunūwata, govila bei tomota maniyemi yaimi goi atemi madi goyo, e imi numisa goi kosou bei Yaubada maa yawoina kokalave.

¹³ Go sem maliyalina tamo tamo goi semiyao atedi kovapatuupatūdi. Neta itoboineda kada, ‘Ame tuta’, e nakae koguuinūwe, govila bei maniyemi goyo ina pola pasina kodabakasa.

¹⁴ Bogina koyagoi. Kita bogina tasiuko taeboda tayamo neta ida numisa boi mainao tagiminumisa nakae tayoisikavate ana kadókana tuta ana kaba lukavava.

¹⁵ Moe nakae Same idigo kana, ‘Ame neta Yaubada niyana konove, taabu kodaabakāsa nakae boi nimatu tokapipilova idi tuta vakakona yoyowo goi sikapipilova.’ Same 95:7-8

¹⁶ Moitamo taabu kodaabakāsa. Avatauwa yoyowo goi boi Yaubada sinove go, sopana sikapipilave? Tubumiyao maniyedi? Geya, go sem madabokiidi Mosese boi ivakededi Itipita goi sisowóduwo.

¹⁷ E avatauwa tala poti goi Yaubada iegamogamoguyedi? Tauyadi toogoyoidi boi yoyowo goi sikámasa ae?

¹⁸ Boi Yaubada ikatótula idigo kana, ‘Guna kaba waiwasi bei geya sisiuta geya.’ Same 95:11 Go moe avatauwa yaidi ikatótula? Kidi tokapipilova ae?

¹⁹ Tuwo tagite bego ina kaba waiwasiyana goi geya itoboinedita sisiu unana geya sinumiseta.