Iberiu 1 - Buki Kimaasabaina

Yaubada Natuna toolagaina ( ) Yeisu anerose ikalisavedi

¹ Boi nimatu Yaubada ina sopadi goi tubudao ivadigoidi go, giyaina giyaina be ta kenao ta kenao goi ina livalayana ivinidi.

² Ame tuta ana kaba lukavava Natuna goi ivadigoida. Natunayana ikinave bei kaga liliuna moe Tauyana ina kaba lovina. Nimana goi kaga liliuna imadagidi.

³ Tauyana Yaubada ana kanukanununa be nakae Tauyana goi Yaubada aderina toina imalatomota. Kaga liliuna ina livala toogagaina goi iyooisidi. Ida goyo goi ikimavadeda ikavava, wowoina basekoina Yaubada Tokanayatanatoina kakataina goi itusobu.

⁴ Tauna itaoyakukuidi unana Tauyana yoina Yaubada bogina ivinivini anerose yoidi ikalisavedi.

⁵ Moitamo, anerose itaoyakukuidi. Ava anerose yaina goi Yaubada ibóbwara idigo kana, ‘Kom natugu; yau ame avanatunem’? Same 2:7 Geya tayaamo yaina. O aiyuwoina ava anerose yaina goi ibóbwara idigo kana, ‘Yau Tamana, e Tauyana natugu’? 2 Samwera 7:14 Geya tayaamo yaina.

⁶ E tuwaina, tutayana Yaubada ina totubukumgo ivamoleye ima poyapoya ame goi, Yaubada idigo kana, ‘Latuwogu guna aneroseyao madabokidi Tauyana yaina sisakulūlu.’ Same 97:7

⁷ Aiyuwoina aneroseyadi manudi idigo kana, ‘Yágira ietako ina aneroseyao nakae. Yeu sabeninimina iepaisewe ina tovaitayao nakae. Tauyana manuna sipaaisewa.’ Same 104:4

⁸ Go Natuna yaina idigo kana, ‘Yaubada e, Im bei ikaiyako vata go, im kalibubunayana moe lovina vavasa.

⁹ Kibóbwata manuna nukotom ikabi go, apipilova kukaolilive. Moe pasina Yaubada, moe kom im Yaubada, amta bogina ikinavem go, kinavayana goi uyáwana gagaina kubabane be nakae semowo kutaoyakukuidi.’ Same 45:6-7

¹⁰ Aiyuwoina Natuna ilatuwoko idigo kana, ‘Tomoya, Kom aba vatowo goi poyapoya ame kumadagi; nakae yábana moe nimam ina madágina.

¹¹ Amo dogoiyadi bei sisáwala go, kom kwaaiyaka. Madabokina kwama nakae bei sivagoyo

¹² be tanigo nakae kununumidi kuyatoidi. Kwama nakae bei kuvalilividi go, aivaudi kulosidi. Go kom sem taum taum kwaaiyaka, nakae am tala geya sikavaveta.’ Same 102:25-27

¹³ E ava anerose yaina Yaubada idigo kana, ‘Kūma wowoina basekoina kakataigu goi kutusōbu ana kadókana im kaleyayao avasobusobuyedi, e kulovinaedi’? Same 110:1 Geya tayaamo yaina.

¹⁴ Go anerose kaga? Madabokidi baloma nakae, Yaubada ina tovaitayao ivamoleyedi sima bei kita ada yava taababane sivaiteda ae?