Galetiya 5 - Buki Kimaasabaina

Vala Dedevina Paulo itaalavaite da Galetiya goyo ina togaga goi italigeidokoidi ( ) Da Galetiya bogina taliigavidi, tauna sakava ana kúpwana geya ivaitedita

¹ Ada talígava manuna .

² Konovēgu! Yau Paulo alatuwokoimi neta ina guinuwa geya ivaitemita!

³ E komi koroto latuwomi sakavaimi ana kúpwana aiyuwoina akatumatalimneimi bego ava koroto yaimi neta sakavaina ikupo, mana tasíkwana goi lovina liliudi ikibobosidi.

⁴ Avatauwa komi bego Atukedayana ana guinuwa pasina Yaubada ivayokoimi komi kiboobosimi ina manuna, e Guyau yaina bogina toinimi kotavileiyemi. Moeko goi Yaubada ina kanuwóiya bogina kokalave.

⁵ Moitamo. Atukedayana ana guinuwa geya ivaitedeta niga Yaubada ina manuna. Kita go Yaubada Balomaina ina togaga goi ida numisa pasina mada lotuta taatuyáwata bego Yaubada nava bei itakinoida kita kiboobosida ina kanasíuna manuna.

⁶ U moe moitamo. Avatau neta ispwagógana Guyau goi ikéuwo.

⁷ Numisa ana kenao vavalákuna nakae. Boi mainao vavalakunayana goi kolokooina dókana. Go avatau ilokoinabodebodemi, tauna mooitamoina geya kokabikaoneyeta?

⁸ Ame sinapuyana ada Toduduwo goi geya imaita!

⁹ Ame vatulukwana polapola bei itagayagaya be ibíbina nakae giyaina go, isiu ina parawa madabokina goi ibíbina.

¹⁰ Guna ida Tomoya yaina pasina alotowoimi ituli ta nuwonúwana bei geya koyoisikavateyeta. Tauyana ina tamyábina goi nukotomi ikiwoowonidi, Yaubada ina liuna bei ibabane.

¹¹ E segowo, maniyedi topola sidigodigo bego yau nava ataalavaita tomota yaidi bego itoboinedi sakavaidi sikupoidi. Neta moe moitamo, kaga unana nava mou siivinigu? Neta moitamo atalavaita bego itoboinedi sakavaidi sikupoidi, e topolayadi gamodi geya sigoyoita, e mou geya siviniguta. Go moe yau nakae geya. Yau atalavaita bego Guyau kerose goi ikámasa, kita ada katumapu. Tauna gamodi asowolidi, e moe pasina mou sivinigu.

¹² Latuwogu tauyadi nukotomi sikiwoowonidi sakavaidi kaka geya, go sem madabokiina sikupoidimo sikalavedi!

¹³ Guna nuwonúwana tuwaina ataligei, segowo. Yaubada bogina iduduwemi komi ina bodao be nakae ina Katukeda ina lovina goi italigeimi. Ago ami taligavayana taabu kooetāko sakava sinapuna manuna, go sem imi matakoi goi semiyao kovaitēdi.

¹⁴ Ame moitamo. Yaubada ina Katukeda goi lovina liliudi itoboineda talamgogoidi livala tayamo goi. Livalayana kana, ‘Siyami komataakoīye nakae toinimi komatakooiyemi.’ Vininabeso 19:18

¹⁵ Go neta komi taiyao kokaumakimaki be nakae kokausapesapemi, e ami dodōkana, govila bei toinimi komtulimi.

Da Galetiya Baloma Kimaasabaina goi siiketōiya

¹⁶ E yau guna nuwonúwana ame nakae: ina togaga goi kooketōiya yawoim madabokina, bei sakava sinapuna ina yalagau geya koguuinuwedi.

¹⁷ Ame moitamo. Sakava sinapuna ina yala ituli go, Yaubada Balomaina ina yala ituli, e taiyao sigibiubíuna. Bogina koyagoi. Ame yalayadi aiyuwo taiyao sivakaleya, govila bei kaga goyogoyoidi neta kooyaledi koguinuwedi.

¹⁸ E neta Baloma Kimaasabaina ivaakededa, Yaubada ina Katukeda geya ikaukabolideta.

¹⁹ E sakava sinapunayadi bogina tayaagoidi. Sinapuyadi ame nakae: Masisi goyogoyoina, nuwonúwana goyogoyoidi be nakae sakava ana vikaiya owáowana,

²⁰ yaubada polapola adi sakululu, méyava o bowou, vakaleya, aumakimaki, vakipikipi, egamogamogu, tomota aditava idi yala manudi sipoisógana, livisi, tavilei,

²¹ matakikiwo, aumata, bwae toogagaina goi siyaluwo, uyawana owáowana be nakae ava sinapu ame dogoiyadi nakae. Boi akatumatalimi go, tuwo aiyuwoina akatumatalimneimi bego avatauwa neta dogoiyadi siguuinuwedi, e goi geya sisiuta.

²² E kina go Baloma Kimaasabaina keuwoina Yaubada ina bodao yaidi ame nakae: Matakoi, uyáwana, tuboina, mesayágana, yabobona, sinapu dedevina, ,

²³ sakululu, toinidi sikabikunuidi. Avatau neta ame dogoiyadi iguuinuwedi, e ina sinapu dedevina toina. Ago ame sinapuyadi manudi geya tayaamo lovina ikaaiyaka Yaubada ina Katukeda goi isanabodeda bego taabu taguuinuwēdi.

²⁴ E kita go Yeisu ina bodao, sakava sinapuna be ana vikaiya be nakae ana yalagau bogina takalavedi; moe nakae tatupatukoidi kerose goi takaumatedi.

²⁵ Yawoida vau Balomaina Kimaasabaina goi taababane, tauna Baloma Kimasabainayana ina vakeda kiyaena tavaekūli.

²⁶ Taabu tanuuwatūe. Nakae taabu sedao tadumwaamwainīdi be nakae taabu tamatakiikivēdi.