Galetiya 1 - Buki Kimaasabaina

Paulo ina kawoi moe Yeisu be Yaubada goi ima ( )

^1-2 Komi Yaubada ana totugugunayao Galetiya dadavina goi, Yau Paulo be nakae Yaubada Tamada, Tauyana boi Yeisu tokámasa yaidi goi ikaitáoe, e ame Tauyadi sikawoigu bego yau idi vamoléyana. Yau nakae sedao liliudi taiyao kakaaiyaka ami leta ame kagini kaetune iwo yaimi.

³ Yaubada Tamada be ida Tomoya Yeisu idi kanuwóiya be nakae idi tuboina bei sivinimi.

⁴ Yeisuyana toinina ikasale ámasa goi kita ida goyo pasidi bei goyo ana tuta ame goi italigeida. Moe ida Yaubada Tamada ina nuwonúwana nakae.

⁵ Tauyana aba taimámina ame tuta nakae tuta simamaima! E nakae!

Vala Dedevina Paulo itaalavaite moe vala mooitamoina ( ) Paulo nuwona iwówana da Galetiya idi guinuwa pasina

⁶ Iyaa! Nuwogu iwówana gagaina imi guinuwa pasina. Boi ina kanuwóiya goi Yaubada iduduwemi bego komi ina bodao go, geya kovamumugoneta, e Tauyana kokalave go, ituli ta vala kosabokuliye!

⁷ Go moe valayana geya kada mooitamoina geya! Go tomota maniyedi nukotomi sikiwoowonidi be nakae sipooikíkina Guyau Valena Dedevina sisobale.

⁸ Taabu moe valayana kosabookulīye, go sem boi Vala Dedevina bogina kataalavaite yaimi, neta kai Yeisu ina vamoleyanayao o guma yábana ituli ta vala italavaite yaimi, e kotavilēiye Yaubada ina liuna manuna!

⁹ Nakae kalatuwokoimi, e ame aiyuwoina kalatuwokomneimi: Avatauwa neta Vala Dedevina boi bogina kataalavaite yaimi geya sitalavaiteyeta, go sem ituli ta vala sitalavaite yaimi, kotavileiyēdi Yaubada ina liuna manuna!

¹⁰ Moitamo. Mae guna livalayadi kasakasaidi go, manakae? Tomota ataamyabidi gea Yaubada aatamyabi? Geya, komi tomota! Guna livalayadi goi latuwogu atamyabimi bego Vala Dedevina avatuulukoimi kosabokuliyemnei. Manakae? Guna livalayadi goi nava apooikíkina bego tomota avauyaonedi? Geya! Neta latuwogu guna livala goi tomota siuyaonegu, moe nakae yau geya kada geya!

Vala Dedevina Paulo itaalavaite Yaubada goi ima

¹¹ E segowo, Vala Dedevina boi yau ataalavaite yaimi latuwogu koyagoi bego moe tomota idi nuwonúwana goi geya imaita.

¹² Moe moitamo. Vala Dedevinayana tomota goi yau geya ababaneyeta nakae geya vatau tayaamo ivatulukoigu, go sem Yeisu ikaiwoduwe yaigu.

¹³ Ame moitamo. Geya tayaamo tuta tomota itoboinedi sivatulukoigu. Guna sinapu bogina konove bego boi tutayana kai ima tapwaroro ina lovina ayoisikaavatedi. Amo tutayana magu salau Yeisu ana totugugunayao Yaubada italiigogoidi ayogedegededokoidi be nakae apooikíkina bei amtulidi.

¹⁴ Tuwaina, kai Diyuu ima tapwaroro ana vatulúkwana akibobosidoko. Nakae segowo badabadaidi guna malamalágata goi akalisavedi unana tubumao goi ima magu salau ayoisikavatedokoidi.

¹⁵ E boi yau nava sinagu gamona sinaena Yaubada ina kanuwóiya goi igimikimasabegu be nakae ivayokoigu Yeisu ana totalavaita. Go tutayana ilovina

¹⁶ bei Natuna ikaiwoduwe yau yaigu bego Tauyana Valena atalavaite yaidi, e mainao geya anoita tomota goi bego alumadadedi idi nuwonúwana Valayana manuna.

¹⁷ Aiyuwoina geya atukoita Yerusalema goi bego kidi Yeisu ina vamoleyanayao vakuumgoidi Valayana sivatulukoigu, go sem yau ana Arábiya. Niga go, akaluvilamna ama Damasiko goi akaaiyaka.

¹⁸ Niga tala aito mlidi atuko ana Yerusalema goi avadade. Akaaiyaka tauyana taiyao maliyalina ana badabada yawou ainima.

¹⁹ Go guna kaiyakayana amoko goi Yeisu ina vamoleyanayaoyadi liliudi geya agitedita. Ida Tomoya siyana toina Yemesa anetava agite.

²⁰ Yaubada iyagoida! Ame livalayadi aaginidi moe moitamo; geya apoleta geya!

²¹ Niga Yerusalema akalave go, ana Siriya dadavina be nakae Silisiya dadavina goi akaaiyaka.

²² E tauyadi ana totugugunayao Yudiya dadavina goi maisigu geya sigiteyeta

²³ go, valegu kaka tauna sinooveyamo, kadi, ‘Tauyana boi iyogedegededa go, bogina ame tuta Vala Dedevina itaalavaite. Kita ame Valayana ana tonumisayao boi ipoikikida bego imtulida.’

²⁴ Tuwo valeguyana sinove, yau pasigu Yaubada ina togaga ana sikamoitamoe.