2 Timoti 2 - Buki Kimaasabaina

¹ E natugu, kutaagonēm bei im taiyao pasina Yaubada ina kanuwóiya ikitogagem.

² Boi vatulúkwana tomota badabadaidi matadi goi avatuulukoim, e moe vatulukwanayadi goi tomota kuvatuulukōidi bei itoboinedi ituli ta tomota sivatulukoidi.

Timoti itoboine gedageda goi itogaga

³ Guna mou goi kusiukōigu nakae kom Yeisu ina tovayaviya dedevim itoboinem.

⁴ Geya tayaamo tovayaviya bei asa sinapuna itagone isuveyali, go sem yaviya ina paisewa iguinuwedoko bego ana tolovina ivauyaone. Kom nakae geya tayaamo kaga kuutagōne Guyau Yeisu ina paisewa goi isuveeyalim.

⁵ E tovavalákuna nakae, neta vavalákuna ana lovina geya ikabikaonedita, ana vaiwówana geya ibabaneyeta. Kom nakae kaga liliuna goi Guyau Yeisu kukabiikaōne bego am vaiwówana kubabane.

⁶ Ava tobágula neta ipoisógana, itoboine keuwokumgo igimikabi. Kom nakae kupoisōgana bei am vaiwówana kubabane.

⁷ Ame guna livalayadi manudi kunuwolelēu. Neta nakae kuguuinuwe, ida Tomoya nanamsa kaga liliuna manuna bei ivinim.

⁸ Devida tubuna Yeisu yau ataalavaite.

⁹ Valayana pasina guna mou abaabanedi, e seni goi siyowóigu nakae neta yau tokapipilova tayamo go, geya vatau tayaamo itoboine Yaubada ina livala ana talavaita seni goi iyowo.

¹⁰ Moe pasina mouyadi liliudi yaidi goi amesayágana Yaubada ina kinavayao manudi bego kidi nakae adi yava sibabane. Adi yavayana moe idi spwagógana Guyau Yeisu taiyao pasina Yaubada ana tomoeeyalina vata goi bei sikaaiyaka.

¹¹ Livala ame livala aba numisa: Neta bogina Guyau taiyao takámasa, e nava bei taiyao maa yawoida.

¹² Neta ida mou goi tamesayágana, e nava bei Guyauyana taiyao takalibúbuna. Neta Tauyana talawoiwoiye, e nava bei ilawoiwoiyeda.

¹³ Neta kita geya aba numisa, e Tauyana nava aba numisa. Moitamo. Tauyana geya itoboineyeta toinina ina sinapu ilawoiwoiye.

Timoti itoboine senao yaidi ivilivili Paulo ina vatulúkwana manuna

¹⁴ Moe dogoiyadi tuta liliuna im tomotao yaidi kukavilevilēdi go, Yaubada matana goi kukatuliiwolēdi taabu sikaumaakimāki livala adi yagoina manudi. Livalayadi geya basabasaidimo be nakae totaiyakeka sigoyainedi.

¹⁵ Kupooisōgana bei kuvagitakōim Yaubada yaina nakae kom ina toguinuwa tayamo moitamo. Nakae Yaubada ana kuvatulukwana dōkana, e im guinuwa pasina Tauyana matana goi om bei geya imaemaeta.

¹⁶ E da poyapoya idi vatulúkwana kuvakiilisīdi. Vatulukwanayadi bobwara besobeso baailidi nakae, tauna geya basabasaidimo Yaubada manuna. Neta bobwarayadi tasabokuuliyedi, e Yaubada nuwona takaolilive

¹⁷ be nakae idi bobwarayadi sitagayagaya tomota sigoyainedi nakae potu neta iwokani iwodedede. Koroto adi taiyuwo amo nakae moe Aimeniyo be Pileto.

¹⁸ Tauyadi tonumisa maniyedi idi numisa sikaigoyaidi unana Yaubada ana Nanamsa Mooitamoina goi bogina sisuláiga go, idi sulaigayana goi kadi, ‘Tokámasa idi taoyamna ana tuta bogina isowóduwo.’

¹⁹ Ago Yaubada ina bodao dako kasakasaina nakae bogina sitaoyaakavata. Dakoyana goi gínina ame nakae ikaaiyaka kana, ‘ toinina ina bodao bogina iyaagoidi.’ Aiyuwoina kana, ‘Avatauwa neta Yauwe yaina sisaakululu goyo situgavīle.’

²⁰ E toesaesa ina vada goi noko maniyedi sikaaiyaka go, noko maniyedi alova be vaega nakae sikaaiyaka. Nokoyadi goura be siriba moe aba wowoina ogaoga adi noko. Ago nokoyadi alova be vaega moe aba omayamaya nakae noko besobeso.

²¹ Tauna avatauwa kita neta noko besobeso nakae takimaavadeda, e kita noko dedevida nakae, kimaasabaida be ma basabasaida ida Tomoya yaina be nakae bogina katubaayasida guinuwa dedevidi liliudi manudi.

²² E tubuwau idi yalagau kusiiyaēdi go, kibóbwata, numisa, be tuboina kusokikiinakōidi tomota maa katedi maavadaidi ida Tomoya yaina sisaakululu taiyao.

²³ E aumakimaki besobeso be aumakimaki kudukudupatudi kuvakiilisīdi unana kuyagoi aumakimakiyadi moe vakaleya idi kaba sowóduwo.

²⁴ E kita ida Tomoya ina aumakimaki geya itoboinedeta, go sem itoboine takubunuwa, yoiyada tavatulúkwana, tomota idi goyo yaidi goi tamesayágana,

²⁵ be nakae manukaida ida kaleyayao takitototoidi. Nakona Yaubada bei ivaitedi situgavila, e Yaubada ana Nanamsa Mooitamoina siyagoi

²⁶ be nakae ma nukotodi itoboinedi ina síkwana goi sisiya. Tauyadi boi bogina iyowóidi bego ina nuwonúwana siguuinuwe.