2 Iyoni 1 - Buki Kimaasabaina

Iyoni ina kauyagu

¹ Kom namoya kiinavaim ma natumowo, Yau imi tomoya ami leta ame agini iwo yaimi. Amatakoiyemi nakae Yaubada ana bogina ikaiwoduwe yaida. Go geya kada yau agutava geya, go sem avatauwa neta Nanamsayana bogina siiyagoi nakae simatakooiyemi.

² Moe unana Nanamsa Moitamoinayana nuwoda goi ikaaiyaka nakae yaida bei ikaiyako vata.

³ Yaubada Tamada be Natuna goi takaaiyaka.

Lovina matakoi manuna

⁴ Auyáwana gagaina unana natumowo maniyedi agitebabanedi, Yaubada ana Nanamsa Mooitamoina sisabookuliye nakae ida lovina boi Tamada iivinida.

⁵ Go namoya, ame tuta akawanoiyem lovina tayamo kukabiikaōne. Lovinayana geya kada lovina vau agini geya, go sem moe lovina bogo boi ida numisa ana kaba vatowo goi bogina tanove. Lovinayana ame nakae: Sedao tamatakooiyēdi.

⁶ Go ame matakoi: Yaubada ina lovina takabikaonedi. Ame ina lovinayana nakae boi imi numisa ana kaba vatowo goi bogina konove: Yaubada ana Nanamsa Mooitamoina goi kooketōiya.

⁷ Moitamo. Topola badabadaidi bogina sina asa liliudi poyapoya ana madabokina goi silawooiwoi bego Yeisu imalasakava. Avatau neta amo nakae siibobore, iya moe topolayana, Guyau ana kaleyayana.

⁸ Topolayadi goi ami dodōkana, govila bei kaga nakae bogina tapooisogane itagau. Moeko goi imi poisoganayana ana vaiwówana madabokina geya itagauta, go sem vaiwowanayana bei kobabane.

⁹ Avatauwa neta ina vatulúkwana sikaatusavi nakae vatulukwanayana goi geya sikaiyaketa, e tauyadi Yaubada taiyao geya sispwagogoneta. Go avatauwa neta Guyauyana ina vatulúkwana goi sikaaiyaka, e tauyadi Tamada be Natuna taiyao sispwagógana.

¹⁰ Avatauwa neta siwo yaimi go, moe vatulukwanayana geya sivatulukoneta, e tauyadi imi vada goi taabu kouyaaonēdi be nakae taabu kokaauyāgu yaidi.

¹¹ Moe moitamo. Avatau neta tauyadi yaidi ikaauyagu, idi guinuwa goyogoyoidi bogina isiukoidi.

Iyoni ina vaduduwo

¹² Kaga liliuna sikaaiyaka go, geya latuwogu leta goi alatuwokoimi, go sem aalotuta bego ao yaimi bei komi taiyao tabóbwara. Moe bego taiyao tauyawana dókana.

¹³ Siyam kiinavaina ameko goi natunao idi yabobona yaim. Yau Iyoni