1 Timoti 4 - Buki Kimaasabaina

Paulo ina vatulúkwana Timoti ina sinapu manuna ( 1 Timoti 4:1-16 ) Paulo ina katumátala tovatulukwana polapola manudi

¹ E kina go ’ idi vatulúkwana yaidi goi sikasaledi.

² Vatulukwanayadi tonumisa polapola idi pola goi sima. Ago idi polayadi manudi geya siomaayamaya geya.

³ Tauyadi nai sisanabode be nakae awoinu maniyena sivatabuyedi. Go awoinuyadi kina Yaubada iwodugudi bego kita nuumisaida ana taayagoi liliuda mada kauyagu tauyaonedi.

⁴ Moe unana kaga liliuna Yaubada iwodugudi moe dedevidi. Tauna geya tayaamo kaga vaatabuna kita yaida geya neta mada kauyagu tauyaone.

⁵ Ame moitamo. Dogoiyadi Yaubada ina livala goi be kita ida kawanoi goi bogina ikimasabedi ma basabasaidi. Tauna itoboineda tauyaaonedi.

Paulo ina livala Timoti ina sinapu manuna

⁶ Moe vatulukwanayadi sedao kuvatuulukōidi. Neta nakae, e kom ana tovaita dedevina unana ida numisa ana livala be nakae vatulukwana dókana ana livala bogina kusabokuliyedokoidi. Tauna livalayadi goi balomaim kuuvavani.

⁷ E da poyapoya idi vatuta besobeso geya basabasaidimo Yaubada manuna. E vatutayadi kuvakiilisīdi. E nakae balomaim kwatubayāsi bei im sinapu nakae yábana sinapuna.

⁸ Neta wowoda takatubaayasidi, moe ana dedevina giyaina. Go neta balomaida takatubaayasidi yábana sinapuna manuna, moe ana dedevina gagaina kaga liliuna manuna unana moeko goi yawoida moitamo toina ame tuta be nakae ámasa mlina goi tababane. Tauna balomaim kwatuubayāsi.

⁹ Mae livalayadi livala nakae itoboineda tauyaonedokoidi.

¹⁰ Mae manuna mada salau tapooisógana be taakokoila! Bogina kuyagoi. Taalotuta Yaubada maa yawoina bei iguinuwe nakae idige. Tauyana tomota liliudi adi Toyava. Go moe moitamo toina kita ana tonumisayao manuda.

Timoti ana lovina yawoina manuna

¹¹ Moe vatulukwanayadi tomota kuloviinaēdi be kuvatuulukōidi siguuinuwedi.

¹² Nakona tomota latuwodi sivasobusobuyem unana kom tubuwau go, taabu kutaagonēdi nakae siguuinuwe, go sem im bóbwara, yawoim, im , im numisa be im sinapu maavadaina goi tonumisa yaidi kuvagiitakōim kom numisa ana kaba kinana.

¹³ Imi tugúguna goi mam salau kukaasalēm ana katuyáiva goi, tomota adi liwola goi be nakae adi vatulúkwana goi ana kadókana awokoim.

¹⁴ Boi Baloma Kimaasabaina im kaiguyau ivinim tutayana tomoyamoya nimadi sikailagasidi dabam goi Yaubada ina nuwonúwana kom manum sikabivalevale. E moe aiguyauyana taabu kukaligaagaīye.

¹⁵ Moe sinapuyadi kuguuinuwēdi be nakae yaidi goi toinim kukaasalēm bego tomota liliudi sigitem im numisa goi kubibíbina.

¹⁶ Kumatakavateedokōim be nakae im vatulúkwana kumataakavāte. Moe dogoiyadi kusokikiinakōidi. Neta nakae kuguuinuwedi, e Yaubada kom be am totaiyakekayao taiyao bei iyavemi.