1 Korinta 1 - Buki Kimaasabaina

Paulo ina leta ana kaba vatowo ( 1 Korinta 1:1-9 ) Leta ana togínina be ana tokatuyaivayao

^1-2 Komi Yaubada ana totugugunayao Korinta goi, Yaubada toinina umana bogina ikimasabemi tutayana kospwagógana taiyao. Nakae Yaubada ina duduwo goi komi ina kimasabayao. Yau Paulo, boi tayamo Yaubada ina nuwonúwana goi. E siyada Sositeni taiyao leta ame kaetune iwo komi Korinta goi yaimi be nakae komi liliumi asa liliudi goi neta ida Tomoya Yeisu Guyau yaina kosaakululu. Guyauyana moe komi be nakae kai ida Tomoya.

³ Yaubada Tamada be ida Tomoya Yeisu idi kanuwóiya be idi tuboina bei sivinimi.

Paulo ikauyagu Yaubada ina guinuwa da Korinta yaidi manuna

⁴ Komi manumi akaauyagu Yaubada yaina tuta liliuna ina kanuwóiya liliudi Yeisu goi bogina ivinimi pasidi.

⁵ Anuwoiyayadi moe bóbwara madabokina be nanamsa madabokina. Moe dogoiyadi liliudi dedevidi Yaubada bogina ivakayaodeimi imi Yeisu taiyao pasina.

⁶ Moe ayagoi unana guna talavaita Guyau manuna Yaubada ikamoitamoe yaimi goi.

⁷ Tauna komi Yaubada ina yabobona goi bogina yoiyami; tuta ame goi mami yala ida Tomoya Yeisu Guyau ina sowóduwo kotuuyaosi.

⁸ Aiyuwoina Tauyana bei ikitogagemi, e geya ami pikwanamo ana kadókana tuta ana kaba lukavava goi ina maliyalina bei isowóduwo.

⁹ Bogina kogite? Kina Yaubada . Tauyana bogina iduduweda bego Natuna ida Tomoya Yeisu Guyau taiyao takabivekoveko.

Tonumisa Korinta goi idi livisi manuna ( 1 Korinta 1:10—4:21 ) Paulo latuwona tonumisa sispwagógana

¹⁰ E segowo, ida Tomoya Yeisu yoina goi akatuliwolemi bego liliumi konuwonuwana vavasa be nakae yaimi goi tavilei geya, go sem komi nuwomi tayamo goi kospwagōgana.

¹¹ Moitamo, segowo. Kiloe ina bodao maniyedi bogina sima silatuwokoigu bego komi yaimi goi aumakimaki sikaaiyaka.

¹² E ame adigedige: Bego komi maniyemi kodigo kami, ‘Kai Paulo ina boda.’ Go maniyemi kami, ‘Go kai Apolosi ina boda.’ Go maniyemi kami, ‘Go kai ina boda.’ Go maniyemi kami, ‘Go kai ina boda.’

¹³ Manakae? Maniyemi amitava ? Geya!

¹⁴ Kirisipo be Gaiyo taudiva asayoyoidi go, magu kauyagu Yaubada yaina bego geya kada tayaamo komi yaimi goi asayoyoi geya,

¹⁵ govila bei komi kodigo kami, ‘Paulo yoina goi isayoyoima.’

¹⁶ Ego tuwaina Stepana mana bodayauwo nakae asayoyoidi go, geya ayagoiyeta nakona tomota tuwaina asayoyoidi gea geya.

¹⁷ ana talavaita manuna ietunegu. Ago guna talavaitayana manuna yau geya bóbwara ana tonanamsa adi tokatanaki geya, govila bei guna bóbwara pasina sinumisa go, Guyau ina kámasa kerose goi ina togaga geya siyagoiyeta!

Guyau goi Yaubada ina nanamsa be ina togaga tagitedi

¹⁸ Guna livalayana moe moitamo. Bóbwara adi nanamsa be Yeisu ina kámasa kerose goi valena geya itoboinedita situyuwo. Gwa. Keroseyana valena kidi vailai ana kenao goi siiketoiya sinove, sinuwonúwana bego valayana geya ana yagoinamo go, kita yava ana kenao goi taaketoiya tanove, valayana moe Yaubada ina togaga ada yava manuna.

¹⁹ Guna livalayana ikamoitamoe. Gininayana goi Yaubada ina togaga bogina idige kana, ‘Da poyapoya adi tonanamsayao idi nanamsa bei abugoyaidi. Moe tauyadi dabadi kaakapudi adi kabitam bei akigawuwulidi.’ Aiseya 29:14

²⁰ Bogina kogite? Kidi tonanamsa idi nanamsa kaga? Dogoi besobeso. Kidi Yaubada ina Katukeda ana tovatulukwanayao idi nanamsa kaga? Dogoi besobeso. Kidi bóbwara ana tokatanaki idi nanamsa kaga? Dogoi besobeso. Kidi da poyapoya idi nanamsayana Yaubada bogina ivatulukoida bego moe geya ana yagoinamo ae?

²¹ Ame moitamo. Yaubada mana nanamsa gagaina ina nuwonúwana iguinuwe, e da poyapoya geya itoboinedita toinidi idi nanamsa goi Yaubada siyagoi, tauna yaidi goi kerose valena ana taiyakeka geya ana yagoinamo. Go Yaubada mana uyáwana ilovina bego valayana kataalavaite goi kita ana tonumisayao iyaveda.

²² Kidi go latuwodi bóbwara ana tokatanaki ina nanamsa sinove bei valayana sikamoitamoe.

²³ E kai sem tupaatukoina kataalavaite. Tauna kidi Diyuuyadi vala sinove go, sikalagiwole. Kidi go Totuyoyowoyadi vala sinove go, kadi, ‘Geya ana yagoinamo.’

²⁴ Kita go nuumisaida, nakona Diyuu o nakona Totuyoyowo, Yaubada bogina iduduweda, e vala tanove, tayagoi moe Yaubada ina togaga be nakae ina nanamsa.

²⁵ Ame moitamo. Kidi Totuyoyowoyadi yaidi Yaubada ina guinuwa kerose goi pasina ana kaigigita geya ana yagoinamo go, moe nanamsa gagaina nakae tomota idi nanamsa gagaina ikalisavedi. Nakae Yaubada ina guinuwayana ana kaigigita geya ana togagamo go, Tauyana ina guinuwa giyaiina moe tomota idi guinuwa toogagaidi itogagasavedi.

²⁶ Guna nuwonúwana ataligei. Konuwonūwana, segowo, ame manuna: Yaubada ina duduwo yaimi manuna, ami taivina poyapoya ana tonanamsa? Ami taivina toolagaimi? Ami taivina maa yoimi? Yaimi goi tomota amo nakae geya kobadebadeta ae?

²⁷ Go sem avatauwa neta kidi da poyapoya sivayokoidi kidi kudukudupatu, e amo tauyadi Yaubada ikinavedi. Moe bego avatauwa neta toinidi idi nuwonúwana goi bego tonanamsayao, e Yaubada igieomaemaedi. Avatauwa neta toosobudi, e Yaubada ikinavedi bei kidi toinidi idi nuwonúwana goi bego toolagaidi, e igieomaemaedi.

²⁸ Avatauwa neta youtagau o aba kaoliliwo, tauyadi nakona geya toina, e Yaubada ikinavedi bego tomota liliudi da poyapoya neta sinuwonúwana bego kidi gagaidi, e ivasobusobuyedi dogoi besobeso.

²⁹ Moe nakae iguuinuwe bei geya vatau tayaamo itoboine Yaubada matana goi toinina manuna iuyawana gagágasa kana, ‘Yaubada ikinavegu unana yau maa yoigu.’

³⁰ E Yaubada ina guinuwa pasina kita Yeisu taiyao taspwagógana. Guyauyana ada nanamsa Yaubada goi ima. Tauna kita nuwona ana tokibobwatayao, ina kimasabayao be nakae taatetaida.

³¹ Moe bego kita ida guinuwa nakae Gínina Kimaasabaina idige kana, ‘Avatau neta iuyawana gagágasa, anetava manuna iuyawana gagāgasa.’ Yeremaya 9:24