1 Iyoni 1 - Buki Kimaasabaina

Yeisu livala yawoida vata manuna

¹ Tauyana aba vatowo goi go, ima ame tuta ikaaiyaka bogina kanove be kagite. Toinima matama toina goi kagite be nakae nimama goi kabisikone. Tauyana moe , Yaubada ina Livala yawoida vata manuna.

² Livalayana Yaubada ikaiwoduwe, e matama goi bogina kagite, kakamooitamoe be nakae yaimi kataalavaite bego Tauyana yawoida vata unana. Mainao Tamana taiyao sikaaiyaka go, bogina ikaiwoduwe yaima.

³ Kaga bogina kagite be kanove yaimi kataalavaite bego komi nakae kokabivekoveko kai taiyao. Go kai ima kabivekovekoyana moe Tamada be Natuna taiyao.

⁴ Ame livalayadi kaginidi bego kita tauyawana dókana.

Yaubada moe mavada

⁵ Livala ame Tauyana ilatuuwokoima kanove, e kataalavaite yaimi. Livalayana ame nakae: Yaubada moe mavada go, geya kada giyaiina mamaníwana Tauyana sinaena geya, geya toina.

⁶ Neta tadigo kada, ‘Yaubada taiyao takabivekoveko’ go, nava mamaníwana goi takaaiyaka, e kita tapola be nakae Yaubada ana geya taguinuweyeta.

⁷ Neta kita mavada goi taaketoiya nakae Yaubada mavada goi ikaaiyaka, e kita taiyao takabivekoveko be nakae Natuna Yeisu ikaikaina goi ida goyoinao madabokidi bolotodi yaidi isayoyoida.

⁸ Neta tadigo kada, ‘Kita geya ida goyomo’, e toinida takatuubauda be nakae Yaubada ana Nanamsa Mooitamoina yaida goi geya ikaiyaketa.

⁹ Neta ida goyo tatalaseeyanedi Yaubada yaina, e Tauyana be tokivavasa tauna ida goyo inuwotaoidi nakae ida guinuwa goyogoyoidi madabokidi bolotodi yaidi goi inikida.

¹⁰ Neta tadigo kada, ‘Geya kada tayaamo tuta tagoyo geya’, e amo bobwarayadi goi Yaubada tavayoko topola unana Tauyana kana, ‘Tomota liliudi goyo siguuinuwe.’ Tauna ina livala sinaeda goi geya ikaiyaketa.