Levítico 16 - Wanano OT Portions

Yawe to ya tahtiapʉre to yahu quihõri dacho sahsero Aarõ to sãahtore yahuha Moisere

² Ã yoa Yawe Moisere õ sehe niha: —Mʉ wahmi Aarõre õ sehe ni yʉhʉre yahubasaga: Yʉ yahu quihõeraa dachorire yʉ ya tahtiapʉre yʉhdʉ sãaeno tjijaro tiro. Yʉhʉ sehe tí tahtiapʉ jiri caro, yʉ mʉsare dutiare yʉ joa õa pjĩnine mʉsa wihbori caro cahapʉ jija. Tí carore bihari pjĩ bui jiri me curuapʉ jija yʉhʉ. Tói yʉ jichʉ, tí tahtia sehe ñaa marieni tahtia waro jira. Ã jiro yʉ yahu quihõeraa dachorire sãaeno tjijaro tiro. To mʉ sʉro sãano pinihta, yariaa waharohca.

³ Ã jiro Aarõ sehe “Yʉhʉpʉ yariari” nino, yʉ yahu quihõri dacho dihtare sãa mʉjajaro. To sãahto pano õ sehe yoa mʉjajaro tiro: wachʉ wihã curerirore, tuhsʉ, oveja mʉnore naa mʉjajaro tiro. Cohamacʉ mehne to buhiri tiare boa sinino taro, to wajã, jʉ̃ wa mʉohtina cjihti jijaro tina. Ahrire Aarõpʉre yʉhʉre yahu turiabasaga —niha Yawe Moisere. *****

¹⁵ Ã yoa Yawe Moisere õ sehe ni namoha: —Ahri cʉ̃hʉre Aarõpʉre yʉhʉre yahu turiabasaga. Tiro cabra sehe, masa yʉhʉ mehne ti buhiri tiare to boa sinibasaro tachʉ, to wajã, jʉ̃ wa mʉohtiro cjihto jijaro. Ã yoa to di cʉ̃hʉ yʉ ya tahtiapʉ na sãa, yʉ mʉsare dutiare yʉ joa õa pjĩnine mʉsa wihbori carore bihari pjĩ buipʉ to wajã site sihõhti cʉ̃hʉ jijaro. Tuhsʉ, tí carore to ñʉroca õri pahrẽ cʉ̃hʉre to wajã site sihõhti cʉ̃hʉ jijaro. Wachʉ di mehne to yoariro cjiro seheta yoajaro cabra di mehne cʉ̃hʉre. Ahri cʉ̃hʉre Aarõpʉre yahu turiabasaga yʉhʉre —ni yahu namoha Yawe Moisere.