Levítico 1 - Wanano OT Portions

¹ Ã yoa Yawe to ya wʉhʉ puhichapʉ jiro, Moisere õ sehe ni yahuroca wioha:

² —Mʉ coyea, israe masare õ sehe ni yahuga. Diro wahiquinare wajã, jʉ̃ wa mʉo, yʉhʉre ño payoro taro, wachʉa, cabraa, ã jichʉ ovejaa wahiquina mʉa, nuina barore cʉ̃iroreta bese, wajã, jʉ̃ wa mʉojaro yʉhʉre.

³ ‘Ã yoa diro wachʉre wajã, pjarirore jʉ̃ wa mʉo duariro baro, to pjacʉre ne soro jia baro marierirore na tajaro. Pari turi yʉhʉ mehne to noahto sehe, tiro masʉno, to wachʉre yʉ ya wʉhʉ sãari sopaca cahai naa wahcãjaro. Tói Aarõ panamana ji turia dijaina, yʉhʉre dahra cohtaina to wachʉre ñahabasaahca yʉhʉre jʉna.

⁴ Baharo, wahiquiro pʉro sehe to wahiquiro dapu bui to wamomacare duhu payojaro. To duhu payori baharo, masʉno, yʉhʉ mehne buhiri ti, to yariaboro sehere, wahiquiro sehe cohtota, yariabasarohca. Tiro wahiquiro masʉno ya buhiri yariachʉ, yʉhʉ masʉno sehere buhiri dahresi.

⁵ Tiro sehe yʉ ya wʉhʉ potoi to basi wahiquirore wajãjaro. To wajãri baharo jʉna, yʉhʉre dahra cohtaina sehe wahiquiro dire na, ti wahiquina wajãinare ti jʉ̃ wa mʉori caropʉ, tí dire wajã site sihõjaro pititia bʉhʉseheripʉreta —ni yahuroca wioha Yawe Moisere.