Jueces 2 - Wanano OT Portions

Ahri quiti Josué to yariari quiti jira

⁶ Ã yoa Josué israe masare to tju wa, waa dihtaripʉ ji dutiro warocaha jʉna. To warocachʉ, tina cãa curuari ti ya dihtari cjihtire pʉ ti, jia tiha.

^7-9 Ã yoa tiro Josué Nũ macʉno, Yawere dahra cohtariro sehe jipihtina israe masare Yawe dihtare sʉho wacũ tua, sʉho ño payo mʉhtaa tiha. Ã yoa tiro ciento diez cʉhmari cjʉaro waro, yariaa wahaa tiha jʉna. To yariachʉ ñʉa, to coyea cjiri sehe to pjacʉ cjirore to ya dʉhteroihta yaa tiha. Tí dʉhtero sehe tʉ̃ yucʉri payʉri yahpa, Efraĩ wama tiri yahpai tjuaa tiha. Ã jia tiro cjiro coyea sehe to pjacʉ cjirore tʉ̃cʉ Gaas wama tidʉ cahacãi yaa tiha, Timna Sera wama tiri macai. Ã yoa Josué cjiro to yariari baharo cʉ̃hʉre, to doca macaina pʉhtoa cʉ̃hʉ israe masare noano sʉho ji mʉhtaa tiha. Tina cʉ̃hʉ Yawe to tuaa tia mehne ti ya curuare to yoadohochʉ ñʉrina jia tiha. Ã jia tina cʉ̃hʉ ti catisinino puro israe masare Yawe dihtare sʉho ño payo, sʉho ji mʉhtaa tiha.

Israe masa Yawere ño payo duhu, paina cohamana sehere ño payo dʉcaa tiha

¹⁰ Payʉ cʉhmari baharo, jipihtina Josué cjiro ya tjuru macaina, Yawere noano wacũ tuarina cjiri yaria pihtia wahaha. Ti yaria pihtiri baharo, ti panamana sahsero tjuaha jʉna. Tina sehe ti ñʉchʉsʉma cjiripʉre Yawe to noaa yoarire ñʉeraina jia tiha. Ã jia Yawe ti Cohamacʉ waro sehere cua pisaro mehne ño payoera tiha tina.

^11-13 Ã ño payoeraa, Yawe to ñʉchʉ, israe masa ñaa dihtare yoaina wahaha. Paye masa curuari, ti jiro cahacãi jiina sehe ti dahrea masʉrine “Ahrina cohamana jira” ni, ño payoa tiha. Ti dahrea masʉri sehe Baal wama tiriro masʉri, ã jichʉ Asatarote wama tiricoro masʉri jia tiha. Tí masʉrine ti ño payochʉ ñʉa, israe masa cʉ̃hʉ tinare ñʉ cũ, tina cʉ̃hʉ tí masʉrine ño payo dʉcaa tiha. Tí masʉrine ño payoa, Yawe ti ñʉchʉsʉma cjiri ti Cohamacʉ, Egiptopʉ jiinare na wioriro sehere ño payoera tiha jʉna. Ti ã ño payoerachʉ ñʉno, Yawe sehe tina mehne tuaro suaha.

¹⁴ Ã suaro, tinare ñʉ tuhtiina, ti ya yahpa cahacãi jiinare israe masare yʉhdʉrʉca sãa tachʉ yoa, cahma wajã yʉhdʉrʉcachʉ yoaa tiha. Tuhsʉ, dohse jia ti cjʉaare noano ma wahcã pahñochʉ yoaa tiha tinare. Ã yoaro, israe masa sehere ne cahma wajã tuaeraina wahachʉ yoaa tiha.

¹⁵ Ti cahma wajãa wahaa taharipe Yawe to basita tinare ã ñano wahachʉ yoaro nia tiha. Tiro Yawe sehe to masa curuare cua pisaro mehne yahu cũ tuhsʉa tiha. Õ sehe ni yahu cũa tiha tiro tinare: “Yʉ mʉsare cũri dutiare yʉhdʉrʉcaro marieno mʉsa jia tirucuchʉ, noano wahachʉ yoaihtja mʉsare. Yʉ cũri dutiare mʉsa yʉhdʉrʉcachʉ pinihtare ñano mʉsare buhiri dahreihtja” ni, yahu cũ tuhsʉa tiha Yawe to masa curuare. Ã jiro israe masa ti yʉhdʉrʉcachʉ, tó panopʉ to niriro cjiro seheta tinare buhiri dahrero nia tiha tiro. To ã ñano buhiri dahrechʉ ñʉa, tina sehe “¿Dohse yoanahcari mari?” ni, ñano tʉhotua tiha.

¹⁶ Ti ã ñano tʉhotuchʉ ñʉno, Yawe sehe ti pʉhtoro cjihto, tinare sʉho wacũ tua, sʉho wajahtiro cjihtore bese, sõbasaa tiha. Tiro to pʉhtoro sõriro sehe tinare maa tainare, ã yoa tina mehne cahma wajãa taina cʉ̃hʉre to masa mehne cahma wajã yʉhdʉrʉcanocaa tiha.

¹⁷ Tuhsʉ, to masare “Yawe dihtare wacũ tua, ño payojihna mari” ni, yahua timaha tiro. To ã ni yahu mʉjapachʉta, tina sehe tirore yʉhdʉrʉca mʉjaa tiha. Ã yʉhdʉrʉcaa, paina cohamana sehere ño payo mʉjaa tiha tina. Ti ñʉchʉno Josué cjiro ya tjuru macaina cjiri sehe Yawe to dutiro seheta yoaina jia tiha. Ã yoa tina cjiri panamana sehe ti ñʉchʉsʉma cjiri ti jia tiriro sehe jia tiera tiha jʉna. Tina sehe dói waro Cohamacʉre yʉhdʉrʉca mʉjaina jia tiha.

^18-19 Ã yoa tinare ji turia dija taa tjururi macaina cʉ̃hʉ sie sehe mehne sie sehe mehne Cohamacʉ ti ño payoboriro waro sehere ño payo duhu wahcãrucua nia tiha. Ã jia tuaro waro Yawere yʉhdʉrʉcaina wahaa nia tiha jʉna. Ti ã yʉhdʉrʉcaina jichʉ ñʉno, Yawe sehe tó pano macaa tjururi macainare to buhiri dahreriro cjiro seheta buhiri dahre mʉjaa tiha tina cʉ̃hʉre. Ã jiro tina cʉ̃hʉre tinare ñʉ tuhtiina cahma wajã yʉhdʉrʉca sãa tachʉ yoa, tinare ñano dutipechʉ yoa, buhiri dahre mʉjaa tiha tinare. Ti ã ñano dutipechʉ, israe masa ñano yʉhdʉa tiha. Ti ã ñano yʉhdʉchʉ ñʉ, pja ñʉno, Yawe sehe ti pʉhtoro cjihtore bese, sõbasaa tiha tina cʉ̃hʉre. Ã sõno, tiro mehne tinare noano yoadoho mʉjaa tiha. To ã yoadohochʉ, tiro pʉhtoro sehe to catisinino puro to masa mehne tinare ñʉ tuhtiinare sʉho cahma wajã yʉhdʉrʉca mʉjaa tiha. To yariari baharo, pa tjuru macaina cʉ̃hʉ pari turi mʉnanota “Cohamana jira” ni, ti ño payoa masʉrine ño payo mʉjaa tiha tjoa. Ã ño payoa, tó pano macaa tjururi macaina cjiri ti yʉhdʉrʉcaro bui tuaro yʉhdʉrʉcaa nia tiha tina. Tina cʉ̃hʉ ti ñano jia tiare ne duhuera tiha.

²⁰ Ti ã ñano jia tichʉ ñʉ, suaro, Yawe sehe õ sehe niha: —Ti ñʉchʉsʉma cjiripʉre yʉhʉ õ sehe nia tihi: “Yʉ ya curua macaina jira mʉsa. Ã jina jipihtia yʉ dutiare noano yʉhti mʉjaga mʉsa” nia tihi yʉhʉ tina cjirire. Yʉ ã nirire ahrina sehe tuaputiaro yʉhdʉrʉcaa nina jʉna.

²¹ Ti yʉhdʉrʉcari buhiri Canaã yahpai ji mʉhtaa curuarire, Josué cjiro cohã wioeraparota, to yaria mʉ cõa curuarire ne cʉ̃ curuare cohã wiosinisi.

²² Pa tehe nia tí curuari mehne ti basi ñano jia tia, yʉhʉ sehere tuaro macaboca, Josué cjiro ya tjuru macaina yʉhʉre ti macariro cjiro seheta —niha Yawe.

²³ Ã nino, tí curuarire dói waro cohã wioerasinia tiha.