Josué 23 - Wanano OT Portions

Josué bʉcʉro quiro waro jia tiha. Ã jiro to coyeare to masichʉ cahmaare tinare yahu batoaha

¹ Ã yoa Canaã yahpapʉre israe masare ñʉ tuhtiina cjiri, payʉ curuari macaina tí yahpapʉta jisinia tiha. Ã jipachʉ, tinare israe masa mehne cahma wajãno marieno noano jinocachʉ yoaa tiha Yawe. Ã yoa payʉ cʉhmari baharo, Josué sehe bʉcʉro waro jia tiha.

² Ã jiro tiro cʉ̃ nʉmʉ jipihtina israe masa curuare, ã jichʉ ti pʉhtoa tinare ji mʉhtaina cʉ̃hʉre pji cahmachuha. Ti cahmachu pihtiri baharo, õ sehe ni yahuha tiro tinare: —Coyea, mipʉre yʉhʉ bʉcʉro jija.....

¹⁴ Ã jicʉ wacũeni pja mʉsare mʉ cõ yariaa wahaboca yʉhʉ. Ã jicʉ mʉsare ahrire yahu batoa duaja. Yawe, mari Cohamacʉ marine payʉ noaa to ni cũri cjirire tí jipihtiare ne cʉ̃no dʉhsaro baro marieno to niriro cjiro seheta quihõno yoa, sohtori tira tiro marine. Tiro ne cʉ̃ taha marine mahñoerare. Tíre noano masina mʉsa.

^15-16 Ãta yoare Yawe, mari Cohamacʉ marine. Wiho mejeta marine ã noano yoariro cjiro to jipachʉ, mʉsa tirore cahmaera, paina wiho jiina cohamana sehere bese, tina potoi na tuhcua caha sʉ, mʉsa ño payona, cua pisaro mehne “Mʉ dutiare yoa pahñonahtja sã” ni, tiro mehne mʉsa durucu cahnori cjirire yʉhdʉrʉcana ninahca mʉsa. Ã jiro tiro potocãta mʉsa mehne sua, mʉsare buhiri dahrerohca. Ã buhiri dahrero, tiro mʉsare ahri yahpai noari yahpai to cũmarinare cohãroca wionocanohca mʉsare —ni, to coyeare yahu batoa tiha Josué cjiro.