Josué 1 - Wanano OT Portions

Moise yariari baharo, Josué sehere israe masare Canaã yahpapʉ sʉho mʉ tã sãa dutiha Yawe

¹ Ã yoa Yawere dahra cohtariro Moise cjiro to yariari baharo, tiro cjirore yoadohoriro Nũ macʉno Josuére õ sehe niha Yawe:

² —Yʉhʉre dahra cohtariro cjiro yariaa wahahre. Ã jicʉ mipʉre mʉhʉ sehe to cohtotaro jipihtina israe masare Jordão mare sʉho pahãga. Tí ma pa bʉhʉsehe cjoapʉ sʉho pahã sʉ, mʉsare yʉ wahti yahpa Canaã yahpapʉ tinare mʉ tã sãaga.

³ Mʉ tã sãa, tí yahpai jiina mehne noho ti jiroi cahma wajã wahcãrucuna wahaga. Mʉsa cahma wajã wahcãrucuna wahachʉ, yʉhʉ sehe Moise cjirore yʉ ni cũriro cjiro seheta mʉsa sehere tinare cahma wajã yʉhdʉrʉcachʉ yoaihtja. Ã cahma wajã yʉhdʉrʉcachʉ yoai, ti jia yahpari cjirire mʉsa sehere pʉ ti wahcãrucuchʉ yoaihtja. Yʉ ã yoachʉ, mʉsa sehe tí yahpa Canaã yahpa jipihtiri yahpare pʉ tinahca jʉna.

⁴ ‘Pjiri yahpa jirohca mʉsa ya yahpa cjihto. Sʉ̃ mʉja taro caha sehere hitita masa ya yahpa yʉhdʉroi Éufrate wama tiri ma dʉhtʉ cahapʉ ji batoarohca. Sʉ̃ sãano caha sehere pjiri ma Mediterráneo wama tiri ma dʉhtʉ cahapʉ ji batoarohca. Ã yoa pari taño cõ bʉhʉsehe sehere wʉari dʉjʉropʉ ji batoarohca. Ã yoa pari taño poto bʉhʉsehe sehere tʉ̃ yucʉri payʉri yahpa, Líbano wama tiri yahpa ji dʉcaropʉ ji batoarohca mʉsa ya yahpa cjihto.

⁵ ‘Ã yoa yʉhʉ sehe mʉ catisinino puro mʉhʉre ã piti tirucuihtja. Moise cjirore yʉ piti tiriro cjiro seheta mʉhʉ cʉ̃hʉre ã piti tirucuihtja. Ne di pja mʉhʉre cohã wahcãsi. Yʉ mʉhʉre ã piti tirucuchʉ, ne cʉ̃iro mʉhʉre cahma wajã yʉhdʉrʉcasi.

⁶ ‘Ã yoa mʉsa ñʉchʉsʉma cjiripʉre yʉhʉ sehe cua pisaro mehne õ sehe ni cũa tihi: “Canaã yahpare mʉsa panamana, mʉsare ji turiainapʉre waihtja” ni, yahu cũ tuhsʉa tihi yʉhʉ tina cjirire. Ã jicʉ mʉhʉ sehe noano wacũ tuariro jirucuga. Tí yahpare mʉsa mari baharo, mʉhʉta jiihca tí dihtare tju wa, mʉ coyeare ti jihti dihtarire witihtiro.

^7-8 Ã jicʉ noano wacũ tuariro jirucuga mʉhʉ. Yʉhʉre dahra cohtariro Moise cjiro mehne yʉ cũri dutiare dachoripe mʉ basi ni ño, tíre ã buherucuga. Tíre ã buherucui, tíre yʉhdʉrʉcaro marieno noano jia tirucuga mʉhʉ. Mʉ ã noano jia tirucuchʉ, noho mʉ waharoi mʉhʉre noano waharohca.

⁹ Ã yoa yʉhʉ Yawe mʉ Cohamacʉ cʉ̃hʉ noho mʉ waharoi mʉhʉ mehne ã jirucuihtja. Ã jicʉ yʉ niriro seheta noano wacũ tuariro jirucuga mʉhʉ. Ne cuii tjiga. Tuhsʉ, ne ji coa pihti, cahyariro jii tjiga —ni bosaha Yawe Josuére.

Jordão mare israe masa ti pahãhto pano tinare cahnoyu dutiha Josué

¹⁰ Ã yoa Josué sehe to doca macaina pʉhtoare õ sehe niha:

¹¹ —Tia dacho baharo, Jordão mare pahãna tana nija mari. Tí mare pahã sʉ, Yawe mari Cohamacʉ marine to wahti yahpare mana wahana tana nija mari. Ã jina mʉsa sehe mari carĩni cuhtupʉ waha, mari coyeare yahuna wahaga, tópʉ wahaa, ti chʉhti cjihtire ti macayuhto sehe —niha Josué to doca macaina pʉhtoare.