Joná 3 - Wanano OT Portions

Joná Cohamacʉ to yahu dutirire Nínivepʉ yahuro sʉha

¹ Ã yoa Yawe Jonáre pari turi õ sehe niha tjoa:

² —Pjiri maca, Nínive wama tiri macapʉ waha, tópʉ macainare yʉ mʉhʉre yahu dutirire cjero yahui wahaga —niha tjoa.

³ To ã nichʉ tʉhoro, Joná sehe tí maca, Nínivepʉ wahaa wahaha, Yawe to dutiro seheta. Tí maca Nínive sehe pjiri maca jiha. Tí macare dahporo mehne tini sito tachʉ, tia dacho posa jiha.

⁴ Ã yoa Joná sehe jʉna tí macapʉ sʉ, cʉ̃ dacho noano Cohamacʉ tó macainare to yahu dutirire yahu site tiniha jʉna. Õ sehe ni yahu site tiniha tiro: —Mʉsa õ macaina jipihti Cohamacʉ Yawe to ñʉchʉ, tiro mehne bʉjʉa buhiri tia dihta yoana niyuhca mʉsa. Tí buhiri, tiro mʉsa jipihtinare buhiri dahrero taro niyuhca. Mʉsare to buhiri dahrehto sehe cuarenta dachorita dʉhsayuhca —ni yahu site tiniha tiro tó macainare.

⁵ Ã yoa Joná to ã ni yahu sitechʉ tʉhoina sehe ti basi õ sehe ni durucuha: —Potocã tjica. Cohamacʉ mehne buhiri tiinata jica mari. Ã jiro ahriro mehne Cohamacʉ marine quihõnota yahuro nica —ni durucuha tina ti basi. Ã niata, ti basi õ sehe ni durucu cahnoha tina: —Cohamacʉ mehne mari buhiri tiare cahyaro cahmana marine. Ã jina mahaa dachori chʉ duhusinijihna mari. Dohse jia sihnia cʉ̃hʉre sihni duhusinijihna. Tuhsʉ, cahyana, mari sãasoa suhti cʉ̃hʉre sãajihna mari —ni ti basi durucu cahnoha tina. Ã ni durucu cahnoa, ti durucu cahnoriro cjiro seheta yoaha tina. Pache pʉa, pache pʉa jieraina cʉ̃hʉ tina jipihti cahyaa, ti sãa suhtire sãaha.

⁶ Ã yoa Nínive macariro pʉhtoro cʉ̃hʉ Joná to na sʉa quitire tʉhoha. Ã tʉhorota, pʉhtoro jiro to dujiroi dujimariro wahcãrʉcʉ sʉ, pʉhtoro jiro to sãari suhtirore tjuweha. Tjuwe, cahyaro, to sãasori suhtiro sehere cohtota sãaha tiro cʉ̃hʉ. Sãa tuhsʉ, to wʉhʉre wijaa, pichaca nujano cjiropʉ nuju sʉha tiro. Tó sehe yoaro, to cahyaare ñono niha.

^7-8 Tuhsʉ, tí maca macaina jipihtinare õ sehe ni quiti wa siterocaha tiro: —Yʉhʉ mʉsa pʉhtoro jija. Ã jicʉ yʉhʉ, yʉ doca macaina pʉhtoa mehne õ sehe ni durucu cahnohi: “Mʉsa jipihti ahri maca macaina mʉsa pohna mehne maha dachori chʉ duhusiniga. Tuhsʉ, dohse jia sihnia cʉ̃hʉre sihni duhusiniga. Ã yoa mʉsa jipihti cahyana, mʉsa sãasoa suhti sehere sãasiniga. Ã yoa mʉsa wahiquina cʉ̃hʉre chʉa, sihnia wasiniena tjiga. Tuhsʉ, tina cʉ̃hʉre mʉsa cahyana, mʉsa sãasoa suhti baroreta waja sãaga. Ã yoa payʉ ñaa mʉsa yoaa tia cjʉara mʉsa. Tí cʉ̃hʉre tó purota duhuga mʉsa. Tuhsʉ, Cohamacʉre tuaro siniga mʉsa.

⁹ Mari ã yoachʉ ñʉno, tiro pa tehe nino mari mehne sua duhuboca. Ã sua duhuro, tiro marine pja ñʉ, wajãeraboca” ni, durucu cahnohi yʉhʉ yʉ doca macaina pʉhtoa mehne. Ã jina yʉ dutiro seheta yoaga mʉsa —ni tí maca macainare quiti wa siterocaha ti pʉhtoro. Ã yoa tí maca macaina sehe ti pʉhtoro to warocaa quitire tʉho sahsea wahaha. Ã jia tina jipihti ti pʉhtoro tinare to dutiro seheta yoaha.

¹⁰ Ã yoa jipihti Nínive macaina, ti pʉhtoro to dutiro seheta ti yoachʉ ñʉno, Cohamacʉ sehe tinare “Wajã pahñonocaihtja” nimariro cjiro wajãeraha jʉna.