Joná 2 - Wanano OT Portions

Joná wahi pjiriro pjaropʉ sãaparota, Cohamacʉ mehne sʉhʉduha

¹ Ã yoa Joná wahi wʉrʉ to chʉ sãari wajurupʉ sãano, to Cohamacʉ Yawere õ sehe niha:

^2-7 —Yʉ Cohamacʉ Yawe, mʉhʉ sehe dohoria macainare cʉãri ma wʉrʉpʉ yʉhʉre doca ñonoca dutihre. Mʉ dutiro mehne yʉhʉre ti ã doca ñori baharo, ñano yʉhdʉhi yʉhʉ. Ahri ma wʉrʉre ne dohse yoa yʉhdʉ witi masierahi yʉhʉ. Diapʉ yʉ pahsachʉ, bʉjʉa pahcõri wʉri yʉhʉre doca wahã sʉ mʉjahre. Yʉhʉre ã waharo wato, yʉhʉ sehe õ sehe ni tʉhotumahi: “Yʉhʉ Yawe mehne buhiri ti tuhsʉhti. Ã jiro tiro yʉhʉre ñʉ payoerara. To ã ñʉ payoerachʉ, yariaa wahai tai nica yʉhʉ. Ã yariacʉ, Cohamacʉ buhiri marieriro to ya wʉhʉ, Jerusalẽpʉ macari wʉhʉre ne pari turi ñʉsi” ni, tʉhotumahi. Ã yoa wahya yʉhdʉa waha, diha minia wahai yʉhʉ jʉna. Diha minia, dia topapʉ macaa tʉ̃ yucʉri dahpotopʉ diha caha sʉhi. Yʉ ã diha caha sʉchʉ, dia topapʉ macaa tja sehe yʉ dapupʉ suhriahre. Ã cʉãnopʉ jicʉ, õ sehe ni tʉhotumahi yʉhʉ: “Mipʉ pinihta yʉhʉre tó puro tjica. Yʉ yʉhdʉ witiboro mariahna. Yajeripohna duhua wahai taipʉ nica yʉhʉ” ni, tʉhotumahi. Ã ni tʉhotuihta, mʉhʉ cʉ̃hʉre wacũ batoahi yʉhʉ. Ã jicʉ sañurucuro mehne mʉ yoadohoa sini batoahi yʉhʉ. Yʉ ã sini batoachʉ, yʉ mʉhʉre siniri sehe mʉ cahapʉ sʉ mʉano yoaro sehe wahari jire, mʉhʉ buhiri marieriro ya wʉhʉpʉ mʉ jiro wato. Ã jicʉ mʉhʉ Yawe yʉ Cohamacʉ sehe yʉhʉre yʉ mini yariaborore yʉhdoi tai, wacũenoca ahriro wahi wʉrʉ yʉhʉre chʉnocachʉ yoahre.

^8-9 Ã jicʉ mipʉre yʉ catisinino puro wahchea mehne mʉhʉre ã basa payorucuihtja. Tuhsʉ, wahiquirore wajã, jʉ̃ wa mʉo, mʉhʉre ã ño payorucuihtja. Ã yoa “Noho mʉ yʉhʉre warocaroi, wahaihca” ni tuhsʉhi yʉhʉ mʉhʉre cua pisaro mehne. Ã jicʉ yʉ niriro cjiro seheta yoa, sohtori tiihtja. Ã yoa mʉhʉ sahsero potocãta masare yʉhdoriro mʉ jia cʉ̃hʉre masija yʉhʉ. Wiho mejeta paina sehe wiho jia masʉrine “Mari cohamana jira” ni ño payomana. Tina pinihta mʉ ã cahĩrucuriro mʉ jia tiare ne di pja masisi —niha Joná Yawere, wahi pjaropʉ to sãano wato.

¹⁰ To ã ni tuhsʉri baharo, Yawe sehe wahi pjiriro wʉrʉre tirore cho wio dutiha. To ã cho wio dutichʉ, wahi wʉrʉ sehe dia pjiri ma dʉhtʉ cahapʉ nʉjaa, tirore cho wio cũnocaha jʉna.