Joná 1 - Wanano OT Portions

Joná Yawere to yʉhdʉrʉcari buhiri, tirore buhiri dahreha

¹ Tí pjapʉre Amitai macʉno Joná wama tiriro Cohamacʉ yare yahu mʉhtariro jia tiha. Cʉ̃ nʉmʉ tirore õ sehe nia timaha Yawe:

² —Joná, cʉ̃ maca, pjiri maca, Nínive wama tiri macapʉ cjero wahaga. Tí macapʉ sʉcʉ, tó macainare yʉhʉre õ sehe ni yahubasaga: “Cohamacʉ Yawe to ñʉchʉ, tiro mehne bʉjʉa buhiri tia macaa yoana niyuhca mʉsa. Tí buhiri tiro mʉsare buhiri dahrero taro niyuhca” ni, yʉhʉre yahubasai wahaga tinare —nimaha Yawe Jonáre.

³ To ã nichʉ tʉhorota, to yare cahno bahrañoha Joná. Cahno tuhsʉ, pjiri ma dʉhtʉ cahapʉ jiri maca, Jope wama tiri macapʉ buhaa wahaha tiro. Tí macapʉ buhu sʉ, bʉjʉa bʉso wʉri ti wahã sʉri pitamahapʉ buhaa wahaha. Tí pitamahapʉ to buhu sʉchʉ, tói cʉ̃ria Españapʉ wahahtia pahsaha. España sehe sʉ̃ sãano caha sehe tjuaha. Cohamacʉ Jonáre to warocari maca Nínive sehe sʉ̃ mʉja taro caha sehe tjuaha. Ã jiro Joná sehe Cohamacʉ to warocari macapʉ waha duaeraro, España sehepʉ duhtia waharo nimaha. Ã jiro tia pʉrore niñeru wapa, tiapʉ samuha tiro.

⁴ Ã yoa ti waharucuro wato, yoaerachʉta, Yawe sehe wihnono tuaro wãchʉ yoaha. To ã tuaro wãchʉ yoaro mehne pahcõri, bʉjʉa pahcõri wahcãha. Ã waharo mehne tia dohoria wʉrʉ sehe tuaro waro yureha. Ã yurero, nu wahti site ñojahto cuaro waro wahaha.

⁵ Ã wahachʉ ñʉa, tiai dahraina sehe cʉa yʉhdʉa wahaha. Ã cʉa, tina cãinape ti ño payoina cohamanare sañurucuro mehne ti yoadohoa sinimaha tina. Ã siniata, “Maripʉ mini dijaahri” nia, ti naama, pachere diapʉ doca ño pahñonocaha tina. Ã yoa ã cuaro waharo wato, Joná sehe tia dohoria wʉrʉ topapʉ carĩno niha.

⁶ Ã yoa tia dohoria wʉrʉre dutiriro sehe tia topapʉ sãamahno, Jonáre tói ñʉ bocaha. Ã ñʉnota, tirore tuaro mehne “¡Wahcãga! ¡Wahcãga!” ni, bʉa careha. Ã yoa to wahcãchʉ ñʉno, õ sehe niha tirore: —Marine cuaro waro waharo nina. ¿Dohse yoa õi carĩ sãai nijari mʉhʉ? Yʉhʉ mehne dahraina cãinape ti ño payoina cohamanare sinia nimana. ¡Cjero! Mʉhʉ cʉ̃hʉ mʉ ño payoriro cohamacʉre sini bahrañoga. Pa tehe nino tiro marine pja ñʉno, mari mini yariaborore yʉhdoboca —niha dohoriare dutiriro Jonáre.

⁷ Ã yoa tiai dahraina sehe, ã wahachʉ ñʉa, ti basi õ sehe ni durucuha: —Mari cãinape mari ño payoina cohamanare yoadohoa sinimaja mari. Mari sinipachʉta, ne diro seheta marine tʉhoerara. Pa tehe nino cʉ̃iro mari mehne wahariro jiboca mari cohamanare yʉhdʉrʉca, suachʉ yoaro. Ã jina docape ñʉa mehne docape ñʉ, masijihna mari cohamanare suachʉ yoarirore —ni durucuha tina ti basi. Ã niata, ti docapea poca mehne docape ñʉha. Ti ã docape ñʉno mehne, “Joná jira” ni, masiha tina.

⁸ Ã masia, tirore noano masi namo duaha tina. Ã jia tirore õ sehe ni sinitu ñʉha tina: —¿Noa baro jijari mʉhʉ? ¿Nohopʉ macariro tahri mʉhʉ? ¿Potocãta mʉ ya buhirita marine õ sehe wahajari? —ni, sinitu ñʉha tina tirore.

⁹ Ti ã ni sinitu ñʉchʉ tʉhoro, tiro sehe tinare õ sehe ni yʉhtiha: —Yʉhʉ hebreo masʉno jija. Ã yoa yʉ ño payoriro Cohamacʉ sehe Yawe wama tiriro jira. Tiro yʉ ño payoriro mʉano macariro jira. Ã yoa tirota jiri jire ahri yahpa, jipihtiri yahpare bajuamehneriro. Tuhsʉ, bʉjʉa mári wʉri cʉ̃hʉre bajuamehneriro tirota jiri jire.

¹⁰ ‘Ã yoa tiro yʉ Cohamacʉ Yawe yʉhʉre dahraa cũmahre. Yʉhʉ sehe tí dahraare yoa duaerai, tirore yʉhdʉrʉcahi. Ã jicʉ ahriapʉ samu, duhti wahcãi nimahi yʉhʉ —ni, yʉhtiha Joná. To ã nichʉ tʉhoa, tina sehe õ sehe niha: —¿Dohse yoai mʉ cohamacʉre yʉhdʉrʉcari mʉhʉ? Mʉ cohamacʉre ne yʉhdʉrʉcaeraboa mʉhʉ. Mʉ yʉhdʉrʉcari buhiri sã cʉ̃hʉ yaria pihtia wahana tana nica —niha tina. Ã nia, ti cuimariro cjiro bui cuiha tina.

¹¹ Ã yoa wihnono sehe jʉna, sie sehe mehne tuaro waro wãno niha. Ã wahachʉ ñʉa, tina sehe Jonáre õ sehe ni sinitu ñʉha: —Mʉ ya buhiri marine õ sehe cuaro waharo nina. ¿Ã jina dohse yoama sã mʉhʉre? —ni, tirore sinitu ñʉha.

¹² Ti ã ni sinitu ñʉchʉ, Joná sehe tinare õ sehe ni yʉhtiha: —Yʉ ya buhiri mʉsare õ sehe cuaro waharo nina. Ã jina mʉsa sehe yʉhʉre diapʉ doca ñonocaga. Yʉhʉre mʉsa doca ñochʉ, wihnono wã duhua waha, tuhsʉ, pahcõri wʉri cʉ̃hʉ wahcã duhua wahaahca —ni yʉhtiha tiro tinare.

¹³ Ã yoa Joná tinare, “Yʉhʉre doca ñonocaga” to nipachʉta, tina sehe tirore doca ño duaeramaha. Ã doca ño duaera, ti tuaro mʉ sʉro wajamaha. “Ahri ma dʉhtʉ cahapʉ waja wahã sʉnocajihna mari” nia nimaha. Wiho mejeta wihnono sehe sie sehe mehne tuaro waro wãno niha. Tuhsʉ, pahcõri cʉ̃hʉ waja wahcãno mejeta jiha. Ã jia tí ma dʉhtʉ cahapʉ waja wahã sʉ bihoeraha tina.

¹⁴ Ã waja wahã sʉ bihoerama, Joná to Cohamacʉ Yawe sehere õ sehe ni siniha tina: —Cohamacʉ Yawe, ahriro Joná ya buhiri sã cʉ̃hʉ yaria duaeramaca. Tuhsʉ, tirore sã doca ño, mini yariachʉ sã yoari buhiri, mʉhʉ mehne buhiri ti duaeramaca sã. Mʉhʉta jira õ sehe cuaro waro wahachʉ yoariro. Mʉhʉ sehe õ sehe cuaro wahachʉ yoai, quihõno yoai nica. Wiho mejeta sã sehe buhiri maeraja —ni siniha tina.

¹⁵ Ã ni sini tuhsʉ, Jonáre ñaha, tí ma wʉrʉpʉ bʉjʉa pahcõri watopʉ doca ñonocaha. Tirore ti doca ñochʉta, wihnono tuaro wãmariro cjiro wacũeno wã duhu mʉa wahaha. Tuhsʉ, pahcõri wʉri cʉ̃hʉ bʉjʉa wahcãmariro cjiro wahcã duhu mʉa wahaha.

¹⁶ Ã wahachʉ ñʉa, tina sehe ñʉ cʉa yʉhdʉa wahaha. Ã ñʉ cʉaa, ã wahachʉ yoariro Yawere ño payo dʉcaha tina. Ã ño payoa, wahiquirore wajã, jʉ̃ wa mʉo, cua pisaro mehne ño payoha. Tuhsʉ, cua pisaro mehne õ sehe niha tina tirore: —Ã mʉhʉre õ sehe yoa, ño payorucunahtja sã —niha.

¹⁷ Ã yoa Jonáre diapʉ ti doca ñori baharo, Yawe sehe tirore wahi pjiriro wʉrʉ chʉnocachʉ yoaha. Ã yoa Joná sehe wahi wʉrʉ to chʉ sãari wajurupʉ tia dacho, tia ñami cati sãaha.