Isaía 9 - Wanano OT Portions

Cohamacʉ masare yʉhdohtiro to warocahtore yahu cũ mʉhtaha Isaía

⁶ Ã yoa Isaía Acare, tí pjare israe masa pʉhtorore, õ sehe ni yahu quihõ cũ mʉhta namoha: —Cʉ̃iro nijinocã masa bajuachʉ yoa, tirocãre mari yairo cjihto warocarohca Cohamacʉ marine. Tirocã sehe jipihtina Bui Pʉhtoro cjihto jirohca. Tuhsʉ, tiro payʉ wamari cʉ̃hʉ cjʉarohca. “Masare noano bosa mihni yʉhdʉriro” niri wama, “Cohamacʉ ji yʉhdʉrʉcʉ sʉriro waro” niri wama, “Mari Pʉcʉ ne di pja cati dʉcaerariro, ne di pja yariaerahtiro” niri wama, “Jipihtina Bui Pʉhtoro macʉno, masapere noano yajeri sãa, noano jinocachʉ yoahtiro” niri wama, tópe wamari cjʉarohca tiro.

⁷ ‘Ã yoa tiro israe masa pʉhtoro Davi cjiro ya da mehne tarohca. Tuhsʉ, to ñʉchʉno Davi Jerusalẽi, pʉhtoa ti duti jiri macapʉ pʉhtoro to jisiniri pjapʉ, to masare to dutiriro cjiro seheta tiro cʉ̃hʉ dutirohca mari Bui Pʉhtoro waro cjihto cʉ̃hʉ. Tiro paró ahri dacho mʉ sʉro macainare ã dutirucurohca. Tuhsʉ, ã noano waro yajeri sãachʉ yoa, ti basi noano jinocachʉ yoarucurohca tiro. Ne tí pihtisi. Noano waro dutirohca to masare jipihtiri yahpa macainare. Masa quihõno jia ti yoaare, ã jichʉ quihõno jieraa ti yoaa cʉ̃hʉre tiro besewerohca. Ã yoa tiro quihõno jia baro yoainare wahcherohca. Tuhsʉ quihõno jieraa baro yoainare tiro buhiri dahrerohca. Tó seheta ã jirucurohca to dutia tia. Mari Yawe to cahĩina waro jija. Ã jiro tiro Jipihtina Bui Ji Yʉhdʉrʉcʉ Sʉriro Waro mipʉ to ã ni cũare to niriro seheta wahachʉ yoarohca —ni yahu quihõ cũ mʉhta namoha Isaía pʉhtoro Acare.