Génesis 8 - Wanano OT Portions

Jipihtiri yahpa minimariro witiwe dija dʉcaha

^1-4 Cohamacʉ Noé cʉ̃hʉre, ã jichʉ jipihtina wahiquina, tia dohoriapʉ samurina jipihtinare wacũha. Tó seheta wacũ, tiro wihnonore wã tu dʉcachʉ yoaha tí co wʉrʉ buire. Tuhsʉ, ahri yahpai co tʉhnʉ wija mʉja ta wahsari cjirire wijaa duhuchʉ yoaha. Mʉanopʉ pjíro coro tʉhnʉ boraro yoaro sehe tamariro cʉ̃hʉre ta duhuchʉ yoaha. To ã yoachʉ, tí co wʉrʉ sehe witi dija dʉcaha. Witi dija dʉca, ã witirucuha jʉna. Ã yoa tó sehe miniri cʉhmare seis sʉ̃ri pihti, pa sʉ̃ diecisiete dachori ñaha wahcãnoi, ciento cincuenta dachori mini dʉcari baharo, tia dohoria tʉ̃cʉ, Arara wama tiri yahpai jidʉ bui witiwe pja sʉha.

⁵ Tói witiwe pja sʉri baharo, tí co wʉrʉ sehe ã witi dijarucusiniha. Ã witi dijarucusini, te pʉa sʉ̃ noano, pa sʉ̃ dacho maca yʉhdʉri baharo, tʉ̃ yucʉri sohtoari baju dʉca tuhsʉha jʉna.

⁶ Tʉ̃ yucʉ sohtoari baju dʉcari baharo, cuarenta dachori yʉhdʉri baharo, Noé tia dohoria mahari sopa pahmacãre pjõoha.

⁷ Pjõo tuhsʉ, cʉ̃iro wʉriro, ñiriro, ʉrĩa chʉrirore wa wioha. Tiro sehe wʉ wijaa wahcã, tia dohoria buipʉ majare mʉjaha. Wʉ wahcã tjoa, pari turi majare tjuaa wihi mʉja, yoaha tiro, te ahri yahpa bajua caha sʉchʉpʉ.

⁸ Ã yoa tirore wa wiori baharo, cʉ̃iro buja cʉ̃hʉre wa wioha tjoa. Ã yoaro, “¿Dihta bajutjiãhjari?” ni masi duaro niha tiro Noé.

⁹ Tiro buja sehe wʉ wijaa, te nohoi to so pisaboro, to so nuju sʉboro ne bocaeraha. Co wʉrʉ sehe jisiniha yahpa buire. Ã jiro dohoriapʉre wʉ majare tjuaa wihiha. To ã wihichʉ ñʉno, tiro Noé sehe to wamomacare siõ wio, tirocãre ñaha, tia dohoria puhichapʉ naroca sõha.

¹⁰ Ã yoa tiro Noé siete dachori cohta namoha. Cohta tuhsʉ, baharo tjoa tiro bujare wioha.

¹¹ Tí pja tiro wijariro, nahi dijaro wahtaroi tia dohoriapʉ wʉ majare tjuaa wihiha. ¡Olivo wama tiri yucʉcʉ dʉpʉcãre to quẽnocã mehne wʉpõ ñahatjiãhno, wihiha! Tí dʉpʉcãre to na wihichʉ ñʉno, tiro Noé sehe “Dihta bajutjiãhca” ni, masiha.

¹² Ã yoa tiro siete dachori cohta namo, pari turi tiro bujare wioha tjoa. Tí pja wahariro bujacã tirore ne wʉ majare tjuaa wihieraha jʉna. Ãta butinocaha.

¹³ Noé seisciento un cʉhmari to cjʉachʉ waro, dihta sehe bʉti caha sʉha. Ã yoa wahma cʉhmare, wahma ji dʉcari sʉ̃re cʉ̃ dacho ñahanoi Noé dohoria wʉhʉ mohanore nawe, ñʉroca wioha. Bʉti caha sʉri yahpa bajuha.

¹⁴ Cʉ̃ sʉ̃ pihti, pa sʉ̃ veintisiete dachori waharoi yahpa sehe wʉa sãa waroaha jʉna.

¹⁵ Ã yoa Cohamacʉ Noére õ sehe niha:

¹⁶ —Ahria dohoriare wijaahga mʉhʉ, ã jichʉ mʉ namo, mʉ pohna mʉa, mʉ macʉ namosanumia mehne wijaahga.

¹⁷ Jipihtina wahiquina wʉina, nuina, nʉcʉ macaina, bʉaina, chihchõina cʉ̃hʉre mʉhʉ mehne ahriai jirinare wioga, pari turi ahri yahpa, jipihtiri yahpare payʉ ti masa puti sahsehto sehe —ni yahuha Cohamacʉ Noére.

¹⁸ To ã nichʉ tʉhoro, Noé, to pohna mʉa mehne wijaaha. Ã jichʉ to namono, to macʉ namosanumia cʉ̃hʉ wija taha.

¹⁹ Jipihtina wahiquina, nʉcʉ macaina, nuina, bʉaina, chihchõina, ã jichʉ wʉina cʉ̃hʉ tiai jiina wija taha.

²⁰ Ã yoa wija ta pihtiri baharo jʉna, tiro Noé sehe tãa mehne pari tuhu dahre mʉoha. Dahre mʉo tuhsʉ, Noé cãina wahiquina, ã jichʉ wʉina cʉ̃hʉre masa Yawere ño payoa taa, ti wajãsoinapere beseha. To beserinare wajã, tãa tuhu, to cahnori tuhu buipʉ jʉ̃ wa mʉoha. Tó sehe yoa, Yawere ño payoha.

²¹ Noé to wajã, jʉ̃ wa mʉorina me sitiri pohna sehe Yawere sʉchʉ, Noé mehne noano ji coaha. Tó seheta ji coaro, tiro õ sehe ni tʉhotuha to yajeripohnapʉ: “Mipʉre tina masa, wihãina jiapʉta ñaa dihtare tʉhoturucu, yʉhʉ mehne buhiri tiina ti jipachʉta, tí buhiri ne pari turi ahri yahpare, jipihtiri yahpare ñano wahachʉ yoa namosi. Ã jichʉ wahiquina cʉ̃hʉre jipihtinare masa ya buhiri ne wajã pahño namosi, yʉ yoariro cjiro sehe” ni, tʉhotuha Cohamacʉ.

²² Õ sehe ni tʉhotu batoaha: “Ahri yahpa to jisinichʉ, toasori pja jirucurohca. Tí toa macaa dicha tiri pja cʉ̃hʉ jirucurohca. Ã yoa puhiri, cʉhmari, dachori, ñamini cʉ̃hʉ ti jiri pja ã jirucuahca” ni, tʉhotuha Cohamacʉ.