Génesis 7 - Wanano OT Portions

Yawe jipihtiri yahpare mini pihtiachʉ yoaha

¹ Baharo, tiro Yawe Noére õ sehe ni yahuha: —Mʉhʉ cʉ̃irota jira, mʉhʉ mehne macaina watore yʉ yahuare “Potocã jira” ni, yoarucuriro. Ã jicʉ mʉhʉ, mʉ namo, mʉ pohna mʉa, ã jichʉ mʉ macʉ namosanumia cʉ̃hʉ dohoriapʉre samunahca.

² Ã yoa mʉsa yʉhʉpʉre ño payona, wahiquina wajã, jʉ̃ wa mʉonohrinare, cãa curuari macaina siete wahpari naga. Ã jichʉ yʉhʉpʉre wajã, jʉ̃ wa mʉonohoeraina sehere, cʉ̃ wahpa dihta naga.

³ Ã yoa wʉina sehere mʉa siete, numia siete naga, ti pihtierahto sehe.

⁴ Yʉhʉ sehe siete dachori baharo, coro tachʉ yoai tai nija. Cuarenta nʉmʉri waro, ã dachori, ñamini, coro tarucurohca. Ahri yahpai jiinare, jipihtina yʉ bajuamehnerinape wajã pahñoi tai nija. Ne cʉ̃iro dʉhsaro marieno wajãihtja —niha tiro Noére.

⁵ Ã yoa Noé sehe tiro Yawe to dutiro seheta to dutiare yoa pahñoha.

⁶ Tiro seisciento cʉhmari waro cjʉaa tiha, ahri yahpa, jipihtiri yahpa mini dʉcachʉ.

⁷ Tiro dohoriapʉre to pohna mʉa mehne, to namono, ã jichʉ to macʉ namosanumia tiaro numia mehne samuha. Jipihtiri yahpa mininore tia mehne yʉhdʉ witia taa niha.

⁸ Yawepʉre wahiquina ti jʉ̃ wa mʉonohrinape, tuhsʉ, ti jʉ̃ wa mʉonohoeraina cʉ̃hʉ, wʉina, bʉaina jipihtina samua wahaha.

⁹ Mʉno, numino, pʉaro, pʉaro dihta Noé cahai ta, tiapʉre samuha. Cohamacʉ Noére to dutiriro seheta wahaha.

¹⁰ Siete dachori baharo, jipihtiri yahpa mini dʉcaha.

¹¹ Noé seisciento cʉhmari to cjʉachʉ waroi, tí cʉhma cʉ̃ sʉ̃, pa sʉ̃re diecisiete dachori ñaha wahcãnoi, Yawe ahri yahpare paró yihtichʉ yoa, tí wahsaripʉ co tʉhnʉ wija tachʉ yoaha. Tuhsʉ, mʉano cʉ̃hʉre ãta tʉhnʉ boraro yoaro sehe tarucuha.

¹² Cuarenta nʉmʉri waro ã dachori, ñamini ahri yahpare coro tuaro tʉhnʉ boraro yoaro sehe tarucuha, ne duhuro marieno.

¹³ Ã yoa coro ta dʉcari dacho warore Noé sehe dohoriapʉ samuha, to pohna mʉa mehne, Sẽ, Cã, Jafe wama tiina mehne. Ã yoa to namono, to macʉ namosanumia tiaro numia, jipihtina tina samuha tiapʉ.

¹⁴ Ã yoa wahiquinape nuina, nʉcʉ macaina, bʉaina, chihchõina, ã jichʉ wʉinape cʉ̃hʉ jipihtina tina curuaripe samuha, tina masa mehne.

¹⁵ Jipihtina wahiquinape Noé cahai mʉno, numino mehne pʉaro, pʉaro dihta taa, samuha tiapʉ.

¹⁶ Wahiquinape, jipihtina catiro cjʉaina pʉaro, pʉaro samuha, mʉno, numino mehne. Cohamacʉ Noére to ni yahuriro cjiro seheta wahaha. Ã yoa ti samu pihtichʉ ñʉno, Yawe to basita tia dohoria samuri sopacare biha dapoha.

¹⁷ Ã yoa cuarenta dachori waro ahri yahpare ã mini mʉjarucuha. Ahri yahpa mini mʉja taro, cʉ̃no potori tia dohoria cʉ̃hʉ pahsa wahcã dʉcaha yahpa buire.

¹⁸ Ã yoa tí co sehe sie sehe mehne, sie sehe mehne mini mʉja taha. Co mʉjano cʉ̃no potori tia dohoria cʉ̃hʉ pahsa mʉjaha.

¹⁹ Tí co wʉrʉ ahri yahpai tʉ̃ yucʉri, paye yucʉri bui mʉa yʉhdʉa yucʉri sehere tí co wʉrʉ mini yʉhdʉ mʉjaa wahaha.

²⁰ Mini yʉhdʉ mʉjaa waha, tí tʉ̃ yucʉri, paye yucʉri bui mʉa yʉhdʉa jia yucʉri sehere siete metro waro mini yʉhdʉ mʉjaa namoha.

²¹ Masa ahri yahpai jimarina, wʉina, ã jichʉ wahiquina nuina, nʉcʉ macaina, bʉaina, chihchõina cʉ̃hʉ noano waro yaria pihtia wahaha.

²² Jipihtina waro wʉari yahpai jimarina, yajeri naina baro yaria pihtia wahaha.

²³ Tiro Noé, ã jichʉ tiro mehne tiapʉre samuina dihta yʉhdʉha. Painapʉ ahri yahpai jimarina masa, wahiquina, nuina, nʉcʉ macaina, wʉina, bʉaina, chihchõina, tina sehe yaria pihtia wahaha.

²⁴ Ã yoa ciento cincuenta dachori waro tí co wʉrʉ sehe jipihtiri yahpapʉre mʉnano tjuarʉcʉ sʉha.