Génesis 5 - Wanano OT Portions

Adão ya da quiti jira ahri

¹ Cohamacʉ to wahma bajuamehneriro Adão ya da quiti jira ahri. Tiro Adãore bajuamehneno, to yoaro seheta jia tihtirore bajuamehneha.

² Mʉnore, numino cʉ̃hʉre bajuamehneha. Tinare bajuamehne tuhsʉ, —Ahrinare noano wahajaro —ni cũha. To bajuamehneri dachoihta tinare, —“Masa” wama tijaro ahrina —niha tiro.

³ Ã yoa Adão 130 cʉhmari to cjʉachʉ waro, to macʉno masa bajua tiha, Sete cjihto. Tiro to pʉcʉro yoaro seheta jia tiriro jiha.

⁴ To macʉno Sete bajuari baharo, Adão sehe 800 cʉhmari cati namo, paina mʉa, numiare pohna ti namoha.

⁵ Jipihtiro 930 cʉhmari cjʉaro, yariaa wahaha.

⁶ Ã yoa Sete 105 cʉhmari to cjʉachʉ waro, to macʉno Enoso cjihto masa bajuaha.

⁷ To masa bajuari baharo, Sete sehe 807 cʉhmari cati namo, paina mʉa, numiare pohna ti namoha.

⁸ Jipihtiro 912 cʉhmari cjʉaro waro, yariaa wahaha.

⁹ Ã yoa tiro Enoso 90 cʉhmari to cjʉachʉ waro, to macʉno Cainã cjihto masa bajuaha.

¹⁰ To masa bajuari baharo, Enoso sehe 815 cʉhmari cati namo, paina mʉa, numiare pohna ti namoha.

¹¹ Jipihtiro 905 cʉhmari cjʉaro waro, yariaa wahaha.

¹² Ã yoa tiro Cainã 70 cʉhmari to cjʉachʉ waro, to macʉno Mahalale cjihto masa bajuaha.

¹³ To masa bajuari baharo, Cainã sehe 840 cʉhmari cati namo, paina mʉa, numiare pohna ti namoha.

¹⁴ Jipihtiro 910 cʉhmari cjʉaro waro, yariaa wahaha.

¹⁵ Ã yoa tiro Mahalale 65 cʉhmari to cjʉachʉ waro, to macʉno Jére cjihto masa bajuaha.

¹⁶ To masa bajuari baharo, tiro Mahalale sehe 830 cʉhmari cati namo, paina mʉa, numiare pohna ti namoha.

¹⁷ Jipihtiro 895 cʉhmari cjʉaro waro, yariaa wahaha.

¹⁸ Ã yoa tiro Jére 162 cʉhmari to cjʉachʉ waro, to macʉno Enoco cjihto masa bajuaha.

¹⁹ To masa bajuari baharo, Jére sehe 800 cʉhmari cati namo, paina mʉa, numiare pohna ti namoha.

²⁰ Jipihtiro 962 cʉhmari cjʉaro waro, yariaa wahaha.

²¹ Ã yoa tiro Enoco 65 cʉhmari to cjʉachʉ waro, to macʉno Matusalẽ cjihto masa bajuaha.

²² Tiro Enoco sehe Cohamacʉ to cahmano sehere “Potocãta jira” ni, yoaa tiha. Ã jiro Cohamacʉ tirore ñʉ ji coaha. Ã yoa to macʉno Matusalẽ masa bajuari baharo, tiro 300 cʉhmari cati namo, paina mʉa, numiare pohna ti namoha.

²³ Jipihtiro 365 cʉhmari waro catiha tiro.

²⁴ Cohamacʉ to ji coaro seheta ahri yahpai jia tiha. Cʉ̃ nʉmʉ catirirore Cohamacʉ to naa wahachʉ, wacũeno butia wahaha tiro.

²⁵ Ã yoa Matusalẽ Cohamacʉ naariro macʉno 187 cʉhmari to cjʉachʉ waro, to macʉno Láme cjihto masa bajuaha.

²⁶ To masa bajuari baharore, Matusalẽ sehe 782 cʉhmari waro cati namo, paina mʉa, numiare pohna ti namoha.

²⁷ Jipihtiro 969 cʉhmari cjʉaro waro, yariaa wahaha.

²⁸ Ã yoa Láme 182 cʉhmari to cjʉachʉ waro, to macʉno cjihto masa bajuaha.

²⁹ To macʉnocãre “Noé” ni, wama pisuha, masa sochʉ yoahtiro to jichʉ masino. Ã jiro wihãriro Noé to dohse jia tihtire õ sehe ni yahu cũha to pʉcʉro Láme: —Dóipʉta ahri yahpai jiina ti yʉhdʉrʉcari buhiri Yawe tuaro dahrachʉ yoa dutimaha mari jipihtina masare. Ã jina mari chʉhtire tuaro mari dahraa mehne bocaro cahmana. Wiho mejeta ahriro nijinocã marine tíre sochʉ yoarohca —ni cũha. (“Noé” nino, “sochʉ yoariro” nino, ahri pʉa wama cʉ̃no sehe bo cure bisica hebreo masa ya dʉsero mehne)

³⁰ Noé masa bajuari baharore, Láme sehe 595 cʉhmari cati namo, paina mʉa, numiare pohna ti namoha.

³¹ Ã yoa jipihtiro 777 cʉhmari cjʉaro waro, yariaa wahaha.

³² Ã yoa tiro Noé sehe 500 cʉhmari cjʉaro waro, ahrina tiaro mʉare pohna tiha. Sẽ, Cã, Jafe wama tiinare Noé pohna tiha.