Génesis 11 - Wanano OT Portions

Yawe jipihtina masa cʉ̃ dʉsero durucuinare payʉ dʉseri durucuchʉ yoaha

¹ Tí pjapʉre ahri yahpai jiina jipihtinapʉta cʉ̃ dʉserota durucua timaha.

² Ã yoa tina Noé baharo macaina sʉ̃ mʉja taro sehe wahaa wahaa tiha. Waha, te Sina wama tiri yahpapʉ sʉ, tópʉ cʉ̃ wapa noano tja tiri wapare boca sʉ, ji caha sʉha.

³ Tí yahpai jia, ti basi õ sehe niha: —Dihta cjoarire yoa, baharo pichacapʉ jʉ̃jihna ti bʉtihto sehe —niha. Ã yoa tina wʉhʉse dahre mʉoa taa, dói jia comape mehne doho mʉjaha.

⁴ Ã yoa ti basi õ sehe ni namoha tjoa: —Mari jipihtina cʉ̃ maca dahrejihna. Tuhsʉ, cʉ̃ wʉhʉ, mʉanopʉ sʉri wʉhʉ yoajihna. Mari tó sehe jia tina, wacũnohoina waro jinahca. Baharopʉre paina masa wacũahca marine. Ã jichʉ mari tó sehe jia tina, mari jipihtiri yahpare paró waha sitesi —niha ti basi.

⁵ Wiho mejeta Yawe sehe tí macare, ã jichʉ tí macai jiri wʉhʉ, ti mʉanopʉ sʉchʉ yoa duari wʉhʉre ñʉno taro, dija taha jʉna.

⁶ Tiro to basi õ sehe ni tʉhotuha jʉna: “Ahrina cʉ̃ curua macaina ji, ã yoa cʉ̃ dʉserota durucua, ti dohse yoa duaro seheta yoa masiahca. Ã jia ne ahrire dahre duhu duasi” ni, tʉhotuha. To ã ni tʉhoturi baharo, tiro majare mʉjaa wahaha.

⁷ Ti dahre duhu duaerachʉ ñʉno, tiro to basi õ sehe ni namoha: —Basa pari turi dijaana. Mari tinare cʉ̃ dʉsero ti durucumariro cjirore payʉ dʉseri waro wahachʉ yoajihna, tina ti basi ti tʉhoerahto sehe —niha tiro jʉna.

⁸ Tó seheta yoa, tiro tinare jipihtiri yahpapʉ waha sitechʉ yoaha. Ã jia tina ti dahremari macare dahre duhuha jʉna.

⁹ Ã jia tí macare Babe wamoaha. “Tʉho bocaeraina wahaha” ni duari wama jica tó. Tói jiinare Yawe ahri yahpapʉre paró waha sitechʉ yoaha jʉna.

Ahri quiti Sẽ ya curua macaina ya quiti jira

¹⁰ Ã yoa Sẽ ya da macaa quiti jira ahri. Ahri yahpa jipihtiropʉre miniri baharo, pʉa cʉhma yʉhdʉha. Tí pjare Sẽ cien cʉhmari to cjʉachʉ waro, Arfaxa cjihto masa bajuaha.

¹¹ To masa bajuari baharo, tiro Sẽ sehe quiniento cʉhmari cati namo, paina mʉa, numia pohna ti namoha.

¹² Ã yoa tiro Arfaxa treinta y cinco cʉhmari to cjʉachʉ waro, to macʉno Sela cjihto masa bajuaha.

¹³ To masa bajuari baharo, tiro Arfaxa sehe cuatrociento tres cʉhmari cati namo, paina mʉa, numia pohna ti namoha.

¹⁴ Ã yoa tiro Sela treinta cʉhmari to cjʉachʉ waro, to macʉno Ébere cjihto masa bajuaha.

¹⁵ To masa bajuari baharo, tiro Sela sehe cuatrociento tres cʉhmari cati namo, paina mʉa, numia pohna ti namoha.

¹⁶ Ã yoa tiro Ébere treinta y cuatro cʉhmari to cjʉachʉ waro, to macʉno Péle cjihto masa bajuaha.

¹⁷ To masa bajuari baharo, tiro Ébere sehe cuatrociento treinta cʉhmari cati namo, paina mʉa, numia pohna ti namoha.

¹⁸ Ã yoa tiro Péle treinta cʉhmari to cjʉachʉ waro, to macʉno Reú cjihto masa bajuaha.

¹⁹ To masa bajuari baharo, tiro Péle sehe dosciento nueve cʉhmari cati namo, paina mʉa, numia pohna ti namoha.

²⁰ Ã yoa tiro Reú treinta y dos cʉhmari to cjʉachʉ waro, to macʉno Seru cjihto masa bajuaha.

²¹ To masa bajuari baharo, tiro Reú sehe dosciento siete cʉhmari cati namo, paina mʉa, numia pohna ti namoha.

²² Ã yoa tiro Seru treinta cʉhmari to cjʉachʉ waro, to macʉno Naco cjihto masa bajuaha.

²³ To masa bajuari baharo, tiro Seru sehe dosciento cʉhmari cati namo, paina mʉa, numia pohna ti namoha.

²⁴ Ã yoa tiro Naco veintinueve cʉhmari to cjʉachʉ waro, to macʉno Téra cjihto masa bajuaha.

²⁵ To masa bajuari baharo, tiro Naco sehe ciento diecinueve cʉhmari cati namo, paina mʉa, numia pohna ti namoha.

²⁶ Ã yoa tiro Téra sehe setenta cʉhmari cjʉaro, tiaro pohna tiha, mʉare. Abrã, Harã, Naco jiha ti wama.

Térare ji turiaina ya quiti jira

²⁷ Ã yoa Térare ji turiaina ya quiti jira ahri. Téra tiaro pohna tiha, mʉare. Abrã, Harã, Naco jiha ti wama. To macʉno Harã cʉ̃hʉ tiaro pohna tiha. Mʉno sehe Lote wama tiriro, ã jichʉ numia sehe Milcá, Iscá wama tia numia jiha.

²⁸ Tiro Harã sehe to bajuari maca cjiroihta to pʉcʉro Térare yaria wahyoa wahaa tiha, Mesopotamia yahpai, Ur wama tiri macaihta.

²⁹ Harã mʉnono bahʉro Naco sehe tiro mʉnono macono Milcáre namo tiha. Harã mʉnono wahmino Abrã sehe Saraire namo tiha.

³⁰ Ticoro nijinocã bocaera tiha.

³¹ Abrã cʉ̃hʉ pʉcʉro Téra sehe Mesopotamia yahpai jiri maca, Ur jiriro wijaa, Canaã yahpapʉ waharo niha. Tí yahpapʉ waharo, to macʉno Abrãre, to panamino Lotere, ã jichʉ to macʉ namono Sarai cʉ̃hʉre naaha tiro. Wiho mejeta tina Canaãpʉta wahamaina jipahta, Harã wama tiri macapʉ sʉ, tói tjuaha.

³² Tiro Téra sehe dosciento cinco cʉhmari cjʉariro tí macai, Harãihta yariaa wahaa tiha.