Éxodo 5 - Wanano OT Portions

Moise, ã jichʉ to wahmino Aarõ tina pʉaro faraõ mehne durucua wahaha

¹ Ã yoa Moise cʉ̃hʉ faraõ mehne durucua wahaha jʉna. Waha, to cahapʉ sʉa, õ sehe niha tina tirore: —Yawe, sã Cohamacʉ, sãre õ sehe ni mʉhʉre yahu dutirocahre: “Sã to masa curuare wʉari dʉjʉro, yucʉri marieni dʉjʉropʉ warocajaro, tópʉ sã wahchea mehne tirore bose nʉmʉ yoa payo, sã tirore ño payona wahahto sehe” ni, sãre yahu dutirocahre Yawe mʉhʉre —niha tina tirore.

² Ti ã nichʉ tʉhoro, faraõ sehe tinare õ sehe ni yʉhtiha: —¿Noa jijari tiro “Yawe, sã Cohamacʉ” mʉsa niriro? Masieraja yʉhʉ tirore. Yʉ masierarirore yʉhti masieraja yʉhʉ. Ã jicʉ israe masa curuare ne wa wiosi —ni yʉhtiha faraõ.

³ To ã nichʉ tʉhoa, Moise cʉ̃hʉ sehe õ sehe ni yʉhtiha: —Mʉhʉre sã niriro seheta sã hebreo masa sã Cohamacʉ sã mehne sʉhʉduhre. Ã jina sã sehe mʉhʉre sinina nija. Sãre wʉari dʉjʉro, yucʉri marieri dʉjʉropʉ warocaga. Tópʉ tia dacho waha sʉropʉ sã Cohamacʉ Yawere ño payona waha duana nija. Sã wahiquinare wajã, jʉ̃ wa mʉo, tirore ño payona waha duana nija sã. Sãre mʉ wa wioerachʉ, tiro sehe sãre purĩa dohatia mehne, tuhsʉ, cahma wajãa mehne buhiri dahre, sãre wajãnocahto jiyuhti —ni yʉhtiha Moise cʉ̃hʉ faraõre.

^4-5 Ti ã nichʉ tʉhoro, faraõ sehe tinare tuaro mehne õ sehe niha: —¿Dohseana tana mʉsa coyea noano ti dahra jinocanore dojomehnena tajari mʉsa? Ti dahraa mehne noano dahra jinocaa nina tina. Tí cjihtita ahri yahpapʉre payʉ masa puti jira tina. Ã jina mʉsa sehe tinare noano ti dahra jinocanore cariboena tjiga. ¡Ti dahraropʉta tinare sʉho na tjuaaga tjoa! Tinare wa wiosi yʉhʉ —niha faraõ.

⁶ Ã yoa tí dachoihta faraõ sehe ti pʉhtoare, tinare tuaro mehne dahra dutiinare pji cahmachuha. Tuhsʉ, israe masa coyea, tinare sʉho dahra mʉhtaina cʉ̃hʉre pji cahmachuha. Pji cahmachu, tinare õ sehe niha:

^7-9 —Israe masa marine dahra cohtaina capa bʉjʉina jira. Ã capa bʉjʉata, tina marine duhti wahcã duaa nina. Ã duhti wahcã dua, tina marine õ sehe ni mahñona: “Sã Cohamacʉre ño payona tana, sã wahiquinare wajã, jʉ̃ wa mʉo, tirore ño payona waha duana nija sã. Sãre wa wioga” ni, mahñona tina marine. Ti ã ni mahño wijaa duari buhiri mʉsa sehe tinare tó pano ti dahramariro bui tuaro dahra dutiga. Ã tuaro dahra dutina, õ sehe yoa dutiga tinare. Tó pano dihta sohãa cjoarire ti yoa mʉjachʉ, mʉsa sehe tinare tí dihta sohãa mehne ti tju morehti cjihti tjare wa mʉjaa timare. Mipʉ sehere waena tjiga jʉna. Mʉsa waerachʉ, tina sehe dachoripe ti mʉ sʉro tjare maca, tíre dihta sohãa mehne more, dihta sohãa cjoari yoa mʉjajaro jʉna. Mʉsa ã yoa dutichʉ, tó pano ti dahramariro cjiro bui tuaro dahraahca tina. Ti ã tuaro dahra mʉjapachʉta, mʉsa sehe tinare tó pano ti yoaa cjoari cjiripeta mipʉ cʉ̃hʉre yoa duti mʉjaga. Ne cʉ̃ cjoa dʉhsaro marieno tinare yoa duti mʉjaga. Tuhsʉ, tinare ne soro marieno dahra dutiga. Mʉsa ã yoachʉ, tina sehe Moise, Aarõ cʉ̃hʉ ti mahño yahuchʉ, ti tʉhobori pja cjʉasi —niha faraõ tinare.

¹⁰ To ã ni yahuchʉ tʉhoa, tina sehe israe masare yahua wahaha. Waha, ti cahapʉ sʉa, faraõ to nirire tinare yahuha. Õ sehe ni yahuha tinare: —Mipʉre faraõ tó pano mʉsare tjare to waroca mʉjano seheta warocaera mʉjahto jiyuhti jʉna.

¹¹ To ã warocaerachʉ, mʉsa sehe mʉsa basita tjare maca mʉjahtina jiyuhti. Ã maca wapʉ tipanahta, tó pano mʉsa yoari cjiripeta dihta sohãa cjoarire mipʉ cʉ̃hʉre yoa mʉjahtina jiyuhti mʉsa. Ã ni sãre yahu dutirocahre faraõ mʉsare —ni yahuha tinare.

¹² Ti ã ni yahuchʉ tʉhoa, israe masa sehe ti basita tjare macaa wahaa, Egipto jipihtiri yahpapʉ waha sitea wahaha.

¹³ Ti ã maca wapʉ tichʉ ñʉpahta, tinare tuaro mehne dahra dutiina sehe pja ñʉera tiha tinare. Ã pja ñʉeraa, tó pano dihta sohãa cjoari ti yoari cjiripeta, dachoripe tinare yoa duti mʉjaa tiha tjoa. Wiho mejeta tina sehe tópe peri yoaa bihoera tiha jʉna.

¹⁴ Ti bihoerachʉ ñʉa, ti pʉhtoa tinare tuaro mehne dahra dutiina sehe israe masa coyea, tinare sʉho dahra mʉhtaina sehere tjana mʉjaa tiha. Ã tjanaa, tinare õ sehe ni tuhti mʉjaa tiha: —Cjero dihta sohãa cjoarire tó pano mʉsa yoari cjiripeta yoaga tjoa —ni tuhtipe mʉjaa tiha tinare.

¹⁵ Ti ã ni tuhti, tjanape mʉjachʉ, tina sehe ne ji coaera tiha. Ã ji coaera, faraõ mehne durucua wahaha. Waha, to cahapʉ sʉa, õ sehe nimaha tina tirore: —¿Dohse yoai mʉhʉ sehe sãre ã tuaro mehne dutipe mʉjajari? Ã yoaeraboca mʉhʉ sãre. Mʉhʉre dahra cohtaina jina nija sã.

¹⁶ Ã yoa sohõ jiina, sãre ñʉ nʉnʉ duticʉ, mʉ cũrina cʉ̃hʉ sãre tjare waerapahta, tó pano sã yoari cjiripeta dihta sohãa cjoarire yoa duti mʉjana sãre. Wiho mejeta sã sehe sã basita tjare maca wapʉ tiina tó pano sã yoari cjiripeta yoana bihoeraja jʉna. Sã ã bihoerachʉ ñʉpahta, tina sehe sãre wiho warota tjanape mʉjaa tira. Wiho mejeta sã ya buhiri jierara. Mʉsa coyea, sãre mʉ ñʉ nʉnʉ duti, mʉ cũina ya buhiri sehe jira —nimaha tina tirore.

¹⁷ Ti ã nichʉ tʉhoro, faraõ sehe tinare õ sehe ni yʉhtiha: —Capa bʉjʉina jira mʉsa. Ã capa bʉjʉnata, yʉhʉre õ sehe nina mʉsa: “Sã Cohamacʉ Yawere ño payona waha duana nija sã. Sã wahiquinare wajã, jʉ̃ wa mʉo, tirore ño payona waha duana nija. Ã jicʉ mʉhʉ sehe sãre wa wioga” nina mʉsa yʉhʉre.

¹⁸ Mʉsa yʉhʉre ã ni mahñori buhiri cjero mʉsa dahraapʉ dahrana wahaga tjoa. Waha, dihta sohãa cjoarire yoana wahaga. Yʉ coyea, mʉsare dutiina tja mehne mʉsare ti yoadohoerapachʉta, mʉsa sehe dihta sohãa cjoarire, tó pano mʉsa yoari cjiripeta dachoripe pari turi yoa mʉjaga tjoa —ni yʉhtiha faraõ tinare.

¹⁹ To ã ni yʉhtichʉ tʉhoa, tina sehe õ sehe ni tʉhotuha: “Tó pano mari ñano yʉhdʉro bui ñano yʉhdʉna nica mari” ni, cariputiro tʉhotuha tina.

²⁰ Faraõ mehne tó sehe ni, ti sʉhʉduro wato, Moise cʉ̃hʉ sehe ti sʉhʉduri wʉhʉ wijaroi tinare cohtarucua niha. Ã jia tina sehe sʉhʉdu tuhsʉ, wijaa, Moise cʉ̃hʉ mehne piti bocaha.

²¹ Ã piti bocaa, õ sehe ni tuhtiha tinare: —Sãre õ sehe ñano yʉhdʉchʉ yoana tana, mʉsata wahmanore õpʉ ta, “Sã coyeare wa wioga” ni, dojomehne dʉcahre. Ã nina, faraõ sehere to doca macaina pʉhtoa mehne sãre ti ñʉ yabi dʉcachʉ yoahre mʉsa. “Ahrina ñainare tuaro dutipe, wajã pahñonocajihna mari” ni, sã sehere ti ñʉ tuhti dʉcachʉ yoahre mʉsa. Sãre mʉsa ã ñʉ tuhtichʉ yoari buhiri, Yawe sehe tíre ñʉno, mʉsare buhiri dahrejaro —ni tuhtiha tinare.

Yawe mehne durucuro wahaha Moise

²² Ã yoa Moise sehe to coyea ti ã ni tuhtichʉ tʉhoro, Yawe mehne durucuro wahaha. Tiro mehne durucuro, õ sehe niha Yawere: —Pʉhtoro, mʉ masa curuare wiho warota ñano yʉhdʉchʉ yoai nina mʉhʉ. Tuhsʉ, yʉhʉ cʉ̃hʉre wiho warota ti cahapʉ warocari jira mʉhʉ. “Tinare wioi wahaga” mʉ nichʉ tʉhocʉ, õpʉ tamahi yʉhʉ.

²³ Õpʉ wihi, faraõre mʉ yʉhʉre yahu dutirocarire yahumahi yʉhʉ tirore. Yʉ yahuri baharo jipachʉta, tiro sehe tó pano to dutipemariro bui tinare dutipe namono nina. Mʉhʉ cʉ̃hʉ ti ñano yʉhdʉchʉ ñʉpaihta, tinare na wioeraputiara —niha Moise Yawere.