Éxodo 40 - Wanano OT Portions

Moise to coyea mehne Cohamacʉ ya wʉhʉ cjihtore tuhsʉ dapoha

¹⁷ Israe masa Egiptopʉ jimarina ti wijaari baharo, cʉ̃ cʉhma noano, pa cʉhmare cʉ̃ dacho ñaha wahcãrucuro nia tiha. Ã yoa tí dachoihta Moise cʉ̃hʉ Cohamacʉ ya wʉhʉre tuhsʉ dapoa tiha.

¹⁸ Tí wʉhʉre tuhsʉ daporo taro, õ sehe yoaha tiro: Ti wahcõ dapohtore plata wama tia comaa cjoari, copa tia cjoari mehne quihõ cũ mʉhtaha. Quihõ cũ tuhsʉ, tí coparipʉ acacia yucʉ pjĩnine duhu sãa dapo wahcã, tiha dapoha. Tuhsʉ, tí pjĩnipʉ wahãa sororipʉ yucʉrire siõ sõ, tí wʉhʉ tiharicare tua ñaha dapoha. Tí wʉhʉ tiharicare tuhsʉ, Cohamacʉ ya tahtiare ti biha dʉcatahtoi botarire dapoha. Tuhsʉ, tí wʉhʉ sopaca cʉ̃hʉre paye botarire dapoha.

¹⁹ Tí botarire dapo tuhsʉ, õ sehe yoaha tjoa: Cabraa cahsari mehne ti dereri cahsaro wʉrʉ mehne tí wʉhʉre mohaha. Tí cahsaro wʉrʉ buipʉ pa cahsaro wʉrʉre moha payo, tʉã dapo namoha. Tí wʉhʉ sopaca dihtare bihaerasiniha. Ã yoaro, Yawe to dutiro seheta yoaro niha Moise.

²⁰ Ã yoa tuhsʉ, õ sehe yoaha tjoa: Cohamacʉ to dutiare to joa naa pjĩnine na, tí pjĩnine Cohamacʉ to wihbo dutiri caropʉ wihbo sãaha. Wihbo sãa tuhsʉ, tí carore ti wʉahti yucʉrire tí caroi wahã sororipʉ siõ sãa õha. Tuhsʉ, tí carore bihaha jʉna.

²¹ Biha tuhsʉ, Cohamacʉ ya wʉhʉpʉ na sãa, to jiri tahtiapʉ tí carore wihbo cũha. Wihbo cũ tuhsʉ, cjã turi cahsaro mehne duhu yoroca dijo, tí carore dʉcata dapoha. Ã yoaro, Yawe to dutiro seheta yoaro niha Moise.

²² Ã yoa tuhsʉ, õ sehe yoaha tjoa: Cohamacʉ to ya tahtia wijaro macari tahtia poto bʉhʉsehe sehe Cohamacʉ to yoa dutiri mesare duhu dapoha.

²³ Duhu dapo, tí mesai Yawere ño payoro mehne ti waa pãore payoha. Ã yoaro, Yawe to dutiro seheta yoaro niha.

²⁴ Ã yoa tuhsʉ, õ sehe yoaha tjoa: To duhu dapori mesa potoi sihã dapoa poca pisahtʉre duhu dapoha.

²⁵ Duhu dapo, tʉ dʉpʉri sohtoaripʉ sihãa dapohti pocacãre duhu payo, Yawe to ñʉrocaroi tí pocacãpʉ sere pio sãa, sihã dapoha. Ã yoaro, Yawe to dutiro seheta yoaro niha.

²⁶ Ã yoa tuhsʉ, õ sehe yoaha tjoa: Me sitia pohcare ti jʉ̃ wa mʉohti tuturu, uru cahsari mehne ti duhu õri tuturure na taa, Cohamacʉ ya tahtiare ti dʉcatari cahsaro cahacãi duhu dapoha.

²⁷ Duhu dapo tuhsʉ, me sitia pohcare tí tuturupʉ duhu payo, jʉ̃ wa mʉo, Cohamacʉre ño payoha. Ã yoaro, Yawe to dutiro seheta yoaro niha Moise.

²⁸ Ã yoa tuhsʉ, õ sehe yoaha tjoa: Cohamacʉ ya wʉhʉpʉ ti sãahti sopacare ti cjã turi cahsaro mehne duhu yoroca boro, dʉcata dapoha.

²⁹ Tuhsʉ, tí wʉhʉ wijaroi, sopaca potoi wahiquinare wajã, ti jʉ̃ wa mʉo mʉjahti caro cjihto cʉ̃hʉre duhu dapoha. Tuhsʉ, tí caropʉ wahiquinare duhu payo, jʉ̃ wa mʉo, Cohamacʉre ño payoha. Jʉ̃ wa mʉo tuhsʉ, trigore olivo se mehne ti morea cʉ̃hʉre tí caroihta duhu payo, jʉ̃ wa mʉo, Cohamacʉre ño payoha tjoa. Ã yoaro, Yawe to dutiro seheta yoaro niha.

³⁰ Ã yoa tuhsʉ, õ sehe yoaha tjoa: Ti jʉ̃ wa mʉori caro, ã jichʉ Cohamacʉ ya wʉhʉ sopaca, tí dacho macai ti wamo cosahti wahwa cjihto cʉ̃hʉre duhu dapoha. Tuhsʉ, tí wahwapʉ core pio sãa dapoha.

^31-32 Tí co mehne Moise, Aarõ, ã jichʉ Aarõ pohna cʉ̃hʉ Cohamacʉ ya wʉhʉpʉ ti sãahto pano, ã yoa wahiquinare wajã, jʉ̃ wa mʉo, ti ño payoa wahahto pano cʉ̃hʉre ti wamomacarine, ti dahpori cʉ̃hʉre cosaa tiha. Ã yoaa, Yawe to dutiro seheta yoaa niha tina.

³³ Tí jipihtiare yoa tuhsʉ, Moise sehe tí wʉhʉre sahrĩ sãaha jʉna. Wahiquinare wajã, duhu payo, ti jʉ̃ wa mʉo mʉjahti caro cʉ̃hʉ tí sahrĩno puhicha sehe tjuaha. Õ sehe yoa, sahrĩ sãaha tiro. Bronce wama tia comaa cjoari, copa tia cjoari mehne ti sahrĩ sãahto cjihtore quihõ cũ majareha. Tuhsʉ, tí coparipʉ acacia yucʉ botarire duhu sãa dapo wahcãha. Tí botaripʉ suhti cahsarire tʉã dapo majarea, sahrĩ sãa dapoha jʉna. Tí sahrĩnopʉ ti sãahti sopaca cjihto sehere ti cjã turi cahsaro mehne duhu yoroca boro, dʉcata dapoha. Tó sehe yoa, tí wʉhʉre tuhsʉ dapoha Moise.

Cohamacʉ ya wʉhʉre ti tuhsʉri baharo, tí wʉhʉ buipʉ me curua sʉrʉcʉ sʉha

³⁴ To tuhsʉri baharota, Cohamacʉ jiri curua, me curua sehe tí wʉhʉre bihaa wahaha. Ã wahachʉta, Yawe to si sitea cʉ̃hʉ tí wʉhʉre tuaro si site sahsea wahaha.

³⁵ Ã wahachʉ, Moise sehe tí wʉhʉpʉre ne sãa masieraha.

^36-38 Baharo tí curua, Yawe to jiri curua sehe tjuwe mʉja, to ya wʉhʉ buipʉ sʉrʉcʉ sʉa wahaha jʉna. Ã yoa tí curuare israe masa sehe masa marienopʉ waharucua, ã ñʉa tiha. Dachore me curua yoaro sehe bajurucua tiha tí curua. Ñami sehere picha pohna yoaro sehe bajurucua tiha. Tí curua to wahachʉ ñʉa, israe masa cʉ̃hʉ ti tʉã dapo, ti jia wʉhʉserire nawe dijo, cahno, tí curua baharo nʉnʉ ti wahcã mʉjaa tiha. Tí curua wahaerachʉ ñʉa, tina cʉ̃hʉ wahaera tiha.