Éxodo 26 - Wanano OT Portions

Yawe to ya tahtia cjihto warore duhu yoroca boro, ti dʉcatahti cahsaro cjihtore yoa dutiha

³¹ Ã yoa Yawe õ sehe yoa duti namoha Moisere tjoa: —Cjã tu mihniina, cʉ̃ cahsaro pjiri cahsaro yʉhʉre cjã tubasajaro. Tí cahsarore yoa taa, payʉ yuta poca, soro sehe, soro sehe bajua poca mehne cjã tubasajaro yʉhʉre. Yahsaa poca, ñapi ñia yoaro sehe bajua poca, sohãa poca, ã jichʉ poto yehsea poca mehne cjã tubasajaro yʉhʉre. Ã yoa tí cahsaropʉ, pʉa masʉ, wʉa pahmari cjʉaa masʉ awicã mehne pihõ, dahrebasajaro yʉhʉre.

³² ‘Ã yoa comaa plata cjoari, pititia cjoari yʉhʉre dahrebasajaro. Tí cjoari sehe tí wʉhʉ puhichapʉ sari pahrẽ sehe, ti duhu cũ mʉ pahãhti cjoari jijaro. Tí cjoari dacho macai susua cjoari cʉ̃hʉ jijaro. Tí coparipʉ acacia yucʉri botarire duhu sãa dapohti cjihti jijaro. Ã yoa tí botari sehe uru mehne ti dahrea cahsari mehne ti duhu õa botari jijaro. Tí botari sohtoari docacãi pja yawiri, uru mehne ti yoa yawiri cjʉaa botari jijaro. Tuhsʉ, tí yawiripʉ, yʉ cjã tu dutiri cahsarore duhu yoroca borohti yawiri jijaro.

³³ ‘Ã yoa tí wʉhʉ mohaa cahsari sari pahrẽ sehere, to dohsa wahã sʉri da docacãi tí cahsarore duhu yoroca boro, yʉ ya tahtia waro cjihtore dʉcatajaro tina. Dʉhsari tahtia sehe yʉhʉre dahra cohtaina sahsero ti sãa ta mʉjahti tahtia cjihto jijaro. ‘Ã yoa yʉ mʉsare yoa dutia yʉ joa õa pjĩnine wihbohti caro sehe, ti duhu yoroca boro, dʉcatahti cahsaro baharo bʉhʉsehe sehei, yʉ ya tahtia pahrẽ sehei jijaro tí caro —ni yahu namoha Yawe Moisere.