Éxodo 24 - Wanano OT Portions

Yawe to dutirire cua pisaro mehne yʉhti dʉcaha israe masa

¹ Ã yoa Yawe tʉ̃cʉpʉ jiro, õ sehe niha Moisere: —Dijaa, yʉ mʉhʉre yahuare israe masare yahu turiai wahaga. Yahu tuhsʉ, pari turi õpʉ mʉja taga tjoa. Ã mʉja tai, Aarõre, ã jichʉ to pohna Nadabe, Abiú cʉ̃hʉre pji mʉja taga. Tuhsʉ, paina mʉ doca macaina pʉhtoare setenta waro bese, tina cʉ̃hʉre pji mʉja taga. Mʉja wihi, yoa cureropʉ tjuarʉcʉ sʉ, na tuhcua caha sʉ, yʉhʉre ño payoga mʉsa.

² Mʉsa ño payori baharo, mʉhʉ cʉ̃irota yʉhdʉ mʉja ta, yʉ cahapʉ wihiga. Ã yoa mʉhʉ mehne mʉja tahtina sehe yʉ cahacãpʉ wihiro marieno mʉsa ño payohti cuhtupʉta tjuajaro. Ã yoa paina masa yahpapʉ ducuina cʉ̃hʉ õpʉre mʉja taea tjijaro —ni yahuha Yawe Moisere.

³ To ã ni yahuchʉ tʉhoro, Moise sehe to coyea cahapʉ dijaa, jipihtia Yawe to yoa dutirire tinare yahu turiaha. To yahuchʉ tʉhoa, israe masa sehe õ sehe ni yʉhtiha tirore: —Jipihtia Yawe to yoa dutiare yoanahtja sã —ni yʉhtiha.

⁴ Ti ã ni yʉhtichʉ tʉhoro, Moise sehe jipihtia Yawe to yoa dutirire joa na, wihboha. Ã yoa pa dacho bohrea caharoi tʉ tʉ̃cʉ dahpotoi cʉ̃ tuhu tãa mehne dahre mʉoha. Tí tuhu sehe wahiquinare wajã, duhu payo, ti jʉ̃ wa mʉohti tuhu cjihto jiha. Tí tuhure dahre mʉo tuhsʉ, tí tuhu cahai bʉjʉa tãa pjĩni, doce pjĩni waro duhu dapoha. Tina cʉ̃ curua macaina jipahta, doce curuari tju wa dapo, jiri curuare tí curuaripere duhu dapobasaro niha Moise.

⁵ Tí pjĩnine dapo tuhsʉ, cãina wahma yapiare pjiroca, õ sehe niha tinare: —Wachʉa wihãa cureinare wajã, pjainata Yawepʉre jʉ̃ wa mʉoga mʉsa. Baharo paina tó sehe jiinareta wajã, tina sehere wiho yihso, cãa sirire jʉ̃ wa mʉoga. Dʉhsaa siri sehere tóihta jipihtina mari israe masa pʉhõ chʉjihna. Ã pʉhõ chʉna, õ sehe ni wacũjihna mari: “Cohamacʉ marine to ya curua cjihti wahachʉ yoahre” ni, wahchea mehne wacũjihna mari —niha Moise tinare. To ã nichʉ tʉhoa, tina wahma yapia sehe to dutiro seheta yoaha.

⁶ Baharo Moise sehe wahiquina ti wajãrina cjiri dire dacho maca mehne waparipʉ pio na, wihbo dapoha. Dʉhsaa di sehere to dahre mʉori tuhupʉ wajã site sihõha cua pisaro mehne.

⁷ Wajã site sihõ tuhsʉ, Yawe to yoa dutirire joa na, to tju turẽri tiare na, israe masare ni ñoha. To ni ñochʉ tʉhoa, israe masa sehe tirore õ sehe ni yʉhtiha: —Jipihtia Yawe to dutiare yʉhdʉrʉcaro marieno yoanahtja sã —ni yʉhtiha.

⁸ Ti ã ni yʉhtichʉ tʉhoro, Moise sehe to wihbo dapoa dire na, cua pisaro mehne tinapʉre wajã site sihõha. Wajã site sihõnota, õ sehe ni yahuha tinare: —Yawe marine, payʉ masa curuari watoi jiri curuare to ya curua cjihto besehre. To ã besechʉ, mʉsa cʉ̃hʉ, “Yawe marine to yoa dutiare yʉhdʉrʉcaro marieno yoanahtja sã” ni, yʉhti tuhsʉra. Ã jiro Yawe to basi marine cua pisaro mehne ahri di mehne mari tiro mehne durucuriro seheta mipʉre cua pisaro mehne tíre mari yoa dʉcahtire ñono nina tiro marine —ni yahuha Moise tinare.

⁹ Ã ni yahu tuhsʉ, tʉ̃cʉpʉ pari turi mʉjaa wahaha Moise. Tiro mehne Aarõ, Nadabe, Abiú, ã jichʉ Moise doca macaina pʉhtoa setenta cʉ̃hʉ mʉjaha.

¹⁰ Mʉja sʉ, ti pʉhtoro Cohamacʉre ñʉha tina. Ti ñʉchʉ, to ducuri yahpa sehe tãa poca wapa tia poca, noano yahsaa, co sitia poca chori mehne ti yoari yahpa yoaro sehe bajuri yahpa choro jiha to ducuro. Wete marieni dachore mari ñʉ mʉochʉ, noano yahsaro yoaro sehe bajuri yahpa choro jiha to ducuri yahpa.

¹¹ Ã yoa tina israe masa pʉhtoa Cohamacʉre bajuroi ti ñʉpachʉta, tiro sehe tinare ne soro yoaeraha. Ã jia to ñʉrocaroihta chʉ, sihni, yoaha tina.

Moisere tʉ̃cʉ Sinaípʉ jirirore mʉja ta namo dutiha Yawe

¹² Baharo, Yawe Moisere õ sehe niha tjoa: —Ahdʉ tʉ̃cʉpʉ mʉja ta namoga. Mʉja ta namo, yʉ cahai tjuasiniga. Tãa pjĩnine, yʉ dutiare yʉ joa õa pjĩnine mʉhʉre wai tai nija, tí pjĩni mehne israe masare noano mʉ yahuhto noano —niroca dijoha tirore.

¹³ To ã nichʉ tʉhoro, to mʉjaa namohto pano, Josué tirore yoadohoriro mehne ti naahtire cahnoyuha Moise.

¹⁴ Cahnoyu tuhsʉ, bʉcʉna setenta to doca macaina pʉhtoare õ sehe ni yahu quihõha: —Sãre õihta cohtaga mʉsa. Ã yoa Aarõ, ã jichʉ Ur cʉ̃hʉ õihta mʉsa mehne tjuaahca. Ã jina mʉsa sehe mari ya curuapʉre dohse jia mijoa wahachʉ, tíre cahno bihoerahna, tina cahai wahaga. Tina mʉsare cahnodohoahca —ni yahu quihõha Moise bʉcʉnare, setenta to doca macaina pʉhtoare.

¹⁵ Ã ni yahu tuhsʉ, mʉja namoa wahaha jʉna. Ti mʉjarucuro watoi, tʉ sohtoare me curua ji biharʉcʉ sʉa wahaha.

^16-17 Tí me curua biharo wato, Yawe sehe tʉ sohtoapʉ duji pja sʉha. To duji pja sʉchʉta, tʉ sohtoa sehe noano si sitea wahaha. To si siteare israe masa ti ñʉchʉ, tʉ sohtoapʉ pichaca pjíro to jʉ̃rucuro yoaro sehe ñano cuaro wʉrʉ bajurucuha. Tuhsʉ, me curua cʉ̃hʉ tʉre seis dachori waro biharucuha. Seis dachori pihti, pa dacho waharo waroi, Yawe sehe Moisere mʉja ta namo dutiha.

¹⁸ To mʉja ta namo dutichʉ tʉhoro, Moise sehe mʉja namo, me curuare yʉhdʉ sãa, to cahapʉ sʉha. Tópʉ sʉ, cuarenta dachori, cuarenta ñamini jiha jʉna.