Éxodo 15 - Wanano OT Portions

Moise to masa curua mehne Yawere basa payoha

¹ Ã yoa Sohãri Mare to coyeare sʉho pahã sʉrʉcʉ sʉ, tina mehne õ sehe ni, Yawere basa payoa tiha Moise: —Yawe to tua yʉhdʉrʉcʉ sʉa tiare ñona yʉhʉre. Tiro cawaloa buipʉ pisa, cahma wajãa tainare dia pjiri mapʉ mio wajãnocana. Ã jicʉ tirore basa payoja.

² Yawe yʉhʉre tuariro wahachʉ yoara. To ã yoachʉ, wahchero mehne tirore basa payoja. Tirota yʉhʉre yʉhdʉ witichʉ yoara. Tiro yʉ Cohamacʉ waro jira. Ã jicʉ yʉhʉ tirore ã ño payorucuihtja. Tiro yʉ pʉcʉ cjiro to ño payoriro Cohamacʉta jira. Ã jicʉ pjiriro to ji yʉhdʉrʉcʉ sʉa tiare masicʉ, tirore ã basa payorucuihtja.

³ Tiro Yawe cahma wajã tua yʉhdʉrʉcʉ sʉriro jira. Tuhsʉ, ã catirucuriro cʉ̃hʉ jira. Ã jiro “Yawe” wama tira tiro.

⁴ Tiro faraõ surarare, tuhsʉ ti cahma wajã bʉso cʉ̃hʉre ahri ma, dia pjiri mai mio wajãnocana. Ti pʉhtoa, noano cahma wajã tuaina cʉ̃hʉre dia pjiri ma Sohãri Mai mini yaria pihtia wahachʉ yoara.

⁵ Dia pjiri ma topapʉ tina cjiri diha caha sʉ pihtia wahara. Ã jia tãca tí ma topapʉ to diha caha sʉboro seheta diha caha sʉ pihtia wahara tina cjiri.

⁶ Mʉhʉ Yawe, tua yʉhdʉrʉcʉ sʉriro jira. Ã jicʉ masa ti yoaeraboare yoara. Mʉhʉre ñʉ tuhtiinare mʉ dʉte siteboro seheta tinare wajã pahñonocana mʉhʉ.

⁷ “Tirore mari cahma wajã yʉhdʉrʉcajihna mari” ni, tʉhotumarinare mʉhʉ seheta mʉ tua yʉhdʉrʉcʉ sʉa tia mehne tinare cahma wajã yʉhdʉrʉcanocara. Mʉ suachʉ, picha pohna wʉrʉ jʉ̃ mʉjarucuro yoaro sehe wahara. Tí pichaca wʉrʉ tjare to jʉ̃ pahñoboro seheta mʉhʉ sehe tinare mio wajã pahñonocara.

⁸ Ã yoa putirocaro yoaro sehe wihnonore mʉ warocachʉ, tí ma dacho macare cʉãno jimariro cjiro pʉ bʉhʉseheri sururʉcʉ sʉa waha, co sehe biha dʉcataro yoaro seheta bʉtirʉcʉ sʉa wahara.

⁹ Ã yoa sãre ñʉ tuhtiina sehe õ sehe ni durucuri jimahre: “Tinare nʉnʉ ti wahcã, mʉ sʉnocajihna mari. Mʉ sʉ, ti yare ma, noho puro mari cahmano puro mari basi cahma tju wajihna. Ã yoana, dohse jia mari cahmaa mehne tjuanahca mari. Tuhsʉ, tinare mari cahma wajãa pjĩni mehne wajã pahñonocajihna” ni, durucuri jimahre tina.

¹⁰ Ti ã ni durucuri baharo jipachʉta, mʉhʉ sehe putirocaro yoaro sehe wihnonore warocara. Mʉ ã warocaro mehne ahri mapʉ mini yaria pihtia wahara tina. Picha yapa diapʉ to diha caha sʉboro seheta bʉjʉa pahcõri tiropʉ diha pihtia wahara tina.

¹¹ Yawe, mʉ yoaro sehe jiriro pairo cohamacʉ mariahca. Tuhsʉ, ne mʉ yoaro sehe buhiri marieriro, noariro ji yʉhdʉrʉcʉ sʉriro cʉ̃hʉ mariahca. Masa ti yoaeraboare, tuhsʉ, masa ti ñʉ cʉachʉ yoaa barore yoariro jira mʉhʉ.

¹² Mʉ tua yʉhdʉrʉcʉ sʉa tia mehne sãre nʉnʉ timarinare yahpa to chʉ cohãboro seheta diapʉ mini yaria pihtia wahachʉ yoara mʉhʉ.

¹³ Mʉhʉ sãre ã cahĩrucura. Ã jicʉ sã mʉ yʉhdorinare noano sʉho mʉ tãrucura mʉhʉ. Tuhsʉ, tuariro mʉ ji yʉhdʉrʉcʉ sʉa tia mehne sãre mʉ besebasari yahpapʉ naai nina mʉhʉ. Tí yahpapʉ mʉhʉ sehe noariro mʉ jia tia mehne sãre sʉho jiihca.

¹⁴ Tí yahpapʉ sãre mʉ naa quitire masa curuaripe macaina tʉhoahca. Tí quitire tʉho cʉaa wahaahca tina. Ã cʉaa, cuiro mehne tuaro tetereahca tina. Filisteo masa cʉ̃hʉ cuia, purĩnore ti caboro seheta tina cʉ̃hʉ ñano tʉhotuahca.

¹⁵ Edomo masa curua pʉhtoa cʉ̃hʉ tuaro cuiahca. Tuhsʉ, moabita masa curua pʉhtoa cʉ̃hʉ cuiro mehne tetereahca. Ã yoa jipihtina Canaã yahpa macaina cʉ̃hʉ cuiro mehne, “Tinare bihosi mari” ni, tʉhotuahca.

¹⁶ Wacũenoca tinare cuaro pja sʉchʉ, cʉa yʉhdʉa wahaahca tina. Yawe, tua yʉhdʉrʉcʉ sʉriro mʉ jia tia quitire tʉho cʉa waha, ne dohse yoa masisi tina. Ti ã wahachʉ, sã, mʉ wiorina, tuhsʉ, mʉ yaina wahachʉ mʉ yoarina sehe ti ya yahpari cahai yʉhdʉ wahcãnahca. Sã ã yʉhdʉ wahcãchʉ, tina sehe tãca mʉnánoi to coãno yoaro seheta sãre ne soro yoasi.

¹⁷ Ti ã waharo wato, mʉhʉ sehe mʉ beseri tʉ̃cʉpʉ sãre naa sʉihca. Tʉre besecʉ, mʉhʉ sehe õ sehe ni tʉhotuhre: “Ahdʉ tʉ̃cʉpʉ yʉhʉre ti ño payoa tachʉ, cahmaja yʉhʉ. Yʉhʉ cʉ̃hʉ tina mehne tʉpʉ jiihca” ni, tʉhotuhre mʉhʉ. Ã jicʉ tʉpʉ sã cʉ̃hʉre noano jinocachʉ yoaihca mʉhʉ.

¹⁸ Tópʉ mʉhʉ sehe sã pʉhtoro ã jirucuihca —ni, basa payoha Moise, to coyea mehne.

Miriã to coyea numia mehne Cohamacʉre basa payoa tiha

¹⁹ Ã yoa israe masa dia pjiri mare, wʉa caha sʉri mahapʉ pahãa wahaa tiha. Ti pahãchʉ ñʉa, faraõ surara cʉ̃hʉ, ti cahma wajãa bʉso mehne, tuhsʉ ti cawaloa mehne tí mahapʉ ti baharo pahãmaha. Ti pahãchʉ ñʉno, Yawe sehe tí mahare pari turi co wʉrʉ ji mʉa wahachʉ yoaha. Ã yoaro, tinare noano mini yaria pihtia wahachʉ yoaha.

²⁰ Yawe to ã yoachʉ ñʉno, Aarõ wahmiono, Miriã, Cohamacʉ yare yahu mʉhtaricoro sehe cʉ̃ tʉ, wachʉ cahsaro mehne ti dahreri tʉre na, tí tʉre cjãnota, dahpo tiha. To ã yoachʉ ñʉa, jipihtina paina numia cʉ̃hʉ tí tʉri barore na, cjãata, tí numia cʉ̃hʉ dahpo tiha.

²¹ Ã yoa Miriã sehe tinare õ sehe ni basa mʉhtaa tiha: —Yawe tua yʉhdʉrʉcʉ sʉriro to jia tiare marine ñona. Tiro cawaloa buipʉ pisa, cahma wajãa tainare dia pjiri mapʉ mio wajã pahñonocana. To ã yoachʉ ñʉja mari. Ã jina tirore basa payojihna mari —ni basa mʉhtaa tiha ticoro.

Co sʉẽa core sʉẽeraa co wahachʉ yoaha Yawe

²² Ã yoa Moise sehe israe masare Sohãri ma dʉhtʉ cahapʉ jimainare wʉari dʉjʉro, yucʉri marieri dʉjʉro, Sur wama tiri dʉjʉropʉ sʉho mʉ tã wahcãa wahaa tiha. Tí dʉjʉrore tia dacho waro waharucua tiha tina. Tia dacho ti waharucuro puro ne core bocaera tiha.

²³ Baharo Mara wama tiroi tinare na sʉa tiha. Tóre co jia timaha. Wiho mejeta ñano sʉẽa co jia tiha. Ã jia tí core sihniera tiha tina. Ã jiro Mara wama tiha tó. (“Mara” nino, “sʉẽ nina” nino nica hebreo masa ya dʉsero mehne)

²⁴ Tóre ti sihniboa co mariachʉ ñʉa, Moise to masa curua sehe to tʉhoeraroi tirore ñano ni, durucu cohtaa tiha. To tʉhoro cʉ̃hʉre tirore õ sehe ni tuhti, sañurucua tiha: —Cjero sãre sã sihnihti core na tabasaga —ni tuhti, sañurucua tiha.

²⁵ Ti ã ni tuhti, sañurucuchʉ tʉhoro, Moise sehe tuaro Yawere yoadohoa siniha. To sinichʉ tʉhoro, Yawe sehe cʉ̃ sicã, yucʉcʉ sicãre tirore ñoha. To ñochʉ, Moise sehe tí sicãre na, co sʉẽa copʉ doca ñoha. To doca ñochʉta, tí co cjiri sehe sihnihto noaa co wahaha jʉna. Ã yoa tói ti jisinichʉ, Yawe sehe, “¿Ahrina yʉ cahmasãano seheta jia tiahcari?” ni, masino taro, tinare õ sehe ni yahua tiha:

²⁶ —Yʉhʉ jija Yawe mʉsa Cohamacʉ. Mʉsare yʉ yahuare noano tʉho, tíre ñaha, yʉ nino seheta jia tiga mʉsa. Tuhsʉ, yʉ dutiare yʉhdʉrʉcaro marieno cjʉaga mʉsa. Yʉ nino seheta mʉsa jia tichʉ ñʉcʉ, egipto masare yʉ buhiri dahrea dohatia baro mehne buhiri dahresi mʉsare. Mʉsa dohatichʉ, yʉhʉta jija mʉsare yʉhdʉchʉ yoariro —niha tinare.

²⁷ Baharo tina israe masa sehe Mara wama tiroi jimarina yʉhdʉ wahcãa, Elĩ wama tiropʉ sʉha. Tói co wijaa copari, doce copari jia tiha. Tuhsʉ, dátil wama tia põ, setenta põ waro jia tiha. Ã jia tói mahari pja tjua caha sʉ, jisinia tiha tina.