Deuteronomio 34 - Wanano OT Portions

Ahri quiti Moise to yariari quiti jira

^1-3 Ã yoa tiro Moise sehe to masa curua mehne Moabe wama tiri yahpai jisinia tiha. Tí yahpa, Moabe yahpa, cʉ̃ bʉhʉsehe sehe tʉ̃ yucʉri marieni yahpa jiha. Pa bʉhʉsehe sehe tʉ̃ yucʉri payʉri yahpa jiha. Ã yoa tí yahpa, tʉ̃ yucʉri payʉri yahpa sehe Nebo wama tiri yahpa jiha. Tí yahpai cʉ̃dʉ tʉ̃cʉ Pisiga wama tidʉ jiha. Tʉ sehe Canaã yahpai jiri maca, Jericó wama tiri maca cahacã curei ducudʉ jiha, Jordão ma pa bʉhʉsehe cjoa sehe. Ã yoa Moise sehe, tʉ̃ yucʉri marieni yahpapʉ jimariro yʉhdʉ wahcã, Yawe to yahu quihõriro seheta tʉ̃ yucʉri payʉri yahpapʉ sʉha jʉna. Tí yahpapʉ sʉro, tʉ tʉ̃cʉ Pisiga wama tidʉ sohtoapʉ mʉjaa wahaha. Tʉ sohtoapʉ to mʉja sʉchʉ, Yawe sehe tirore Canaã yahpare ñono taro niha jʉna. To ñono tachʉ, Moise sehe sʉ̃ sãano poto sehe ducu, ñʉ siteroca ducuro niha. Tói to ñʉ siteroca ducuchʉ, Yawe sehe tirore to ñʉ siterocarucuro caha sehe jia yahparire ño dʉcaha. Wahmanore Neftali ya curua macaina ya yahpa cjihtore ño dʉcaha tirore. Tí yahpare ño tuhsʉ, õpe curuari macaina ya yahpari cjihtire ño namoha tjoa. Manasé ya curua macaina ya yahpa cjihtore, Efraĩ ya curua macaina ya yahpa cjihtore, Judá ya curua macaina ya yahpa cjihtore ño namoha tirore. Pʉ pjiri ma Mediterráneo wama tiri ma dʉhtʉ cahapʉ ñoroca batoha tirore. Baharo pari taño sehe macaa yahparire tirore ño namoha tjoa. Wahmanore poto bʉhʉsehe sehe macaa yahparire ñoha tirore. Galaa wama tiri yahpare ño dʉca, pʉ Dã ya curua macaina ti ya yahpa cjihtopʉ ñoroca batoha tirore. Te sehe macaa yahparire ño tuhsʉ, cõ bʉhʉsehe sehe macaa yahpari cʉ̃hʉre tirore ño namoha tjoa. Te sehe pahrẽ sehere jiha cʉ̃ dʉjʉro, wʉari dʉjʉro, Néguebe wama tiri dʉjʉro. Tí dʉjʉropʉ Moisere ñoroca batoha Yawe. Ã yoa tʉ̃cʉ, to ñʉ siteroca boro ducudʉ dahpoto sʉ̃ sãano caha sehere Jordão ma coã bʉrʉaha. Tí ma pa bʉhʉsehe cjoa sehere Jericó wama tiri maca coãa tiha. Tí macare payʉ põ, dátil wama tia põ jia tiha. Ã yoa Yawe sehe tí macare ñonota, Jordão ma dʉhtʉ cahai jia yahpari cʉ̃hʉre ñoroca bʉro namoha tirore. Pʉ Soá wama tiri macapʉ ñoroca batoha.

⁴ Tí yahparire ño tuhsʉ, õ sehe ni yahuha tirore: —Ahri yahpata jira Canaã yahpa. Ahri yahpare yʉhʉ sehe mʉsa ñʉchʉsʉma cʉ̃hʉ cjiri Abrahã, Isaa, ã jichʉ Jacobo cʉ̃hʉ cjirire cua pisaro mehne õ sehe nia tihi tina cjirire: “Ahri yahpare mʉsa panamana ji turiaina cjihtipʉre waihtja” nia tihi yʉhʉ tina cjirire. Tinare yʉ ã niri yahpa cjirore yʉhʉ sehe mʉhʉre ñʉ siteroca dutii nija. Wiho mejeta mʉhʉ tí yahpapʉ ne sãasi —ni yahuha Yawe Moisere.

⁵ To ã ni yahuri baharota, tiro Moise Yawere dahra cohtariro cjiro sehe tʉ̃cʉ sohtoapʉta yariaa wahaha jʉna. To jisiniri yahpa, Moabe wama tiri yahpaihta yariaa tiha tiro cjiro. Yawe tiro cjirore to niriro cjiro seheta wahaha.

⁶ To yariachʉ ñʉno, Cohamacʉ sehe to pjacʉ cjirore tí yahpaihta tʉ̃ yucʉri watoi jiri dihtapʉ yanocaa tiha. Bete Peo wama tiri maca cahacãi yaa tiha tiro cjirore. To yari cuhtu cjiro sehere ne cʉ̃iro masiera tiha. Mipʉ cʉ̃hʉre to yari cuhtu cjirore masi mahnoeraca.

⁷ Tiro cjiro sehe ciento y veinte cʉhmari cjʉaro waro, yariaa tiha. Tópe cʉhmari cjʉaparota, noano capari ñʉ sʉriro ji, tuhsʉ, pjacʉ tuariro jisinia tiha tiro cjiro.

⁸ Ã yoa israe masa sehe Moise cjiro to yariachʉ, tuaro cahyaa tiha. Tiro cjirore wacũa, dahraro marieno, tuhsʉ, pa sehepʉ waharo marieno cʉ̃ sʉ̃ waro cahyaina jirucua tiha tina.

⁹ Ã yoa tiro Moise cjiro sehe catisininopʉ tirore cohtotahtiro Nũ macʉno Josuére to dapu bui to wamomacarine payo, tirore Cohamacʉre sini payoa tiha. To sini payori baharo, Josué sehe masare to sʉho waja mihnia tiare cjʉa dʉcaa tiha jʉna. Tíre cjʉaro, israe masare noano sʉho wajaa tiha tiro. Ã yoa israe masa cʉ̃hʉ tirore noano yʉhtia tiha. Ã yʉhtia, jipihtia Yawe Moise cjiro mehne to cũri dutiare yʉhtia nia tiha tina.

^10-11 Ã yoa Moise cjiro to yariari baharo, paina to yoaro sehe jiina mariea tiha jʉna. Tiro Moise cjiro sehe Yawe to tuaa mehne õpe yoa mʉjaa tiha. Tiro cjiro sehe Yawe mehne sʉhʉduro, masʉno mehne to sʉhʉduboro seheta sʉhʉdu mʉjaa tiha. Sʉhʉdu, to yahuare israe masapʉre yahu turia, tinare wajaa tiha tiro cjiro. Tuhsʉ, Egipto macariro faraõre, tiro faraõ doca macaina pʉhtoare, ã jichʉ jipihtina egipto masa cʉ̃hʉre ñʉ cʉachʉ yoaa baro chorire yoa ño, tinare buhiri dahre mʉjaa tiha tiro cjiro. Ã yoa ñono, masa ti yoaeraa baro chorire yoa ño, buhiri dahre mʉjano nia tiha tiro cjiro.

¹² Ã yoa to masa curua cʉ̃hʉre Cohamacʉ to tuaa mehne ñʉ cʉachʉ yoaa baro chorire tina cʉ̃hʉre yoa ño, sʉho waja mʉhtaa tiha tiro cjiro. Ã yoa to yariari baharo cʉ̃hʉre jia tiha paina Cohamacʉ yare yahu, israe masare sʉho waja mʉhtaina. Wiho mejeta ne cʉ̃iro Moise cjiro yoaro sehe yoa mʉjariro mariea tiha jʉna.