Deuteronomio 18 - Wanano OT Portions

“Canaã yahpa macaina ti ñano jia tiare ñʉ cũ, jia tiena tjiga mʉsa” ni, yahu turiaha Moise israe masare

⁹ Ã yoa Moise sehe Cohamacʉ to yahurire israe masare õ sehe ni yahu turiaha tjoa: —Yawe mari Cohamacʉ yʉhʉre õ sehe ni, mʉsare yahu turia dutihre: “Mipʉre tiro sehe mʉsare mʉsa noano jinocahti yahpa cjihtore waro taro niyuhca. Ã jina mʉsa sehe tí yahpapʉ sʉna, tí yahpa macaina ñano ti jia tiare ñʉ cũ, yoaerahtina jiyuhca.

^10-14 Tí yahpa macaina sehe Yawe to ñʉ yabiare tuaro yoa mʉjaina jiyuhca. Õpe jiyuhca ti ñaa yoaa. Ti pohnare wajã, ‘Mari cohamanare ño payona nija mari’ ni, jʉ̃ wa mʉo mʉjayuhca tina. Ã yoa ti coyea cãina sehe ñʉweina jiyuhca. Paina sehe yaya jiyuhca. Paina sehe wete yaya jiyuhca. Ã yoa paina sehe dojaina baro jiyuhca. Paina sehe yariaina cjiri mehne durucuina baro jiyuhca. Ã yoa tina mari ya yahpa cjihto macaina sehe pa tehere tinare ñano wahachʉ ñʉa, yairo cahapʉ waha, ‘¿Dohse jiro baro yʉhʉre ã ñano waharo nibocari? Ñʉbasa curega mʉhʉ yʉhʉre’ ni, sinitu ñʉa waha mʉjaa tiyuhca tina. Ã yoa pa tehere ti dohse wahahtire masi duaa cʉ̃hʉ, ñʉweina cahapʉ wahaa, ‘¿Baharopʉre dohse waharohcari sãre?’ ni, sinitu ñʉa waha mʉjaa tiyuhca tina. Ti ã jia tiare Yawe sehe tuaro ñʉ yabiyuhca. Ti ã ñano jia tichʉ ñʉ yabirota, cohã wioro taro niyuhca tiro tinare. Ã cohã wioro, ti cohtotaro, mʉsa sehere tí yahpare pʉ ti, noano jinocachʉ yoaro taro niyuhca tiro. Ã jina mʉsa sehe ti ã ñano jia tiare ñʉ cũ, yoaerahtina jiyuhca. Yawe, mari Cohamacʉ to ñʉrocaroi mʉsa sehe buhiri marieina jia tihtina jiyuhca.

¹⁵ ‘Ã yoa yʉhʉre õ sehe ni, mʉsare yahu namo dutihre tiro. Cʉ̃ dacho cʉ̃iro mari ya curua macarirore bese, to yare mʉsare yahu mʉhtahtiro cjihtore cũhto jiyuhca. Ã jiro tiro to besehtiro cʉ̃hʉ yʉ yoaro seheta to yahuare tʉho, mʉsapʉre yahu turia mʉjahtiro jihto jiyuhca tiro cʉ̃hʉ. Ã yoa mʉsa sehe to yahu turiaare tʉhona, tirore yʉhdʉrʉcaro marieno yʉhti mʉjahtina jiyuhca.

¹⁶ Tiro Yawe sehe sohõ jiri pjapʉre tʉ̃cʉ Sinaí dahpotopʉre mʉsa cahmachu, yʉhʉre mʉsa sinirire tʉhoa tiyuhca. Tí pjapʉre mʉsa sehe yʉhʉre õ sehe ni sinia tire: ‘Yawe sã Cohamacʉ sãre pjiri pichaca wʉrʉre to ñochʉ, cui yʉhdʉaca sã. Tuhsʉ, to basi to durucuare tʉhona cʉ̃hʉ, cui yʉhdʉaca. Ã cuina, yariaa waha duaca sã. Sã ã cuichʉ, Yawe sehe sãre pja ñʉno, ã yoa namoero tjijaro’ ni, sinia tire mʉsa yʉhʉre.

¹⁷ ‘Mʉsa yʉhʉre ã ni sinirire tiro Yawe sehe ‘Ahrina quihõno sinia nina’ ni, tʉhoa tiyuhca.

¹⁸ Ã jiro tiro michapucacã yʉ nino seheta cʉ̃iro mari ya curua macarirore bese, to yare mʉsare yahu mʉhtahtiro cjihto cũhto jiyuhca tiro. Ã yoa tiro to besehtiro cʉ̃hʉ yʉ yoaro sehe jia tihtirota jihto jiyuhca tiro cʉ̃hʉ. Yawe sehe mʉsare to yahu duaare tiro sehere yahu mʉjahto jiyuhca. To ã yahu mʉjachʉ, tiropʉ mʉsa sehere yahu turia mʉjahto jiyuhca.

¹⁹ To ã yahu turia mʉjachʉ, mʉsa sehe tirore yʉhdʉrʉcaro marieno to yahuro seheta yoa mʉjahtina jiyuhca. Noa to yahuare yʉhdʉrʉcaina pinihtare Yawe to basita tinare buhiri dahrehto jiyuhca.” Ã ni yʉhʉre Yawe mʉsare yahu turia dutihre —ni yahuha Moise israe masare.