2 Samue 7 - Wanano OT Portions

Davire to noano wahachʉ yoahtire yahu cũa tiha Yawe. Tuhsʉ, tirore ji turia dijahtinare to noano wahachʉ yoahti cʉ̃hʉre yahu cũa tiha

¹ Ã yoa Davi pʉhtoro to jichʉ, Yawe sehe tirore noano yoadohoa tiha. To ã yoadohochʉ, tiro sehe jipihtina tirore ñʉ tuhtiinare cahma wajã yʉhdʉrʉca pahñonocaa tiha. Ã cahma wajã yʉhdʉrʉca pahñono, pa sehepʉ waha, cahma wajã tinino marieno, pʉhtoro jiro to jiri wʉhʉ wʉrʉpʉ jinocaa tiha jʉna.

² Tí wʉhʉpʉ jiro, cʉ̃ nʉmʉ Cohamacʉ yare yahu mʉhtariro Natãre õ sehe niha Davi: —Yʉhʉ sehe pʉhtoro jicʉ, ahri wʉhʉ noari wʉhʉ wʉrʉpʉ noano jinocaja. Ã noari wʉhʉ wʉrʉpʉ yʉ jinocano wato, Cohamacʉ to cũri dutiare mari wihbori caro sehe mari tʉã dapori wʉhʉcã, wiho jiputiari wʉhʉcã cjiropʉ jira —niha Davi Natãre.

³ To ã nichʉ tʉhoro, Natã sehe tirore õ sehe ni yʉhtiha: —Ãta jira. Quihõnota jira mʉ ã ni tʉhotua. Mʉhʉ mari Cohamacʉ Yawere to ya wʉhʉ cjihto yoabasa duai, yoabasaga. Cohamacʉ mʉhʉre noano piti tira. Tuhsʉ, tiro jipihti mʉ yoa duaa cʉ̃hʉre noano wahachʉ yoahre. Ã jiro ahri dahraa cʉ̃hʉre noano wahachʉ yoarohca —ni yʉhtiha Natã tirore.

⁴ To ã ni yʉhtiri baharo, tí ñamiihta Natãre õ sehe niha Yawe:

⁵ —Davi, yʉ cahamacʉnore õ sehe ni yahubasai wahaga mʉhʉ: “Tiro jierara yʉ ya wʉhʉ, noari wʉhʉ wʉrʉ cjihtore yʉhʉre dahrebasahtiro.

⁶ Panopʉta israe masa curuare Egipto yahpapʉ jiri curuare na wio, yʉ na taa tiri pjapʉta wʉhʉ, noari wʉhʉ wʉrʉ maera tihi yʉhʉ. Ã maerai, israe masa ti õpʉ tarucua tiri pjapʉre ti tʉã dapo mʉjari wʉhʉcãpʉ jia tihi yʉhʉ. Te mipʉ cʉ̃hʉre tí wʉhʉcãpʉta jisinija yʉhʉ.

⁷ Ã yoa tinare sʉho waja mʉhtahtina cjihti yʉ sõ mʉjaina cʉ̃hʉre ne cʉ̃irore wʉhʉ, noari wʉhʉ wʉrʉ siniera tihi yʉhʉ tina cjirire.

⁸ Ã nicʉ, ‘Davi to tʉhotua ña nina’ nii nieraja. Noa nina to tʉhotua. Ã jicʉ mʉhʉ sehe yʉhʉ mʉsa Cohamacʉ Yawe Jipihtina Bui Ji Yʉhdʉrʉcʉ Sʉrirore õ sehe ni Davi, yʉ cahamacʉnore yahubasa namoga: Yʉhʉta jia tihi tiro cʉ̃hʉre panopʉre ovejaare ñʉ wihbo cohtariro to jia tiri pjapʉre pʉhtoro cjihto besei. Ã besei, yʉ ya curua israe masa curua ti pʉhtoro choro cjihto sõa tihi yʉhʉ tirore.

⁹ Ã yʉ sõri baharore nohoi to waharoi yʉhʉ cʉ̃hʉ tirore ã piti tirucua tihi. Ã piti tirucui, yʉhʉta jipihtina tirore ñʉ tuhtiinare to cahma wajã yʉhdʉrʉcachʉ yoa mʉjaa tihi tirore. ‘Ã yoa mipʉre tirore õ sehe wahachʉ yoa namoihtja tjoa. Jipihtina masa curuari macaina ti wacũnohoriro choro wahachʉ yoaihtja yʉhʉ tirore. Ã yoai, paina ahri dacho macaina pʉhtoa chorire masa ti wacũno yoaro seheta tiro cʉ̃hʉre masa ti wacũnohoriro jichʉ yoaihtja.

^10-11 ‘Ã yoa mipʉ mʉsa yʉ ya curua macaina mʉsa jiri yahpa cʉ̃hʉre yʉhʉta jia tihi, mʉsare besebasariro. Ã besebasai, cuiro marieno, tuhsʉ, cahma wajãno marieno noano mʉsa jinocahti yahpa cjihtore besebasai nia tihi yʉhʉ mʉsare. Wiho mejeta ahri yahpapʉ wihi, mʉsa ji dʉcari baharore payʉ masa curuari macaina ñaina cahma wajã yʉhdʉrʉca sãa ta, mʉsare ñano dutipe mʉjana. Ã yoa mipʉre ã waha mʉjasi jʉna. Yʉhʉ yʉ basita tiro Davire cahma wajãno marieno noano mʉsare to sʉho jinocachʉ yoaihtja. ‘Ã yoa ahri cʉ̃hʉre yʉhʉre tirore yahubasaga: Tirore ji turiahtina cjihti cʉ̃hʉre pʉhtoa ti ji cohtota turia tia cʉ̃hʉre pihtichʉ yoasi. Ã pʉhtoa ji cohtota turia wahcãrucuchʉ yoaihtja yʉhʉ, to ya da macainare.

¹² Ã jii yʉhʉ sehe, to yariari baharo, cʉ̃iro to macʉnore bese, to cohtotaro pʉhtoro sõihtja. Ã sõi, tiro cʉ̃hʉre pʉhtoro tuariro choro jichʉ yoaihtja. Yʉ ã yoachʉ, tirore ne cʉ̃ curua macaina yʉhdʉrʉca duaa, bihosi.

¹³ Ã yoa tiro yʉ besehtiropʉ jirohca jʉna yʉ ya wʉhʉ cjihtore dahrebasahtiro cjihto. Ã yoa to yariari baharo cʉ̃hʉre to macʉnota tirore pʉhtoro ji cohtota turia wahcãnohca. Ã yoa to pohna, to panamana tirore ji turiaa cʉ̃hʉ ã dihta pʉhtoro ji cohtota turia wahcãahca.

¹⁴ ‘Ã yoa Davi macʉno yʉ besehtiro sehe yʉ macʉ yoaro sehe jiro ninohca. Ã jii yʉhʉ cʉ̃hʉ tirore to pʉcʉro yoaro seheta jii niihca. Ã jii, tiro yʉhʉre to yʉhdʉrʉca mʉjachʉ, masa ti pohnare ti buhiri dahrero seheta yʉhʉ cʉ̃hʉ buhiri dahre mʉjaihca tirore.

¹⁵ Ã buhiri dahre mʉjapaihta, pʉhtoro Saulo cjirore yʉ yoariro cjiro sehe yoasi. Ã jicʉ pʉhtoro to jirore masi yʉhʉ tirore. Ã pja ñʉrucu, ã noano yoarucuihtja yʉhʉ tirore.

¹⁶ Ã yoa yʉ niriro cjiro seheta Davi cʉ̃hʉre to pʉhtoro to jiare masi yʉhʉ. To ya curua macaina cʉ̃hʉre pʉhtoa ti ji cohtota turia tiare ne masi.” Ã ni, yʉ cahamacʉno Davire yahu turiabasai wahaga mʉhʉ yʉhʉre —niha Yawe Natãre.

¹⁷ To ã ni yahuri baharo, Natã sehe Davi cahapʉ waha, jipihtia Yawe to yahu dutirire tirore yahuha.