2 Samue 5 - Wanano OT Portions

Davi jipihtina israe masa ti pʉhtoro sãa tiha

¹ Ã yoa tí pjapʉre Davi sehe Judá cjiro ya curua macaina pʉhtoro jia tiha. Ti pʉhtoro jiro, Hebrõ wama tiri macapʉ jia tiha tiro. Ã yoa tópʉ to jichʉ, cʉ̃ nʉmʉ paina to coyea israe masa curuari, once curuari macainare sʉho ji mʉhtaina sehe tiro mehne sʉhʉdua sʉa tiha. Ã sʉhʉdua sʉa, õ sehe niha tina tirore: —Mari payʉ curuari tju wa dapo jipanahta, cʉ̃ curua macaina jina nija.

² Ã yoa mari coyeiro Saulo cjiro mari pʉhtoro to jia tiri pjapʉre, mʉhʉta jia tire jipihtina mari israe masa curua macainare sʉho cahma wajã mʉhtariro. Ã yoa tí pjapʉta mari Cohamacʉ Yawe cʉ̃hʉ mʉhʉre õ sehe ni cũa tiri jire, “Yʉ ya curua, israe masa curua pʉhtoro cjihto jiihca mʉhʉ. Ovejaa ñʉ wihboriro ovejaare to noano ñʉ wihboro seheta mʉhʉ cʉ̃hʉ yʉ ya curuare noano ñʉ wihbohtiro cjihto jiihca” ni cũ tuhsʉa tiri jire Cohamacʉ Yawe mʉhʉre. Ã jina sã cʉ̃hʉ sã pʉhtoro rey mʉ jichʉ cahmaja —niha tina tirore.

³ Ti ã nichʉ tʉhoro, Davi sehe õ sehe ni yʉhtiha: —Yawe sehe mʉsa ã niare tʉhoca. Ã jicʉ yʉhʉ cʉ̃hʉ to tʉhorocaroi cua pisaro mehne “Ãta jijaro” ni yʉhtija mʉsare —ni, yʉhtiha tiro tinare. To ã ni yʉhtichʉ tʉhoa, tina sehe olivo sere to dapu bui pio payo, tina cʉ̃hʉ tirore pʉhtoro sõha. Tó sehe yoa, tina jipihtina doce curuari macaina Davire pʉhtoro rey cjʉa dʉcaa tiha jʉna.

^4-5 Ã yoa Davi coã pʉhtoro ji dʉcaro, treinta cʉhmari cjʉaa tiha. To pʉhtoro jia cʉhmari õpe cʉhmari jia tiha. Hebrõ wama tiri macapʉ, to coyea Judá cjiro ya curua macaina warore ti pʉhtoro jiro, siete cʉhmari noano, pa cʉhma dacho maca waro ti pʉhtoro jia tiha. Ã yoa paina to coyea once curuari macaina cʉ̃hʉ tirore ti pʉhtoro sõa sʉri baharo sehere tiro tina jipihtina doce curuari macainare treinta y tres cʉhmari waro sʉho pʉhtoro ji namoa tiha tjoa, Jerusalẽ wama tiri macapʉ. Ã jiro jipihtiro cuarenta cʉhmari noano, pa cʉhma dacho maca waharoi, tópe cʉhmari pʉhtoro jia tiha Davi.