2 Reyes 25 - Wanano OT Portions

Israe yahpa macainare to buhiri dahreriro cjiro seheta Judá yahpa macaina cʉ̃hʉre buhiri dahrea tiha Yawe

¹ Ã yoa tí pjapʉre Judá yahpa macariro pʉhtoro Sedequia wama tiriro jia tiha. Tiro Sedequia sehe pʉhtoro jiro, Jerusalẽ wama tiri macapʉ jia tiha. Ã yoa tí yahpare ocho cʉhmari waro noano pʉhtoro jia tiha tiro. Ã yoa pa cʉhmare diez sʉ̃ri to pʉhtoro ji wahcãrucuchʉ waro, Babilonia yahpapʉ macariro pʉhtoro Nabucodonoso wama tiriro sehe, to surara mehne Jerusalẽpʉ tiro Sedequia mehne cahma wajãno sʉa tiha. Ã cahma wajãno sʉro, tí maca dʉhtʉ cahai to surara peri mehne noano soroa bihatorʉcʉ sʉ, bʉcʉa caha jia tiha. Tí maca Jerusalẽ sehe tãa ti pohaa pahtari mehne bʉtiro ti sahrĩ sãari maca jia tiha. Ã jia Nabucodonoso cʉ̃hʉ sehe tí sahrĩnore yʉhdʉ sãa dua, dihta tuhuri wʉri poho cũ majarea tiha tí sahrĩno dʉhtʉ cahai.

^2-3 Ã yoa tina cʉ̃ cʉhma noano, pa cʉhma dacho maca waro Jerusalẽre bʉcʉa cahaa jia tiha. Tó puro yoari pja ti bʉcʉa caha jichʉ, tí maca macaina sehe ti chʉboa tjoaa waha, jʉca baa niha.

⁴ Ã yoa cʉ̃ dacho Nabucodonoso surara sehe Jerusalẽ macari sahrĩnore cʉ̃ copa pohawe sãa wahaha. Ti ã pohawe sãachʉ, Sedequia sehe tí ñamihta to toaa jiri cuhtui to surara mehne waha, to ya wʉhʉ macari sahrĩno sopacapʉ wijaa wahaha. Wijaa, tí maca macari sahrĩno sopaca cʉ̃hʉre yʉhdʉ wijaa wahaha. Yʉhdʉ wijaa, Jordão mapʉ buhari mahai duhti wahcãa wahaa timaha tiro, ti bʉcʉa caha jiro watoihta.

⁵ Ti ã duhti wahcãchʉ, Nabucodonoso surara cʉ̃hʉ sehe tinare ñʉ boca, tinare mʉroca nʉnʉ ti wahcãha. Mʉroca nʉnʉ ti wahcã, pʉ Jericó wama tiri maca cahacãpʉ tinare mʉ sʉa taapʉ niha. Ti mʉ sʉa tachʉ ñʉa, Sedequia surara sehe tirore mʉ cõ, duhti site wahcãa wahaha.

⁶ Ti ã duhti site wahcãri baharo, Nabucodonoso surara sehe Sedequiare ñahanocaha jʉna. Ñaha tuhsʉ, ti pʉhtoro Nabucodonoso cahapʉ peresu naa wahaha. Tiro sehe tí pjare Siria yahpapʉ jiri maca, Ribilapʉ jia tiha. Tópʉ ti na sʉri baharo, Nabucodonoso sehe Sedequiare to buhiri tirire yahuha, tirore to buhiri dahrehto pano.

⁷ Yahu tuhsʉ, to ñʉrocaroihta to pohnare wajãnoca dutiha. Ti wajãri baharo, ti pʉcʉro Sedequiare to caparire cjã tihãnoca dutiha. Ã yoa comaa dari mehne tirore dʉhte, Babilonia yahpapʉ peresu naa turiaa tiha.

⁸ Ã yoa cʉ̃ sʉ̃ baharo, Nebusaradã wama tiriro Jerusalẽpʉ wihia tiha. Tiro sehe Nabucodonoso to surara pʉhtoro jia tiha. Tuhsʉ, to pʉhtoro Nabucodonoso to yoahtire durucu cahnodohoriro cʉ̃hʉ jia tiha tiro. Ã yoa Jerusalẽpʉ to wihiri cʉhmare to pʉhtoro Nabucodonoso sehe diecinueve cʉhmari waro pʉhtoro ji wahcãrucuro nia tiha.

⁹ Ã yoa tiro Nebusaradã sehe tí pjai wihiro, israe masa Yawere ti ño payori wʉhʉ, Salomõ to dahreri wʉhʉ cjirore jʉ̃noca dutia tiha to surarare. Tuhsʉ, Pʉhtoro Sedequia ya wʉhʉ cjiro cʉ̃hʉre jʉ̃noca dutia tiha. Tuhsʉ, pʉhtoa yoaro sehe jiina ti ya wʉhʉse cjiri cʉ̃hʉre noano jʉ̃ boro pahñonoca dutia tiha tiro.

¹⁰ Tíre jʉ̃ boro pahño tuhsʉ, tí maca macari sahrĩno cʉ̃hʉre cjã poha site boronoca dutia tiha.

¹¹ Ti ã yoari baharo jipachʉta, tí maca cjiro Jerusalẽpʉre payʉ masa jisinia tiha. Jia tiha tí maca macaina waro. Tuhsʉ, ti coyea wiho jia macaricã macaina cʉ̃hʉ ti cahma wajãri pjare cui, tí macapʉ duhti sãarina cjiri jia tiha. Tuhsʉ, Judá masa coyea jipahta, Babilonia surarare cuiro mehne tina mehne sãarʉcʉ sʉrina cjiri cʉ̃hʉ jia tiha tí maca cjiropʉ. Ã yoa Nebusaradã sehe tina perire Babilonia yahpapʉ naa wahaa tiha, ti cahamaca cjihti.

¹² Pjacʉoro yʉhdʉinacã sahserore naaera tiha tiro. Tinare ti coyea ti toaa cjirire, ti se weseri cjiri cʉ̃hʉre dahra duti cũa tiha Judá yahpaihta.