2 Reyes 17 - Wanano OT Portions

Asiria yahpa macariro pʉhtoro mehne israe yahpa macainare buhiri dahreha Yawe

¹ Ã yoa tí pjapʉre Israe yahpare Osea wama tiriro pʉhtoro sãa tiha. Tiro Osea, Elá wama tiriro macʉno jia tiha. Ã yoa tiro Osea Israe yahpare to pʉhtoro sãari pjare ti coyea Judá yahpa macaina pʉhtoro sehe Aca wama tiriro jia tiha. Tiro Aca sehe Judá yahpare doce cʉhmari waro noano pʉhtoro ji wahcãrucuro nia tiha. Tópe cʉhmari to pʉhtoro ji wahcãchʉ waro, Osea cʉ̃hʉ Israe yahpare pʉhtoro sãa tiha. Ã yoa to pʉhtoro sãari baharo, tiro cʉ̃hʉ nueve cʉhmari waro noano Israe yahpare pʉhtoro jia tiha. Ã pʉhtoro jiro, Samaria wama tiri macapʉ jia tiha tiro.

² Tiro cʉ̃hʉ pʉhtoro jiro, Yawe to ñʉ ji coaeraa barore yoaa tiha. Wiho mejeta to pano macaina pʉhtoa cjiri ti ñaa yoariro cjiro sehe tó puro ñaca waro yoaera timaha tiro.

³ Ã yoa cʉ̃ nʉmʉ Asiria yahpa macariro pʉhtoro Salamanasa wama tiriro to surara mehne Samariapʉ sʉ, Osea mehne cahma wajãno sʉa tiha. Ã cahma wajãno sʉro, Oseare cahma wajã yʉhdʉrʉcanocaa tiha. To ã cahma wajã yʉhdʉrʉcari baharo, tiro Osea sehe Salamanasa to cahamacʉno yoaro sehe tjuaa tiha. Ã jiro Salamanasa sehe tirore cʉhmaripe bʉjʉa wapa sini mʉjaa tiha.

⁴ To ã wapa sini mʉjachʉ, Osea sehe wapama, pume yʉhdʉa wahaha. Ã pumeno, pʉhtoro Salamanasa to masieraro, Egipto yahpa macariro pʉhtoro So wama tiriropʉre to yoadohoa sinirocamaha tiro, cahma wajãdoho dutiro. Ã sinirocaro, Salamanasa cʉhmaripe to wapa sini mʉjanore wapa namo duaeraha. To ã wapa namo duaerachʉ, Salamanasa sehe Osea tirore to yoa duaare masinocaha. Ã masino, to surarare Oseare ñaha, peresupʉ biha dapo dutia tiha.

Asiria yahpa macariro pʉhtoro Israe yahpa macainare cahma wajã yʉhdʉrʉca, tinare cahamaca naa wahaa tiha

⁵ Ã yoa Oseare peresu ti yoari baharo, Salamanasa sehe to surara mehne Israe yahpapʉ sʉha tjoa. Tópʉ sʉ, tí yahpa macaina surara mehne cahma wajãa tiha. Ã cahma wajãa, tinare cahma wajã yʉhdʉrʉca wahcãa tiha tina, pʉ pʉhtoro Osea ya maca Samariapʉ. Tópʉ sʉ, to surara mehne tí macare dʉcata bihatorʉcʉ sʉa tiha. Ã dʉcata bihatorʉcʉ sʉa, tí maca macainare peresu yoaro sehe cjʉaa tiha, tia cʉhma waro.

⁶ Tia cʉhma waharo puro Samaria macaina cʉ̃hʉ tinare yʉhdʉrʉcanoca duamaha. Wiho mejeta bihoera tiha tina. Ã yoa Salamanasa sehe Osea nueve cʉhmari to pʉhtoro ji wahcãchʉ waro, tí maca Samariare tãa mehne ti biha dʉcatari sahrĩnore yʉhdʉ sãa, tí macapʉ jiinare cahma wajã yʉhdʉrʉcaa tiha jʉna. Cahma wajã yʉhdʉrʉca tuhsʉ, israe masare payʉ cahamaca naa tiha to ya yahpa Asiriapʉ. Tí yahpapʉ tinare na sʉ, cãinare Ala wama tiri macapʉ ti cahamaca cjihti cũa tiha. Painare tí yahpapʉ jiri ma, Abor wama tiri ma dʉhtʉ cahapʉ tí ma yoaro puro pʉ bʉhʉsehe cjoaripʉta cũ yojaa tiha. Ã yoa to ya yahpa cahacãi pa yahpa Media wama tiri yahpa jia tiha. Tí yahpapʉ jia macaripʉ painare cahamaca cũa tiha tiro.

⁷ Ã yoa Israe masare tó sehe yoa, ñano yʉhdʉchʉ yoariro sehe Yawe ti Cohamacʉta jiha. Tiro sehe ti ñʉchʉsʉma cjiri Egiptopʉ cahamaca ti jisinichʉ, tí yahpa macariro faraõre yʉhdʉrʉca, tinare na wioa tiha. Wiho mejeta tina cjiri panamana sehe tina cjirire na wioriro Cohamacʉre ne ño payoera tiha jʉna. Ã ño payoeraa, “Cohamana jira” ti nia masʉri sehere ño payoina wahaha.

⁸ Ã yoa Canaã yahpai ti pano ji mʉhtaina cjiri sehe Cohamacʉ to ñʉ yabia barore tuaro yoaina jia tiha. Ã jiro Cohamacʉ tinare cohã wionocaa tiha. To ã cohã wiorina cjiri ti ñaa jia tiare israe masa cʉ̃hʉ ñʉ cũ, ñano jia tiha tina cʉ̃hʉ. Ã yoa ti pʉhtoa cʉ̃hʉ tjoa tinare Cohamacʉ warore ño payo duhunoca dutia tiha. Ã ño payo duhu dutia, masʉri sehere ño payo dʉca dutia tiha. Ti ã ño payo dutichʉ, tina cʉ̃hʉ ti dutiro seheta tí masʉrine ño payoa tiha. Ã jia tina cʉ̃hʉ buhiri tiina wahaa tiha.

⁹ Tuhsʉ, payʉ ñaa, ti Cohamacʉ Yawe to ñʉ yabia baro cʉ̃hʉre yoaina wahaha. Ã jia bʉjʉa macarire, daa macaricã cʉ̃hʉre ne cʉ̃ maca dʉhsaro marieno ti cohamanare ti ño payohti cuhturi cjihti yoaa tiha tina.

¹⁰ Ã yoa tí macari dʉhtʉ cahai jia tʉ̃ yucʉri buhuripʉ cʉ̃hʉre tãa mehne, yucʉri mehne ti dahrea masʉrine dapoa tiha. Tuhsʉ, yucʉri, bʉjʉa yucʉri doca cʉ̃hʉre tí masʉri baro dapoa tiha.

^11-12 Tí masʉrine ño payoa taa, me sitia pohcare poho cũ, tíre jʉ̃, ño payoa tiha tina. Tó sehe ñano jia tia, tí yahpai ji mʉhtaina cjiri, Yawe to cohã wiorina cjiri ti ñano jia tiriro cjiro seheta ñano jia tia nia tiha tina cʉ̃hʉ. Wiho mejeta Yawe sehe israe masare õ sehe ni yahu cũ tuhsʉa timaha: “Ne dohse jia masʉrine dahre, ño payoena tjiga mʉsa” ni, yahu cũ tuhsʉa timaha tinare. To ã ni, yahu cũri baharo jipachʉta, tina sehe masʉrine ño payoina wahaha. Tí buhiri tina mehne tuaro waro suaa tiha Yawe.

¹³ Wiho mejeta Yawe sehe “Tinapʉ ã wahari” nino, tó panopʉ to yare yahu mʉhtaina mehne Israe yahpa macainare, Judá yahpa macaina cʉ̃hʉre payʉ tahari õ sehe ni yahu tuhsʉa timaha: “Mʉsa ñaa jia tiare tó puro duhuga mʉsa. Mʉsa ñʉchʉsʉma cjirire yʉ cũri dutia sehere wacũ nʉnʉ, tí mehne sehe jia tiga mʉsa. Tí yʉ cũri dutiare yahu tuhsʉi yʉhʉ mʉsa cʉ̃hʉre yʉ yare yahu mʉhtaina mehne. Ã jina yʉ yahuriro cjiro seheta jia tiga mʉsa” ni, yahu mʉjaa timaha Yawe tinare, to yare yahu mʉhtaina mehne.

¹⁴ Ã yoa Israe yahpa macaina sehe, Yawe yare yahu mʉhtaina tinare payʉ tahari ti yahu mʉjapachʉta, tinare tʉho duaera mʉjaa tiha. Ti ñʉchʉsʉma wachʉ masʉre yoa, ño payorina cjiri ti tʉho duaerariro cjiro seheta tʉho duaera tiha tina cʉ̃hʉ. Ã jia Yawe ti Cohamacʉ warore wacũ tua duaera tiha tina cʉ̃hʉ.

¹⁵ Tó panopʉ Yawe sehe ti ñʉchʉsʉma cjiri mehne õ sehe ni durucu cahno tuhsʉa timaha: “Mʉsa sehe yʉ cũri dutiare yʉhdʉrʉcaro marieno quihõno yʉhti mʉjaga. Mʉsa quihõno yʉhti mʉjachʉ, yʉhʉ cʉ̃hʉ mʉsa Cohamacʉ jiihtja. Tuhsʉ, mʉsare noano wahachʉ yoaihtja” ni, durucu cahno tuhsʉa timaha tiro tina mehne. To ã ni durucu cahnori cjirire tina cjiri panamana sehe cua pisaro tʉhoera tiha. Tuhsʉ, to yare yahu mʉhtaina mehne tinare to bosachʉ cʉ̃hʉre tʉho duaera tiha. Ã tʉho duaera, wapa mariea masʉri sehere ño payoa tiha tina. Ã jia wapa marieina yoaro seheta tjuaha tina cʉ̃hʉ. Ã yoa tí yahpa, Canaã yahpai ti sãahto panopʉ Yawe sehe tinare õ sehe ni yahua timaha. “Tí yahpa macaina ti ñano jia tiare ñʉ cũ, jia tiena tjiga mʉsa” ni, yahua timaha Yawe tinare. To ã ni yahua cjiri cʉ̃hʉre yʉhdʉrʉcaha tina.

¹⁶ Ã yoa Yawe ti Cohamacʉ tinare to cũri dutia jipihtiare yʉhdʉrʉcaina wahaha tina. Uru mehne wachʉa masʉri, pʉa masʉ dahre, tí masʉrine ño payoa tiha. Tuhsʉ, Baal wama tiriro masʉrine, ã jichʉ Asatarote wama tiricoro masʉri cʉ̃hʉre dahre, ño payoina wahaha. Tuhsʉ, ñahpichoha pocare, sʉ̃ dacho macarirore, ã jichʉ sʉ̃ ñami macariro cʉ̃hʉre ño payoina wahaha tina.

¹⁷ Ã yoa Moloque wama tiriro masʉri cʉ̃hʉre dahre, ño payoina wahaha tina. Tiro Moloque masʉrine ño payoa taa, ñabiaro yoa, ño payoa tiha tina. Ti pohnacã numiacãre, mʉacã cʉ̃hʉre ti tuaro cahĩboinacãre wajãa tiha. Wajã tuhsʉ, ti pjacʉricã cjirire jʉ̃, tirore ño payoa tiha tina. Ã yoa tinare ñaa wahachʉ cʉ̃hʉre, ñʉweinare, wete yayare maca, ñʉ dutia tiha tina. Paye ti masi duaa jichʉ cʉ̃hʉre, tina baroreta maca, ñʉ dutia tiha. Bʉjʉa witiro marieno ñaa dihtare ã yoarucua tiha tina. Ti ã ñano jia tichʉ ñʉno, Yawe sehe tina mehne tuaro waro suaha.

¹⁸ Ã suaro, tinare to wari yahpa Israe yahpa macainare cohã wio pahñonocaa tiha Yawe. Ti coyea Judá wama tiri yahpa macaina sahserore cohã wioerasinia tiha.

¹⁹ Ã yoa tina Judá yahpa macaina cʉ̃hʉ ti Cohamacʉ Yawere yʉhdʉrʉcainata jia tiha. Ti coyea Israe yahpa macaina tói jisinia, ti ñaa yoaare ñʉ cũ, ñano jia tiha tina cʉ̃hʉ.

²⁰ Ã jiro Yawe sehe ti coyea israe yahpa macainare to buhiri dahreriro cjiro seheta Judá yahpa macaina cʉ̃hʉre buhiri dahrea tiha. Tinare ñʉ tuhtiina wihi, cahma wajã yʉhdʉrʉca sãa, tinare ñaha, ti ya yahpapʉ na sʉ, ñano cahamaca tipechʉ yoaha tina cʉ̃hʉre. Tó sehe yoa, to wari yahpai jimainare cohãroca wionocaa tiha Yawe tina cʉ̃hʉre. *****

²⁴ Ã yoa Asiria yahpa macariro pʉhtoro Salamanasa sehe Israe yahpai jiina israe masare to cahamaca naari baharo, to ya yahpa macaina sehere payʉ na taa, ti jia macari cjiripʉ ji duti cũa tiha. Õpe macari macainare na taa, cũa tiha tiro: Babilonia macaina, Cuta macaina, Avá macaina, Hamate macaina, Sefaravaĩ macaina tinare na ta, ji duti, cũa tiha tiro. Tó sehe yoa, to masare israe masa ya macari cjirire pʉ ti, jichʉ yoaa tiha tiro.