2 Crónica 5 - Wanano OT Portions

Cohamacʉ to diez dutiare to joaa pjĩni ti wihbori carore to ya wʉhʉ, wahma wʉhʉpʉ wihboa tiha sacerdotea

¹ Ã yoa pʉhtoro Salomõ, Yawe ya wʉhʉ cjihtore tuhsʉ dapoa tiha jʉna. To tuhsʉri baharo, to pʉcʉro Davi cjiro Cohamacʉre ño payoro to wari cjirire na ta, tí wʉhʉ wʉrʉpʉ jia tahti pocapʉ wihboa tiha tiro. Tí sehe uru, ã jichʉ comaa plata ti nia jia tiha. Tuhsʉ, tí baro mehne paye baro wapa tia ti yoari cʉ̃hʉ jia tiha. Ã yoa tí tahti poca sehe masa Cohamacʉre ño payoro mehne ti warire ti wihbohti tahti poca cjihtita jia nia tiha.

² Ã yoa tíre wihbo tuhsʉ, israe masa doce curuari macaina pʉhtoare, tuhsʉ, ti doca macaina pʉhtoa cʉ̃hʉre jipihti Jerusalẽpʉ pji cahmachuha Salomõ. Ã pji cahmachuro, ti ñʉrocaroi Yawe to cũri dutiare ti wihbori carore to dahreri wʉhʉ, Cohamacʉ ya wʉhʉpʉ wihbo cũ dutiro taro nia tiha. Tí caro sehe tí pjare tí maca Jerusalẽreta Siõ ti ni pisuri pahrẽpʉ ti wihbori caro jia tiha. Ã yoa tí pahrẽre pa wama mehne Davi Ya Maca ni pisua tiha tina.

³ Ã yoa israe masa sehe cʉhmaripe siete sʉ̃ri mʉ sʉ wahcãchʉ waro, Jerusalẽpʉ bose nʉmʉri yʉhdoa taa, ã tópʉ cahmachu mʉjaa tiha. Ã jiro Salomõ cʉ̃hʉ tí nʉmʉrita jipihti israe masa curuari pʉhtoare tí macapʉ pji cahmachuha. Ã pji cahmachuro, tina jipihtina ti ñʉrocaroi Yawe to dutiare ti wihbori carore to ya wʉhʉ, wahma wʉhʉpʉ na ta duti, wihbo cũ dutiro taro nia tiha.

⁴ Ã yoa Salomõ to pji cahmachurina pʉhtoa sehe wihi pihtiha jʉna. Ti wihi pihtichʉ ñʉno, tiro Salomõ sehe Cohamacʉ ya wʉhʉpʉ dahraina sacerdoteare ã jichʉ Leví cjiro ya curua macaina cʉ̃hʉre Yawe to cũri dutiare ti wihbori carore Cohamacʉ ya wʉhʉpʉ na ta dutia tiha jʉna.

⁵ Ti na taro watota, paina sacerdotea, ã jichʉ Leví cjiro ya curua macaina cʉ̃hʉ Cohamacʉ ya wʉhʉ ji mʉhtamari wʉhʉ, wahiquina cahsari wʉhʉ cjirore wa site boro, wahma wʉhʉ wʉrʉpʉ tíre dure taa tiha tina cʉ̃hʉ. Tuhsʉ, tí wʉhʉ cjiropʉ jia, Cohamacʉre ño payoa taa, ti cjʉaa cʉ̃hʉre jipihti dure ta pahñonocaa tiha tina.

⁶ Ã yoa tí jipihtiare Cohamacʉ ya wʉhʉ cahapʉ ti na wihichʉ ñʉno, pʉhtoro Salomõ sehe Yawe to cũri dutiare ti wihbori caro potoi dʉcʉ sʉha. Ã yoa jipihtina israe masa cʉ̃hʉ tí caro potoi cahmachurʉcʉ sʉha. Tói cahmachurʉcʉ sʉ tuhsʉ, ti ovejaare, ti wachʉa cʉ̃hʉre payʉ ne quihõna bihoeraina waro wajãha, ti payʉro puro. Wajã tuhsʉ tjoa, wahiquinare ti jʉ̃ wa mʉori caropʉ payo, tinare jʉ̃ wa mʉo, Cohamacʉre ño payo mʉjaa tiha tina.

⁷ Tó sehe yoa, Cohamacʉre ti ño payo tuhsʉri baharo, sacerdotea sehe tí carore yo wʉa na, Cohamacʉ ya wʉhʉ wʉrʉpʉ na sãa wahaa tiha jʉna. Na sãa, Cohamacʉ ya tahtia, cjã turi cahsaro mehne duhu yoroca boro, ti dʉcatari tahtiapʉ tí carore wihbo cũa tiha. Tí tahtia sehe tí wʉhʉ wʉrʉ topapʉ tjuaa tiha. Ã yoa tí tahtiapʉre pʉa masʉ, cjã mʉa dʉpʉri cjʉaa masʉri ducua tiha. Ã ducua, wʉ wahcãhtina yoaro sehe ducua tiha. Ã jia sacerdotea sehe Yawe to cũri dutiare ti wihbori carore tí masʉri cjã mʉa dʉpʉri docai wihbo cũa tiha.

⁸ Tói ti wihbo cũchʉ, tí cjã mʉa dʉpʉri sehe tí carore ã jichʉ tí carore ti wʉa naa yucʉri cʉ̃hʉre moharucuro yoaro sehe bajurucua tiha. *****

¹⁰ Ã yoa tí caropʉre tãa pjĩni, pʉa pjĩ, Yawe to diez dutiare to joaa pjĩni sãa tiha. Tí pjĩni sehe Moise cjiro to wihbo sãa pjĩni jia tiha. Israe masa Egiptopʉ cahamaca jimarina ti wijaari baharo waha, tʉ̃cʉ Sinaí cahapʉ sʉ, ti jisinino wato, Yawe sehe tinare tí to dutiare wiho yahusinia tiha. Tíre yahuro taro, õ sehe nia tiha tiro tinare: “Yʉ dutiare mʉsa quihõno yʉhtichʉ, payʉ masa curuari watoi jiri curuare yʉ ya curua cjihto beseihtja mʉsare. Ã jina yʉ cahĩina waro jinahca mʉsa” ni, yahua tiha tiro tinare. Ã yoa israe masa sehe Yawe to diez dutiare to yahuchʉ tʉhoa, “Mʉ dutia jipihtiare yʉhtinahtja sã” ni, yʉhtia tiha tirore. Ti ã ni yʉhtiri baharo, Yawe to basi tíre tãa pjĩnipʉ joa õ, tinare waa tiha jʉna.

¹¹ Ã yoa sacerdotea Yawe to cũri dutia ti wihbori carore na sãarina sehe majare wijaa wahaha jʉna. *****

¹³ Ã ti wijaari baharo, paina sacerdotea wijaropʉ jiyurina sehe ti trompetarire puti dʉcaha, Yawere wache payoa taa. Ti putichʉta, comaa wapari, noano coaro tia wapari cjʉaina, tuhsʉ, bʉapʉtẽa cjʉaina cʉ̃hʉ cʉ̃no potori yʉhti pihti mʉa wahaha. Tó sehe yoa, tina jipihtina ji coaro mehne Yawere basa payoa tiha jʉna. Õ sehe ni basa payoha tina: —Yawe mari Cohamacʉ masa noariro jira. Marine tiro ne cahĩ duhusi —ni basa payoa tiha tina. Ti ã ni basa payorucuchʉ waro, wacũenoca me curua, Yawe jiri curua sehe tí wʉhʉre ji biha mʉa wahaha.

¹⁴ Tuhsʉ, to si sitea cʉ̃hʉ tí wʉhʉ puhichapʉre noano si site sahse mʉa wahaha. Ã wahachʉ ñʉa, sacerdotea tí wʉhʉ puhichapʉ dahra sãaborina sehe sãa masiera tiha.