1 Samue 8 - Wanano OT Portions

Israe masa ti pʉhtoro rey cjihto coã sõbasa dutiha Samuere

¹ Ã yoa Samue israe masare sʉho waja mʉhtariro sehe bʉcʉro quiro waro jiha. Ã jiro tirore sʉho wajadohohtina cjihtire to pohna cʉ̃hʉre pʉhtoa sõha tiro.

² To macʉno masa wahmino sehe Joe wama tiriro jia tiha. To bahʉro sehe Abia wama tiriro jia tiha. Tinare to pʉhtoa sõri baharo, tina sehe Berseba wama tiri macapʉ jia tiha. Tópʉ ji, ti pʉcʉrore masare sʉho ji mʉhtadohoa tiha tina cʉ̃hʉ.

³ Wiho mejeta tina to pohna sehe ti pʉcʉro yoaro sehe masare noano sʉho ji mʉhtaera tiha. Ã noano sʉho ji mʉhtaeraa, masa ti ñano jia tiare cahnoera tiha tina. Ã cahnoeraa, ti buhiri dahreboina cohtotaro, buhiri marieina sehere buhiri dahre mʉjaa tiha. Ti buhiri dahreboina sehe tinare õ sehe ni mʉjaa tiha: “Sãre buhiri dahrena tjiga. Sã sehe mʉsare wapanahtja” nia tiha tinare. Ti ã nichʉ tʉhoa, tina cʉ̃hʉ wapata duama, buhiri maeraina sehere wiho warota “Ahrina jira buhiri tiina” ni, tju õ, tina sehere buhiri dahre mʉjaa tiha.

⁴ Ti ã jia tiare masia, jipihtina paina Samue doca macaina pʉhtoa israe masare dutiina sehe cahmachu, tiro Samue to jiri maca, Ramapʉ waha, tiro mehne sʉhʉdua sʉha.

⁵ Ã sʉhʉdua sʉa, õ sehe niha tina tirore: —Samue, mʉhʉ sehe bʉcʉro quiro waro jira. Ã yoa mʉ pohna, mʉ basi mʉ pʉhtoro sõrina cʉ̃hʉ sãre mʉ sʉho ji mʉhtano seheta sʉho ji mʉhtaerara. Ã jina sã sehe pʉhtoa ti ji namochʉ cahmaeraja jʉna. Paye curuari macaina mehchʉ ti pʉhtoro rey cjʉaina jira. Ã jina sã cʉ̃hʉ sãre dutihtiro rey cjihto sãre mʉ sõbasachʉ cahmaja —niha tina.

⁶ Ti ã nichʉ tʉhoro, Samue sehe ne ji coaeraha. Ã ji coaeraro, Yawere sinitu ñʉha.

⁷ To sinitu ñʉchʉ, Yawe sehe tirore õ sehe ni yʉhtiha: —Mʉhʉre ti sinino seheta yoaga. Ti pʉhtoro cjihto pairore cahmaa, mʉhʉ dihtare cohãa nierara tina. Yʉhʉ cʉ̃hʉre cohãa nina. Yʉhʉta jimaja ti pʉhtoro waro. Yʉ ã jipachʉta, tina sehe tinare yʉ waja mʉhta namochʉ cahmaeraa, ã yoara.

⁸ Panopʉre ti ñʉchʉsʉma cjiri yʉhʉre ti yoariro cjiro seheta mipʉ macaina cʉ̃hʉ yʉhʉre ã yoaa nina tjoa. Ti ñʉchʉsʉma cjirire, Egiptopʉ cahamaca jiinare na wio, yʉ na taa tiri pjapʉta tina cjiri cʉ̃hʉ yʉhʉre duhu mʉja, paina cohamana sehere ño payo dʉca mʉja tuhsʉa tire. Mipʉ cʉ̃hʉre tina cjiri panamana ji turia dijaina cʉ̃hʉ ãta yoa mʉjana tjoa. Ã yoaa, yʉhʉre ti cohã mʉjano seheta mʉhʉ cʉ̃hʉre cohãa nina.

⁹ Ã jicʉ mʉhʉre ti sinino seheta yoaga. Ti pʉhtoro rey cjihtore bese, sõbasaga tinare. Wiho mejeta mʉ sõhto pano, rey tuaro mehne to masare to dutihti cjihtire noano yahu mʉhtaga mʉ masa curuare, mʉ sõri baharopʉ “Rey ñaa niri jira” ti nierahto noano —ni yʉhtiha Yawe Samuere.

¹⁰ To ã niri baharo, Samue sehe Yawe to nirire to cahapʉ sʉrina israe masa pʉhtoare yahu turiaha.

^11-12 Õ sehe ni yahu turiaha tiro tinare: —Mʉsa cahmariro rey mʉsare õ sehe yoahto jiyuhca. Cãina mʉsa pohna mʉare to surara cjihti tuaro mehne sõhto jiyuhca tiro. Ã yoa to surara sõhrinare tia curua tju wa dapohto jiyuhca. Cʉ̃ curuare ti cahma wajãa bʉso, cawaloa ti wajaa bʉsopʉ sã, cahma wajãhtina cjihti cũhto jiyuhca. Pa curuare to tunuria cawaloa ti wajaria mehne noho to waharoi to pano mʉroca mʉhta, ñʉ cohtahtina cjihti cũhto jiyuhca. Pa curuare to surara pʉhtoa cjihti cũhto jiyuhca. Ã cũno, cãinare mil surarare dutihtina pʉhtoa cjihti cũhto jiyuhca. Painare cincuenta surarare dutihtina pʉhtoa cjihti cũhto jiyuhca. ‘Ã yoa mʉsa pohna to surara sõ dʉharinare tjoa cãina bese namohto jiyuhca tiro. Ã besero, cãinare to cahma wajãa bʉso dojochʉ, ti cohtotahti cjihtire yoahtina cjihti cũhto jiyuhca. Painare to surara ti ya cahma wajã macaa wamoa cjihti dahrebasahtina cjihti cũhto jiyuhca. Painare toaare to toahti yahparire saha musiõbasahtina cjihti cũhto jiyuhca. Saha musio cũ tuhsʉ, tirore toabasahti jiyuhca tina. Ã yoa ti toari cjiri ti bʉcʉarʉcʉ sʉchʉ ñʉa, tinata tí dichare tirore nabasahti jiyuhca.

¹³ ‘Ã yoa mʉsa pohna numia cʉ̃hʉre cãina numiare tirore dahra cohtahti numia cjihti tuaro mehne sõhto jiyuhca tiro. Ã sõno, cãa numiare tirore me sitia dahrebasahti numia cjihti cũhto jiyuhca. Paye numiare tirore chʉa dahrebasahti numia cjihti cũhto jiyuhca. Paye numiare tirore pão dahrebasahti numia cjihti cũhto jiyuhca.

¹⁴ ‘Ã yoa mʉsa ti pʉcʉsʉma sehere õ sehe yoahto jiyuhca tiro. Mʉsa toaa weserire tí weseri bui noano dicha tia weserire ñʉ, tiro mʉsare tuaro mehne manocahto jiyuhca. Õpere mahto jiyuhca tiro mʉsare. Mʉsa trigo weserire, mʉsa se weserire, ã yoa mʉsa olivo weseri cʉ̃hʉre mahto jiyuhca tiro mʉsare. Ma tuhsʉ, tí weserire tiro mehne dahrahtinare ti ya weseri cjihti wahto jiyuhca tiro.

¹⁵ ‘Ã yoa mʉsa weseri to ma dʉhaa weseri macaa cʉ̃hʉre ti dicha tiri pjare tjoa tí dichare tuaro mehne nahto jiyuhca tiro tjoa. Ã nano, trigore cien pʉhʉse mʉsa na cahmachurire, tiro cʉ̃hʉ diez pʉhʉse nahto jiyuhca. Ã yoa mʉsa se weseri macaa cʉ̃hʉre ãta yoa, nahto jiyuhca tiro. Tí to na cahmachuri sehe to doca macaina pʉhtoare, ã jichʉ paina tiro mehne dahrahtina cʉ̃hʉre to wahti cjihti jihto jiyuhca.

¹⁶ ‘Ã yoa mʉsa cahamaca cʉ̃hʉre cãinare mahto jiyuhca tiro mʉsare. Ã mano, mʉsa cahamaca mʉare, numia cʉ̃hʉre mahto jiyuhca tiro. Ma tuhsʉ, to ya dahraare dahra cohtahtina cjihti cũhto jiyuhca tinare. Ã yoa mʉsa nuina wachʉa cʉ̃hʉre, mʉsa burroa cʉ̃hʉre paina bui noainare, tuhsʉ, bʉjʉina wʉrire ñʉ, mʉsare mahto jiyuhca tiro. Ma tuhsʉ, tinare to weseri cjihtire dihta saha musiõhtina cjihti, tuhsʉ, nʉcʉa paye barore naa mʉjahtina cjihti cũhto jiyuhca tiro.

¹⁷ ‘Ã yoa paina mʉsa nuina cabraare, mʉsa ovejaa cʉ̃hʉre tjoa tuaro mehne mʉsare mahto jiyuhca tiro. Ã mano, cien cabraa mʉsa cjʉachʉ, tiro sehe to yaina cjihti diez waro nahto jiyuhca. Ã yoa cien ovejaa mʉsa cjʉachʉ, tina cʉ̃hʉre diez waro to yaina cjihti nahto jiyuhca tiro. Ã yoa mʉsa jipihtina cʉ̃hʉ tirore dahra cohtaina yoaro seheta tjuahti jiyuhca jʉna.

¹⁸ ‘Mʉsare to ã yoachʉ ñʉna, mʉsa sehe cahyaro mehne õ sehe ni sañurucuhtina jiyumahca: “Ahriro rey mari beseriro ñabiaro marine yoaro nina. Tíre ne dohse yoa yʉhdʉ witi masieraca mari” ni, sañurucuhtina jiyumahca mʉsa. Mʉsa ã ni sañurucu mʉjachʉ tʉhoparota, tiro Yawe sehe mʉsare yoadohoerahto jiyuhca. Ã ni yʉhʉre yahu turiabasa dutihre Yawe mʉsare —ni yahu turiamaha Samue to cahapʉ sʉrina israe masa pʉhtoare.

¹⁹ To ã ni yahuchʉ tʉhopahta, tina sehe tirore ne cua pisaro tʉhoera tiha. Ã jia õ sehe niha tina: —Noanocanohca. Sã cʉ̃hʉre rey cjihto sõbasaga.

²⁰ Sã cʉ̃hʉ paye masa curuari rey ti cjʉaro yoaro seheta sãre dutihtiro rey cjihto cahmaja. Sãre ñʉ tuhtiina ti cahma wajãa tachʉ, sãre sʉho cahma wajã mʉhtahtiro cjihto cahmaja sã —niha tina.

²¹ Ti ã ni yʉhtichʉ tʉhoro, Samue sehe jipihtia ti ã nirire Yawepʉre yahu turiaha.

²² To yahu turiachʉ tʉhoro, Yawe sehe: —Jai. Noanohca. Ti cahmano seheta yoaga. Tinare dutihtiro rey cjihtore pʉhtoro sõbasaga tinare —ni yʉhtiha. To ã ni yʉhtichʉ tʉhoro, Samue cʉ̃hʉ tinare õ sehe niha: —Jai. Noanohca. Yʉhʉre mʉsa sinino seheta mʉsare rey cjihtore pʉhtoro sõbasaihtja —niha. Ã ni tuhsʉ, tinare ti jia macaripʉ coha tjuaa dutiha Samue.