1 Samue 31 - Wanano OT Portions

Ahri quiti pʉhtoro Saulo yariari quiti jira

^1-2 Ã yoa filisteo masa surara sehe tʉ̃ yucʉri watoi jiri dʉhtero Jezree wama tiri dʉhteropʉ ti cahmachurʉcʉ sʉri baharo, waha namo, israe masa surara mehne cahma wajãa sʉa tiha. Ã cahma wajãa sʉa, israe masa surara ti cahmachurʉcʉ sʉri buhuro, tʉ̃cʉ buhuro Gilboa wama tiri buhuropʉ mʉjaa, tina mehne cahma wajãa tiha. Ã cahma wajãa, israe masa surarare payʉ wajãa tiha. Ti ã payʉ wajãchʉ ñʉa, dʉhsaina surara sehe tinare wiho duhti wahcãa wahaha. Tina mehne tiro Saulo cʉ̃hʉ, to pohna Jonatã, Abinadabe, Malquisua tina tiaro mehne tiro cʉ̃hʉ duhti wahcãa tiha. Ti ã duhti wahcãchʉ ñʉa, filisteo masa surara cʉ̃hʉ tinare nʉnʉ ti wahcãha. Ã nʉnʉ ti wahcãa, Saulore, ã jichʉ to pohna cʉ̃hʉre tuaro macaa tiha tina. Ã macaa, tinare boca sʉnocaha. Boca sʉ, to pohna sehere wajã mʉhtaa tiha tina.

³ Tinare ti wajãri baharo, ti pʉcʉro cʉ̃hʉre soroarʉcʉ sʉ, ti bʉea yucʉri mehne tirore ñano cami dahreha.

⁴ Ti ã ñano cami dahrechʉ, Saulo sehe cʉ̃iro wahmʉno, tirore wamoa cjʉabasa cohtarirore õ sehe nimaha: —Ahrina Cohamacʉre maeraina jia, ñaina waro jia nina. Ã jia tina yʉhʉre catiriroreta ñahaa, ñaputiaro yoa, yʉhʉre wajãahca. Yʉhʉre ti ã ñano yoa, wajãchʉ cahmaeraja yʉhʉ. Ã jicʉ mʉhʉ sehe yʉhʉre mʉ cahma wajãri pjĩ mehne dói wajã bahrañoga —nimaha Saulo tirore. To ã nichʉ tʉhoro, tiro wahmʉno sehe cʉa yʉhdʉa wahaha. “Ahriro pʉhtoro choro jira” nino, tirore ne wajã duaera tiha tiro. To wajã duaerachʉ ñʉno, Saulo sehe to cahma wajãri pjĩne naroca, to basi ñosa, yariaa wahaha.

⁵ To ã yariachʉ ñʉ cʉamahno, tiro wahmʉno cʉ̃hʉ to cahma wajãri pjĩne naroca, tiro cʉ̃hʉ to basi ñosa, yariaa wahaha.

⁶ Ã waha, tiro wahmʉno, tiro Saulo, to pohna tiaro cʉ̃hʉ yariaa tiha. Ã yoa tí dachore Saulo cjiro surara cʉ̃hʉre ne cʉ̃iro dʉhsaro marieno filisteo masa surara wajã pahñonocaa tiha.

⁷ Ti ã wajã pahñochʉ, israe masa coyea ti cahma wajãno caha curei jiina sehe ñʉa tiha. Ã ñʉa, cuiro mehne ti jia macarire duhu, duhti site wahcãa wahaa tiha tina. Ã yoa paina israe masa Jordão ma sie cjoa pahrẽ sehei jiina cʉ̃hʉ filisteo masa surara ti ã yoaa quitire tʉhoa tiha. Ã tʉhoa, tina cʉ̃hʉ cuiro mehne ti jia macarire duhu, duhti site wahcãa wahaa tiha. Ti duhti site wahcãri baharo, filisteo masa sehe ta, ti jia macari cjirire pʉ ti, tí macaripʉ ji caha sʉa tiha.

⁸ Ã yoa ti cahma wajãri dacho, pa dacho sehere filisteo masa surara sehe ti wajãrina cjiri ya wapa tiare na tinia wahaa, ti cahma wajãriro cjiropʉ sʉa tiha. Ã sʉa, pʉhtoro Saulo pjacʉ cjirore, ã jichʉ to pohna ti pjacʉri cjiri cʉ̃hʉre bocaa tiha tina.

⁹ Ã bocaa, Saulo cjiro dapure dʉte taha nanocaa tiha. Dʉte taha na tuhsʉ, cahma wajãno to sãari suhtiro cjiro cʉ̃hʉre to wamoa cjiri jipihti mehnepʉta nanocaa tiha. Na tuhsʉ, ti coyeare tí cjirire ti ya yahpapʉ naa dutiha. Ã naa dutia, ti cohamanare ti ño payoa wʉhʉsepʉ, ã jichʉ ti coyea ti jia macaripʉ cʉ̃hʉre tí cjirire ño tini dutia niha tina. Ã ño tini dutia, ti cahma wajã yʉhdʉrʉcari quiti cʉ̃hʉre yahu site tini dutia nia tiha tina.

¹⁰ Baharo filisteo masa surara sehe pʉhtoro Saulo cjiro to cahma wajãri suhtiro cjirore to wamoa jipihti cjiri mehneta ti cohamaco Asatarote wama tiricorore ti ño payori wʉhʉpʉ cũa tiha jʉna. Ã yoa to pjacʉ cjiro sehere ti cahma wajãriro cjiro cahacã curepʉ jiri maca Bete Sã wama tiri macapʉ naa tiha. Tópʉ na sʉ, tí macare tãa poca wʉri mehne bʉtiro ti biha dʉcataricapʉ cjã puha õa tiha tina to pjacʉ cjirore. Tuhsʉ, to pohna ti pjacʉri cjiri cʉ̃hʉre tí tiharicapʉta cjã puha õa tiha tina.

¹¹ Ã yoa israe masa coyea Galaa yahpapʉ jiri maca Jabe macaina sehe filisteo masa Saulo cjiro pjacʉre ti ã yoaa quitire tʉhoa tiha.

¹² Ã tʉhoa, tí macai jiina cãina wacũ tuaina sehe to pjacʉ cjirore Bete Sãpʉ macaa wahaa, ñami puro wahaa tiha. Waha, tópʉ sʉa, tiro cjiro pjacʉre, ã jichʉ to pohna cjiri ti pjacʉri cʉ̃hʉre na boro, naa wahaa tiha tina. Naa, ti jiri macapʉ sʉa, tina cjiri ti pjacʉrire jʉ̃ cohãnocaa tiha.

¹³ Jʉ̃ cohã tuhsʉ, ti cohãri cjirire na, tí macai jidʉ yucʉcʉ docai yaa tiha. Ya tuhsʉ, cahyaa, cʉ̃ somana waro chʉera tiha tina.