1 Samue 11 - Wanano OT Portions

Pʉhtoro Saulo to masa mehne amonita masa surarare cahma wajã yʉhdʉrʉcaha

¹ Ã yoa cʉ̃ nʉmʉ Naha wama tiriro israe masa mehne cahma wajãno wahaa tiha to surara mehne. Tiro Naha sehe Amõ wama tiri yahpa macaina amonita masa pʉhtoro jia tiha. Ã yoa tiro Naha israe masa mehne cahma wajãno waharo, ti jiri yahpa, Galaa yahpare yʉhdʉ sãa, Jabe wama tiri macapʉ sʉha. Tí macapʉ sʉ, tí macare noano soroa bihatorʉcʉ sʉa wahaha. Ti ã yoachʉ ñʉa, tí maca macaina sehe cʉa yʉhdʉa wahaha. Ti ã cʉachʉ ñʉa, ti pʉhtoa sehe Naha cahapʉ waha, õ sehe nia sʉha tirore: —Mʉsa mehne cahma wajãna bihosi sã. Ã jina dói waro mʉ cahamaca cjihti tjua bahrañonahtja. Ã jicʉ mʉhʉ sehe sã pʉhtoro cjihto tjuaihca. ¿Dohse ni tʉhotujari mʉhʉ sã ã ninore? —nia sʉha tina Nahare.

² Ti ã nichʉ tʉhoro, Naha sehe tinare õ sehe ni yʉhtiha: —Jai. Noanohca. Wiho mejeta yʉhʉ sehe mʉsare cʉ̃no yoa namo duaja. Mʉsa jipihtina ahri macai jiinare mʉsa capariaca poto bʉhʉsehe sehe macariare dota tihã pahñonocaihtja mʉsare. Yʉ ã yoaro mehne jipihtina mʉsa israe masare doca dahrei niihca yʉhʉ. Yʉ ã ninore mʉsa “Jai” nichʉ, mʉsa nino seheta yoajihna mari —ni yʉhtiha Naha tinare.

³ To ã nichʉ tʉhoa, Jabe macaina pʉhtoa sehe tirore õ sehe ni yʉhtiha: —Jai. Tí pja pinihta sãre cʉ̃ somana waro cohtasiniga. Tí somana waharo puro ahri quitire sã coyeare yahu site ñʉsininahtja. Pa tehe nia tí quitire tʉhoa, cãina sã coyea sãre yoadohoa taboca. Tí somana waharo puro ti wihierachʉ pinihta, sã sehe mʉhʉre sã nino cjiro seheta mʉ cahamaca tjuanahtja —ni yʉhtiha tí maca macaina pʉhtoa Nahare. Ti ã nichʉ tʉhoro, Naha sehe “Jai” ni, yʉhtiha tinare.

⁴ Ã yoa ti sininore Naha “Jai” to ni yʉhtichʉ tʉhoa, tina Jabe macaina pʉhtoa sehe ti coyea ti jiri yahpapʉ tí quitire yahu site tini dutia, payʉ masa wa siterocaha. Ti ã wa siterocachʉ, cãina sehe waha, pʉ ti pʉhtoro sõriro Saulo to jiri maca Gibeápʉ yahu sitea sʉha. Ã yahu sitea sʉa, jipihtia tinare waharire, ã jichʉ ti jiri maca Jabe macaina pʉhtoa amonita masa pʉhtoro mehne ti sʉhʉduri cjiri cʉ̃hʉre yahuha. Tí quitire ti yahuchʉ tʉhoa, tí maca macaina sehe tʉho cʉa wahaha. Ã tʉho cʉa, cahyaro mehne tuaro tiiha tina.

⁵ Ti ã cahya, tiiro wato waroi ti pʉhtoro sõriro Saulo sehe to wachʉa mehne yahpare saha musiõno sʉriro cjiro tju wihiha. Ã tju wihiro, to ya maca macaina cahyaro mehne tuaro ti tiichʉ ñʉha tiro. Ã ñʉno, sinitu ñʉha tinare: —¿Ne dohse wahari mʉsa? ¿Dohse yoana ã ñaca waro tiijari mʉsa? —ni sinitu ñʉha tiro tinare. To ã ni sinituchʉ tʉhoa, tina sehe Jabe macaina pʉhtoa ti quiti warocarire tirore yahu turiaha.

⁶ Tí quitire Saulo to tʉhochʉta, Cohamacʉ Catia Macariro Espíritu Santo sehe to cahapʉ dija wihi mʉa wahaha. Ã dija wihirota, tirore sua yʉhdʉ mʉa wahachʉ yoaha.

⁷ To ã suari pjaihta Saulo sehe to wachʉa pʉarore cjero mehne wajãha. Wajã tuhsʉrota, payʉ siri dʉte siteha. Dʉte site tuhsʉ, tí dihire cãina tiro mehne macainare wiaha. Ã wiaro, to coyea jia macari, jipihtia macaripʉ õ sehe ni yahu site tini dutiha tiro tinare: —“Yʉhʉ Saulo mari coyea Jabe macaina pʉhtoa ti yahurocaa quitire tʉhoja. Ã tʉhoi, mipʉre Samue mehne waha, tópʉ tina amonita masa surara mehne cahma wajãi wahai tai nija. Ã jina mʉsa cʉ̃hʉ ne cʉ̃iro dʉhsaro marieno sãre cahma wajãdohona taga. Noa yʉhʉre cahma wajãdohoa ta duaeraina ñʉga ahri dihi yʉ dʉte sitea dihire. Noa yʉhʉre cahma wajãdohoa ta duaeraina ti wachʉa cʉ̃hʉre õ seheta yoaihtja yʉhʉ” nirocahre mari pʉhtoro Saulo mʉsare —ni yahu site tini dutiha Saulo tinare. Ã yoa tí quitire yahu site tini duti to wa siterocarina sehe to dutiro seheta yahu site tinia wahaha jʉna. Ti ã yahu tinichʉ tʉhoa, israe masa sehe tʉho cʉa yʉhdʉa wahaha. Ã tʉho cʉaa, õ sehe niha tina: —Mari pʉhtoro Saulore Yawe jiri jira ã ñaca waro suachʉ yoaro. Ã suachʉ yoaro, Yawe tiro Saulo mehne mari coyeare yʉhdʉ witichʉ yoaro taro niri jira. Ã jina mari cʉ̃hʉ tirore cahma wajãdohona wahajihna —niha tina. Ã nia, ne cʉ̃iro dʉhsaro marieno Saulo cʉ̃hʉre cahma wajãdohoa wahaha.

⁸ Waha, Beseque wama tiri macapʉ sʉ, tópʉ tirore piti boca, cahmachurʉcʉ sʉha tina. Tina israe masa cahma wajãdohoa sʉina sehe pʉa yahpapʉ tju warʉcʉ sʉ, jiina jiha. Ã jia cʉ̃ curua macaina sehe Israe wama tiri yahpa macaina jiha. Pa curua macaina sehe Judá wama tiri yahpa macaina jiha. Ã yoa Saulo sehe “¿Nohopeina masa yʉhʉre cahma wajãdohohtina jijari?” ni, masino taro, tinare quihõha. To quihõ ñʉchʉ, Israe yahpa macaina sehe tresciento mil waro jiha. Judá yahpa macaina sehe treinta mil waro jiha.

⁹ Ã yoa tina cahma wajãa wahahtinare quihõ ñʉ tuhsʉ, Jabe macaina quiti na tarina sehere õ sehe niha Saulo cʉ̃hʉ: —Mʉsa mipʉre mʉsa ya macapʉ tjuaaga. Tjuaa sʉna, mari coyeare õ sehe ni yahuga: “Ñamichacare cohari pja sʉhto panore amonita masare mari coyea cahma wajã yʉhdʉrʉca tuhsʉhti jiyuhti” ni, yahuga tinare —ni yahu duti, waroca tjuha Saulo cʉ̃hʉ. Ã yoa tina sehe waha, ti ya macapʉ tjuaa sʉa, Saulo cʉ̃hʉ ti yahu dutirocarire tinare yahu turiaha. Ti yahua quitire tʉhoa, tina Jabe macaina sehe tuaro wahcheha.

¹⁰ Baharo tí maca macaina pʉhtoa amonita masa pʉhtoro Nahare õ sehe ni mahño yahua sʉha: —Mari durucu cahnoriro cjiro seheta sã sehe ñamichacata noano mehne sã basi mʉ cahamaca cjihti tjuanahtja. Ã jii mʉhʉ sehe sãre mʉ yoa duaro seheta yoa masiihca —ni mahño yahua sʉha tina.

¹¹ Ã yoa Saulo sehe noano ti cahma wajãhto noano, tí ñamine to surarare tia curua waro tju wa dapoha. Tju wa dapo tuhsʉ, amonita masa surarare wajãa wahaha jʉna. Waha, bohrea mʉja tachʉ waro, ti cahapʉ sʉ, wacũenoca tinare wajãa dʉcaha. Ã wajãa, cohari pja sʉhto panore yoato amonita masa surarare wajã pahñoa taapʉ niha. Ti ã wajã pahñoa tachʉ ñʉ, cuia, cãinacã ti wajã dʉharinacã sehe paró mʉroca site wahcãa wahaha.

¹² Tó sehe yoa, Saulo cʉ̃hʉ amonita masa surarare cahma wajã yʉhdʉrʉcaha jʉna. Ã cahma wajã yʉhdʉrʉca tuhsʉata, Samuere õ sehe niha tina: —¿Diina jijari mari coyea Saulore mari pʉhtoro sõri pjare tirore ñano ni, durucu cohtaina cjiri? Cjero sãre tinare ñoga. Wajã cohãnocana tana nija sã —niha tina Samuere.

¹³ Samuere ti ã nichʉ tʉhoro, Saulo sehe tinare õ sehe ni yʉhtiha: —Jierara, coyea. Ne ã yoaena tjiga mʉsa. Micha dacho mari wahchehti dacho jiro nina. Michare Yawe marine to yoadohoro mehne amonita masare cahma wajã yʉhdʉrʉcanocai mari. Ã jina mari coyeare ne cʉ̃irore wajãena tjiga mʉsa —ni yʉhtiha Saulo tinare.

¹⁴ Ã yoa Saulo to ã ni yʉhtiri baharo, Samue sehe jipihti israe masare õ sehe ni yahuha: —Potocã tjira, coyea. Saulore mari coã pʉhtoro sõri pjare cãina tirore to pʉhtoro sãachʉ cahmaeramare. Ã cahmaeraa, tirore ñano ni, durucu cohtare. Ã jina mipʉre mari jipihtina Gilgapʉ cahmachuna wahajihna. Tópʉ jipihtina cahmachu, ne cʉ̃iro dʉhsaro marieno Saulore pʉhtoro sõ cahnojihna mari —niha.

¹⁵ To ã nichʉ tʉhoa, jipihti israe masa Gilgapʉ wahaha. Waha, tí macapʉ sʉha tina. Ti sʉri baharo, Yawe to ñʉrocaroi cua pisaro mehne Saulore pʉhtoro sõ cahnoha jʉna. Pʉhtoro sõ cahno tuhsʉ, Yawere wahche payoa taa, wahiquina noainare wajã, cãa sirire jʉ̃ wa mʉoha tina. Ã yoa dʉhsaa sirire tina jipihtina wahchero mehne tói pʉhõ chʉha. Ã pʉhõ chʉa, tina jipihtina tuaro wahcheha.