1 Crónica 22 - Wanano OT Portions

Cohamacʉ ya wʉhʉ cjihtore ti yoahti cjihtire ñʉ quihõyua tiha Davi

¹ Ã yoa õ sehe niha pʉhtoro Davi: —Ahri cuhtui mari Cohamacʉ Yawe to ya wʉhʉ cjihtore dahrebasanahca mari. Ã jina tí wʉhʉ wʉrʉre mari tuhsʉri baharo, tí wʉhʉ wijaroi mari wahiquinare mari wajã, mari jʉ̃ wa mʉo mʉjari carore cũnahca mari —niha.

² Ã yoa to ã niri baharo, jipihtina paye masa, ti ya yahpai ji cohtainare pji cahmachu dutia tiha Davi. Baharo, ti wihi pihtichʉ ñʉno, tinare dahra dutia tiha. Ã dahra dutiro, tinare tãare poha, noaa cjoari wʉri yoahtina cjihti cũha. Tí cjoari wʉri sehe Cohamacʉ ya wʉhʉre ti tihahti cjoari cjihti jia tiha.

³ Ã yoa comaa cʉ̃hʉre payʉ na cahmachu dutia tiha Davi. Tí sehe peregu ti yoahti cjihti jiha. Tuhsʉ, bʉjʉa sopa pahmari wʉrire ti cjã biha ñahahti pjĩni cjihti ti yoahti cʉ̃hʉ jia tiha. Ã yoa comaa bronce cʉ̃hʉre payʉ ne quihõna bihoeraa waro na cahmachu dutia tiha.

⁴ Ã yoa cʉ̃ maca Tiro wama tiri maca macaina, tuhsʉ, pa maca Sidõ wama tiri maca macaina cʉ̃hʉ payʉ yucʉri noaa baro, cedro ti nia yucʉrire na taa tiha. Tí yucʉri cʉ̃hʉre Davi sehe noaa yucʉrire payʉ bese, soro cũa tiha Cohamacʉ ya wʉhʉre ti yoahti cjihti.

⁵ Ã yoa tí jipihtiare na cahmachu dutiro, õ sehe ni tʉhotua tiha Davi: “Yawere yʉ macʉ to dahrebasahti wʉhʉ wiho jiri wʉhʉ jichʉ cahmaeraja yʉhʉ. Noaputiari wʉhʉ wʉrʉ wijachʉ cahmaja yʉhʉ. Tuhsʉ, jipihtiri yahpa macaina masa ti wacũnohohti wʉhʉ wʉrʉ cjihto jichʉ cahmaja. Wiho mejeta yʉ macʉ Salomõ tí wʉhʉre dahrehtiro sehe wahmʉno waro jira. Ã jiro tiro dohse jia dahraare ne masierariro waro jisinina. Ã yoa yʉhʉ cʉ̃hʉ bʉcʉro wahai nija. Ã jicʉ noho puro yʉ catisinino puro yʉ basita tí wʉhʉre to dahrehti cjihti jipihtiare na cahmachubasaihtja tirore. Ã jiro yʉ macʉ Salomõ noaputiari wʉhʉ wʉrʉ wiorohca” ni, tʉhotua tiha Davi. Ã ni tʉhoturo, tí wʉhʉre to yoahti cjihtire payʉ na cahmachubasa dutia tiha.

⁶ Ã yoa cʉ̃ nʉmʉ to macʉno Salomõre dohse to yoahti cjihtire yahuro taro, tirore pji dutia tiha. To wihichʉ ñʉno, cua pisaro mehne õ sehe nia tiha tirore: —Macʉ, mʉhʉta jira mari israe masa mari Cohamacʉ Yawe to ya wʉhʉ cjihtore dahrebasahtiro cjihto.

⁷ Wahmanopʉre yʉhʉta jia timai tirore to ya wʉhʉ cjihtore yoabasa duamariro. “Masa jipihtiri yahpa macaina yʉ Cohamacʉ Yawere masijaro” nicʉ, yoabasa duai nia tihi yʉhʉ.

⁸ Yʉ ã yoa duachʉ ñʉno, tiro sehe yʉhʉre õ sehe nia tire: “Mʉhʉ payʉ masa curuari macaina mehne cahma wajãhre. Ã cahma wajãi, payʉ masare wajãhre mʉhʉ. Ã jicʉ yʉ ya wʉhʉ cjihtore yoabasa masierara mʉhʉ” nia tire Yawe yʉhʉre.

^9-10 Ã nino, cua pisaro mehne õ sehe ni yahu namoa tire yʉhʉre: “Cʉ̃iro mʉ macʉ jirohca mʉhʉre pʉhtoro ji, cohtotahtiro cjihto. Tiro sehe jirohca yʉ ya wʉhʉ cjihtore yʉhʉre dahrebasahtiro. Ã yoa tiro pʉhtoro jiro, cahma wajãno marieno mʉ masa curuare noano sʉho ji mʉhtanohca. Tuhsʉ, pʉhtoro tuariro choro jirohca tiro. To ã tuariro jichʉ ñʉa, paye masa curuari macaina tirore ñʉ tuhtiina sehe tiro mehne cahma wajãa tasi. Wiho mejeta yʉhʉta jiihca ã wahachʉ yoariro. Yʉ ã yoachʉ, tiro sehe to catisinino puro cahma wajãno marieno noano yʉ ya curua, israe masa curuare sʉho ji mʉhtanohca. Ã jiro tiro Salomõ wama tirohca. (“Salomõ” nino, “cahma wajãno marieno jiriro” nino nica hebreo masa ya dʉsero mehne) Ã yoa yʉ macʉ waro yoaro seheta jiro ninohca tiro. Ã jii yʉhʉ cʉ̃hʉ tirore to pʉcʉro yoaro seheta jii niihca. Ã yoa tirore ji turia dijaina cʉ̃hʉ ne cohtotaro marieno israe masa pʉhtoa cjihti ã ji turia wahcãahca” ni, yahu namoa tire yʉhʉre Yawe.

¹¹ ‘Ã yoa yʉhʉre Yawe to ã niriro cjiro mʉhʉta jira macʉ. Ã jiro tiro mʉhʉre ã piti tirucujaro. Ã piti tirucuro, yʉhʉre to niriro cjiro seheta to ya wʉhʉ cjihtore dahre sohtori tichʉ yoajaro mʉhʉre.

¹² Ã yoa tiro mʉhʉre masia tia cʉ̃hʉre wajaro. Tuhsʉ, to ya curua macainare noano mʉ sʉho ji mʉhta mihnihti cjihti cʉ̃hʉre wajaro. Ã waro, marine to cũri dutia to nino seheta sʉho ji mʉhtachʉ yoajaro mʉhʉre. Ã ni, mʉhʉre sini payoja yʉhʉ.

¹³ Ã yoa mʉ basi cʉ̃hʉre õ sehe ni yahuihtja. Mʉ pʉhtoro jia tia noano waha, sohtori tichʉ cahmai, tiro Yawe Moise cjiro mehne marine to cũri dutiare noano yʉhtiga mʉhʉ. Mʉ ã noano yʉhtichʉ, dohse jia mʉ yoa duaa jipihtia quihõno dihta waha, sohtori tiahca mʉhʉre. Ã yoa dohse jia mʉhʉre mijoa wahachʉ cʉ̃hʉre, tí mehne ji coa pihti, pumei tjiga. Mʉhʉre ñano wahapachʉta, cuii tjiga. Duhuro marieno Yawere ã wacũ tuarucuga —nia tiha Davi to macʉno Salomõre.

¹⁴ Ã ni tuhsʉ, õ sehe ni yahu batoaha: —Cohamacʉ ya wʉhʉre mʉ yoahti macaa cjihti cʉ̃hʉre na cahmachui, tuaro dahrahi yʉhʉ. Ã jii tres mil y cuatrocienta tonelada waro urure na cahmachu dutihi yʉhʉ. Ã yoa comaa plata cʉ̃hʉre treinta mil y cuatrocienta tonelada waro na cahmachu dutihi. Ã yoa comaa broncere, ã jichʉ hierro cʉ̃hʉre payʉ ne quihõna bihoeraa waro na cahmachu dutihi yʉhʉ. Ã yoa yucʉrire, ã jichʉ tãa, ti pohaa cjoari, noano potoa cjoari wʉri cʉ̃hʉre payʉ na cahmachu dutihi. Wiho mejeta tí tãa pinihtare paye na cahmachu duti namoihca mʉhʉ. Tuhsʉ, yucʉri cʉ̃hʉre na cahmachu duti namoga.

^15-16 ‘Ã yoa tí wʉhʉre dahrehtina pinihta jipihti tuhsʉra. Jira tãare pohahtina cjihti, yucʉri mehne dahrahtina cjihti, tiharicarire tãa cjoari mehne dahre mʉohtina cjihti tina jipihtina ji tuhsʉra. Ã yoa uru mehne, comaa plata mehne, comaa bronce mehne, comaa hierro mehne tí jipihtia mehne dohse jia paye barore dahre mihniina cʉ̃hʉ ji tuhsʉra. Ã jicʉ mʉhʉ sehe Yawe ya wʉhʉ cjihtore dahre dʉca bahrañoga. Tí wʉhʉ cjihtore mʉ dahrechʉ, tiro to basi mʉhʉre tí jipihtiare noano wahachʉ yoajaro —niha Davi to macʉno Salomõre.

¹⁷ Baharo, jipihtina to doca macaina pʉhtoare to macʉno Salomõre yoadoho dutia tiha Davi. Ã yoadoho dutiro, õ sehe ni bosaha tinare:

¹⁸ —Yawe, mari Cohamacʉ, marine ã piti tirucu, marine to ã yoadohorucuare masina mʉsa. Ã yoadohorucuro, mari ya yahpai ji mʉhtamarinare mʉsare yʉ sʉho cahma wajã yʉhdʉrʉcachʉ to yoari cʉ̃hʉre masina mʉsa. To ã cahma wajã yʉhdʉrʉcachʉ to yoaro mehne, mari ya yahpapʉre Cohamacʉ to ñʉ yabiare yoarucuina cʉ̃hʉ mariahna jʉna. Tuhsʉ, marine cahma wajã yʉhdʉrʉca duaina cʉ̃hʉ mariahna jʉna. Ã jina cahma wajãno marieno noano jinocaja mari mipʉre.

¹⁹ Ã yoa mʉsa sehe to ã yoari cjirire masina. Tíre masina, ji coaro mehne tirore macarucuga mʉsa mipʉre. Tuhsʉ, to yoadohoa cʉ̃hʉre tirore sinirucuga. Ã yoana, to ya wʉhʉ cjihto cʉ̃hʉre yoa dʉcaga mʉsa. Tí wʉhʉre mʉsa tuhsʉri baharo, Yawe marine to cũri dutiare mari wihbori carore tí wʉhʉpʉ na sãa, wihbo cũnahca mari. Tʉhsʉ, mesa, sihã dapodʉ, jipihtia paye mʉna wʉhʉ cjiropʉ jia, tirore cua pisaro mehne ño payona, mari cjʉaa cʉ̃hʉre na taa, tí wʉhʉpʉta cũnahca mari. Tuhsʉ, tí wʉhʉ, noari wʉhʉpʉ mari Cohamacʉ Yawere ño payo dʉcanahca mari. Ã jina ji coaro mehne tí wʉhʉre yoa dʉcaga mʉsa —ni bosaha Davi tinare.