Titi 1 - Gourmanchéma Bible

I fuondi

¹ Mini Polo yua n tie U Tienu naacemo leni Jesu Kilisiti tondo, ki baa gobidi U Tienu n gandi yaaba li *dandanli nni ke ban bandi yaa moamoani n ŋua U Tienu tuoma.

² Laa bonliedila kuli tanpuuli tie ke bi suginma tie ke bi baa yaa miali n kan gbeni, U Tienu yua n kan pua faama n den niani yaa miali hali ke ŋanduna daa ye.

³ Wan den bili yaa yogunu n den pundi, wani U Tienu ti Candaano n den doagidi o maama wan puogi nni min yaa wangi yaama kelima o yanbuama po.

⁴ N diani fini n bimoanga Tita po kelima tikuli n taani ki pia yaa dandanli po yaa po. U Tienu yua n tie Baa leni Jesu Kilisiti ti Candaano n pa ŋa li *ŋanbili leni mi yanduanma.

Tita tuonli Kileta diema nni

⁵ N den ŋa ŋa Kileta diema nni, ke ŋan ŋanbi yaala n sieni ki bua mi ŋanbima, ki gandi mi diema yeni dogi kuli nni Kilisiti n yini yaaba nikpeliba nani min den yedi a maama.

⁶ Li tie tiladi ke nikpelo kuli n yaa tie ban kan fidi ki kuli yua leni bonlaba. O baa yaa pia poyendo bebe, leni yaa bila n daani Jesu bi niba n kan fidi ki tabi yaaba leni cagindiba bi ke bi tie biyenyieda.

⁷ Li tie tiladi ke Kilisiti n yini yaaba gobidika n yaa tie U Tienu naacen-juoginka, wan da pia ban baa fidi ki kuli o yaala. Wan da tie tupaalu daano, ki da tie mutuodaano, ki da tie dañolo, ki da tie nipualo, ki da tie yua n kuandi o yama yaa i janbi yaa ñuadi nni.

⁸ Wan yaa tie yua n gaani bi niba cangu, ki bua yaala n ŋani, ki yaa pia li kpaagili, ki tiegi, ki gagidi U Tienu po, ki kubi o yuli.

⁹ Wan yaa kubi i moamoani maama yaama n tie mi madugikaama nani ban den bangi o maama, ke wan fidi ki bangi mi bangiŋanma yeni ki yaa paagidi bi pala, ki go maadi ki guliti yaaba n bua ki nia ma.

¹⁰ Li pia bi niyiekaaba boncianla, ama bi yaba yaaba n kua ku koanciagu siiga ki cie ki boandi biyaba ki go maadi majoagindi buoli kuli.

¹¹ Li tie tiladi ŋan mubini bi ñoana, kelima bi yagini ti dietiandi yama ki bangi ki lingi ki baa i janbi ñuadi.

¹² Bani, Kileta yaaba siiga yeni yendo, bi sawalipualo den yedi: «Kileta yaaba tie bi tuofaadanba yogunu kuli leni ti fuayanbiaditi, ki go tie ku nuagu danba yaaba n pia i kpadije.»

¹³ Laa siedi tie moamoani. Lani yaa po ŋan fu leni ba boncianla ke ban baa li dandanmoanli,

¹⁴ ki da go ŋua Jufinba yaa telimi leni bi nisaaliba yaa balimaama, bani yaaba n lebidi ki yie kaa go ŋua i moamoani.

¹⁵ Li bonla kuli ŋani cain yaaba n ŋani cain po. Ama liba kuli ki ŋani cain yaaba n *joagini po, bani yaaba n kaa daani yeni po kelima bi yantiali leni bi pala siedi kuli joagini.

¹⁶ Bi tua ke bi bani U Tienu, ama bi nia o bi bontienkaala nni. Bi tie cancaginniba leni niyiekaaba kaa fidi ki tieni tuonŋanliba kuli.