Sofoni 3 - Gourmanchéma Bible

¹ Fala n baa bi niyiekaaba dogu, Yu n *joagini ki goa ki pia mabinga.

² Baa cengi Li Miali Diedo maama, Baa tuo o tundi. Baa bili bi dugidi o kani, Baa lingi U Tienu todima.

³ Bi yudanba tie nani yaa yangbanli n gaandi ki duni, Bi bujiaba tie nani yaa fuasangbanli n yen goadi ku ñiagu, Ki co li bonla ki ŋmani likuli kaa baa sieni liba mi faama po.

⁴ U sawalipuaba tie japaadanba leni jajanbidiniba. U kopadicianba joagindi yaala n gagidi ki ŋani, Bi miidi o *balimaama.

⁵ Ama Li Miali Diedo nan ye Jelusalema, Ki tiendi yaala n tiegi, kaa tiendi kuli yaala n bia. Fiifaama kuli, o ja yaa buudi n tiegi, Ki naa jidi baa dayenli. Ama baa leni lani kuli, bi nibiadiba tiendi yaala n bia, Kaa gba feba kuli.

⁶ Li Miali Diedo yedi: «N bolini i nilanbuoli boncianla, N bolini bi kaanpaali toadiefoaga. N teni ke oba kuli ki go tagi bi sani. N bolini bi dogi. Nilo ki go tagi likani, Nilo kuli ki go kaa likani.

⁷ N den tama ke li yaa puoli, n niba baa fangi nni, Ki tuo n tundi, Ke n kan bolini bi dogu. Ama likani yaaba suagi liiga ki tiendi yaala n bia bebe.

⁸ Li tie lani yaa po ke mini Li Miali Diedo yedi: ‹Yin guudi nni mani, Min baa cua yaa daali ki waani yi ke yi nani. N jagi ke n baa taani i nibuoli kuli leni mi diema kuli niba, Ki teni ke ban bandi n pabienli n bia maama, Kelima n pabienli fantama baa buoni ki tinga kuli.› »

U Tienu baa lebidi i nilanbuoli pala

⁹ Li Miali Diedo go yedi: «Lani, n baa lebidi i nilanbuoli niba maama Ki teni ke man tua maŋanma. Bi baa yaa ŋua mini Li Miali Diedo bebe Ki kpiagidi nni leni payenli.

¹⁰ Baa n niba, yaaba n yadi ki ban ye hali yaa kaani n foagi, Ki pendi Etiopi kpeni, Bani mo baa yaa kpendinni npo bu paabu.

¹¹ Laa yogunu, yinba, n niba Yi kan go jie i fe kelima yi tuona po, Leni yin tiendi npo yaa *tuonbiadi yeni po, Kelima n baa ñani yi siiga yaa niba n pia ti japaadi boncianla. Yi japaadi baa baa u bianu n joagagidikaali po.

¹² N baa kubi yi siiga taliginba leni bi yumiindanba, Yaaba n bili bi suginma Li Miali Diedo kani, Ki baa yaa lingi bi wuonkaanu n yaa kani.

¹³ Isalele yaaba, yaaba n baa sieni kan go tieni kuli yaala n ki tiegi, Bi kan go pua faama, Janbi maama kan go yaa ye bi ñoana nni. Bi baa yaa baadi ki di ki go goa, Ke oba kuli kan yagi bi yama mo.»

U Tienu baa goa ki ŋanbi Jelusalema

¹⁴ Mangi mani yi pala, yinba Siyono yaaba! Yigini mani i pamandanyigimi, yinba Isalele yaaba! Mangi mani yi pala hali boncianla, Yinba Jelusalema yaaba!

¹⁵ Li Miali Diedo kagidi yipo wan den teni ke yaa fala n ŋua yi, O deli ki yaani yi yibalinba. Wani Li Miali Diedo, yua n tie yinba Isalele yaaba bado, Ye yi siiga, Yin da go jie ke falaba kuli baa ti cua.

¹⁶ Laa yogunu, bi baa yaa maadi Jelusalema dogu nni ki tua: «Yin da jie mani! Siyono yaaba, yi gbani n da go wudi!

¹⁷ Li Miali Diedo, yi Tienu ye yi siiga, Ki tie yaa jakoando n faabidi. O baa teni yin tua o pamanli bonla. O buama yipo teni ke o baa pa yi mi yepanma. O yiini ki kpaani leni li pamanli kelima yipo,

¹⁸ Nani mi *jaanma daali yeni.» Li Miali Diedo yedi: «N baa paadi yi leni fala, N baa paadi yi leni yaa fe n den ŋua yi.

¹⁹ Diidi, laa yogunu, n baa faligi yaaba n den mabindi yi, N baa faabi n niba, yaaba n ki baadi todima nani yaa pe n duugi, N baa goa ki kpeninni ban den gedini n niba yaaba ti yonbidi, N baa teni ban goa ki baa ti kpiagidi, bi yela mo n ña, Ban den laa i fe naankani kuli.

²⁰ Laa yogunu, n baa goa ki kpeninni yi, Li baa yaa tie min baa goa ki taani yi yaa yogunu. Yi baa le ke n lebidi yi yema, N baa teni yin goa ki baa ti kpiagidi, Yi yela mo n ña, Li ŋandunli nibuoli kuli nni.» Li Miali Diedo n yedi yeni.