Sofoni 1 - Gourmanchéma Bible

¹ Mi naa maama tie Li Miali Diedo n den yedi Sofoni yaama, Amoni bijua Josiasi n den tie Juda bado yaa yogunu. Sofoni den tie Kusi yaa bijua, Kusi mo n yaa tie Gedalia bijua, Gedalia mo n yaa tie Amadiyia bijua, Amadiyia mo n yaa tie Esekiasi bijua.

U Tienu baa faligi li ŋandunli niba kuli

² Li Miali Diedo den yedi: «N baa bolini yaala n ye mi tinfanma nni ki fo kuli.

³ N baa bolini bi niba leni ti yandi, N baa bolini ti bonyugiditi leni i jami, N baa bolini bi nibiadiba leni bi tuonjoagima. N baa bolini bi niba kuli mi tinfanma nni.»

U Tienu baa faligi Juda yaaba leni Jelusalema yaaba

⁴ Li Miali Diedo yedi: «N baa fii ki sedi Juda yaaba leni Jelusalema yaaba po. N baa ñani likani yaa bonla n sieni ki tie o *bulo*Baali yaala kuli. Baa yaa kopadicianba n den tuuni opo, Niloba kuli kan go tiadi bipo.

⁵ N baa bolini yaaba n do a diena tanpoli ki kpiagidi a ŋmabila, Leni yaaba n kpiagidi nni Ki polini ke bi ŋua nni leni bi pala kuli, Ama ki nan biliti i ñoaniani leni o bulo Milikomi.

⁶ N baa bolini yaaba n lebidi ki ŋa mini Li Miali Diedo, Kaa lingi n todima, Kaa lingi n tundi.»

Li Miali Diedo pabienli daali

⁷ Cuo mani yi ñoana o Diedo Li Miali Diedo nintuali, Kelima o pabienli daali nagini. O bogini li padili, O gagidi ki ŋanbi wan yini yaaba.

⁸ Li Miali Diedo yedi: «Min baa teni n niba yibalinba n kpa ba yaa daali, N baa faligi a koanbala leni badidiegu yaaba, N baa faligi yaaba n ŋua i nilanbuoli bogida.

⁹ Laa daali, n baa faligi yaaba n yugi ki kandi li budieli buliñoakoali. N baa faligi yaaba n mabindi bi niba ki fenli bi piama Ki gbiendi bi canbaa dieli.»

¹⁰ Li Miali Diedo yedi: «Laa daali, a bubula baa fii ki loli “I jami buliñoabu” yeni kani, I kuudi baa fii ki loli u dogu ñianpanli po, Jelusalema juana po, a diena baa yaa baali leni ku fuciangu.

¹¹ Mua mani, yinba Makiteki ñianjaali yaaba, Kelima a kpenda kuli baa kpe.

¹² Laa yogunu, N baa gaani ki liini Jelusalema nni kuli leni mu fidisanmu, Ki faligi yaa niba n ye leni mi yanduanma, Ki maadi bi pala nni ki tua: ‹Li Miali Diedo kan fidi ki tieni liba kuli, Li yaa tie yaala n ŋani bi yaala n bia.›

¹³ Ama bi yibalinba baa tugi bi piama, Ki bolini bi diedi mo. Bi maa ti diedi, Ama bi nan kan kua lienni, Bi ŋu duven tiidi, Ama bi nan kan ño li duven.»

¹⁴ Li Miali Diedo pabienli dacianli yeni nagini, Li nagini ki gbeni, li jaligi ki kpendi. Laa daali baa yaa tie moe bebe, Baa a jakoanda baa mua ki liini mi todima.

¹⁵ Laa daali baa yaa tie pabienli daali, Fala leni ti yanyagiciandi daali, Li tingbali leni mi bolinma daali. Li baa yaa tie biigicianli daali, A tawala leni ku gbangbadigu daali.

¹⁶ Laa daali, bi toatieba baa baa i kaanpaali leni a toadiefoaga, A naatuntuna piebima leni bu toabu kuudi siiga.

¹⁷ Li Miali Diedo yedi: «N baa kuani bi nisaaliba fala nni, N baa teni ban yaa cuoni ki tulibi nani a juama yeni, Kelima bi tieni npo ti *tuonbiadi. Bi soama baa wuli i kaani kuli nani ku tangungu yeni, Bi kpiema n bedi nani ti baadi yeni.

¹⁸ Bi ŋanjilifa leni bi wula kan fidi ki faabi ba, Li Miali Diedo pabienli daali. N pabienli fantama baa buoni ki tinga kuli, Li baa bia hali boncianla. O baa bolini li ŋandunli niba kuli.»