Sakari 8 - Gourmanchéma Bible

¹ Li Miali Diedo, U Paaciamu Kuli Daano den maadi leni nni ki yedi yaa maama n tie na:

² «Li Miali Diedo, U Paaciamu Kuli Daano n bua Siyono yaaba hali boncianla. N bua ba leni n pali kuli.

³ N baa lebidi ki guani Siyono, ki yaa ye Jelusalema yaaba siiga. Bi niba baa yaa yi Jelusalema dogu: “Yaa dogu yaaba n bua U Tienu, ki tuo ki ŋua o.” Bi baa yaa yi Li Miali Diedo, U Paaciamu Kuli Daano, juali mo: “Mi gagidiŋanma juali.”»

⁴ Li Miali Diedo, U Paaciamu Kuli Daano yedi: «Yaa jakpela leni yaa pociana n podi Hali ki ñiigi i gbiami, kelima bi binciama po, Go baa yaa ka Jelusalema nitaankaani nni.

⁵ U dogu sani go baa gbie leni a bonjala leni a bonpola Ke bi tiini ki jeli.

⁶ Isalele yaaba, yaaba n sieni u naa yogunu Nua ke laa bonla naani nni ke li kan tuo ki tieni. Ama naani mini, Li Miali Diedo, U Paaciamu Kuli Daano moko Baa nuali la ke li tie bonlidikaala?

⁷ N baa faabi n niba yaaba n ye ti yonbidi nni Puoli diema leni nintuali diema nni.

⁸ N baa ñani ba lipo ke ban kpeni ki kali Jelusalema. Bi baa yaa tie n niba, N mo baa yaa tie bi Tienu, N baa yaa die ba, Ki gobidi ba leni i moamoani leni mi *teginma.»

⁹ Li Miali Diedo, U Paaciamu Kuli Daano yedi yaa maama n tie na: «Paagi mani yi pala, Yinba, yaaba n gba u naa yogunu, N sawalipuaba n den waani yaa ñoaniani, Yaa yogunu ke bi den pu li tanpuuli, Ki baa goa ki maa n diegu.

¹⁰ Hali ke laa dana daa cua, Bi niba leni ti yandi tuonli ki den baadi panpaani, Nilo kan den fii ki gedi kaanu ki go guani, Kaa baa kadi leni yibalinba, Kelima n den teni ke bi niba koani bi ŋmiali nni.

¹¹ Ama moala, n kan go soani n niba yaaba n ciadi yeni laa bonla, Nani min den tiendi ba maama hali yogu. Mini, Li Miali Diedo, U Paaciamu Kuli Daano n yedi yeni.

¹² N baa teni mi yanduanma n tieni ki tinga po: Duven tiidi baa luoni, Ki tinga baa teni ti kpaandi n tieni, Ki taaga baa mi boncianla. N baa pa laa bonla kuli n niba yaaba n sieni.

¹³ Juda yaaba leni Isalele yaaba, Yaala n den baa yi den tua Ti solindi makpanjama i nilanbuoli siiga. Ama, n baa faabi yi ki teni yin tua li seli makpanjama bi siiga. Yin da go jie mani, paagi mani yi pala!»

¹⁴ Li Miali Diedo, U Paaciamu Kuli Daano yedi yaa maama n tie na: «Yi yaajanba n den fiini n pali Ke n jagi ke n baa waani ba fala Mii den lebidi n yanjagili.

¹⁵ Ama moala, n jagi ke n baa tieni yinba Jelusalema yaaba Leni mi diema yaaba kuli po yaala n ŋani. Yin da go jie mani!

¹⁶ Yin baa yaa tiendi yaala tie line: Yua kuli n yaa maadi o nisaalilielo i moamoani. Yi bujiakaani kani, yin yaa ja yaa buudi n tiegi Ki kpendinni mi yanduanma.

¹⁷ Yin da kpaagi yi yaba po yaala n bia. Yin da pua mi faama ki polini, Kelima laa tuona kuli tie mini Li Miali Diedo n nani yaala.»

Mi ñoalolima dana baa kpandi ki tua jaanma dana

¹⁸ Li Miali Diedo, U Paaciamu Kuli Daano den waani nni yaa maama n tie na:

¹⁹ «Cinaa leni cimuu leni cilele leni cipiiga ŋmaali yi yaa niinni ke yi luo bu ñoabu yeni baa tua yinba Juda yaaba jaancianma, yaama n pia yipo li pamancianli. Ama yin yaa bua mani i moamoani leni mi yanduanma.»

²⁰ Li Miali Diedo, U Paaciamu Kuli Daano yedi: «I nilanbuoli, i dogi boncianla niba baa tigibi Jelusalema.

²¹ Dogu niba baa cua ki yedi dotogu yaa niba: ‹Ti caa ki baan kpiagi Li Miali Diedo, U Paaciamu Kuli Daano, Ki mia o sela yo. Cua mani tin gedi!› Laa niba baa goa ki yedi ba: ‹Ti moko baa yegi leni yi.›

²² I nilanbuoli boncianla leni yaa nilanbuoli n pia u paalu Baa cua Jelusalema ki bua ki kpiagi nni, Ki go jaandi ki mia n sela.

²³ Laa yogunu, nilanba piiga, yaaba n ki taa mabuolu Baa taani ki muubi Jufiyendo liadili ki yedi o: ‹Ti bua ki yegi leni a ki gedi, Kelima ti gbadi ke U Tienu ye leni yi.› »