Sakari 6 - Gourmanchéma Bible

¹ N didi go den laa bonlekatoala. N den laa toateliti naa ke ti ñani kumoanjuana lie siiga.

² Yaa taami n den dia yaa toateligu n den ye liiga den tie tanmoani. Yaaba n den dia ku bonliegu mo den tie tanboani.

³ Yaaba n den dia ku bontaagu mo den tie tanpieni. Yaaba n den dia ku bonnaagu mo den moani ki bua ki yaa boani, ki tuutu.

⁴ N den buali maleki yua n den maadi leni nni yeni: «Bine mo tie be, n Diedo?»

⁵ O den goa ki yedi nni: «Li tie tanpoli faali boninaa, yi n ñani i kaanu kani, yin bi ye naani, ki tinga kuli Diedo kani.»

⁶ Yaa tanboani n den dia toateliyengu den teli nijienu po yaa diema. I tanpieni moko den ŋoadi i tanboani yeni fuuli. I tantuunituuni mo den teli ganu po.

⁷ I tanmoani mo den ñani ki mia ke bi bua ki gedi ki ban goandi ki tinga. Maleki den yedi ba: «Gedi mani ki ban goandi ki tinga.» Bi den gedi ki ban goandi ki tinga.

⁸ O den yini nni ki yedi: «Ŋan nua ke yaaba n teli nijienu po diema yeni, bi bua ki ban jiini n pabienli laa diema yaaba po yo.»

Josue kpiagidi sawalo

⁹ Li Miali Diedo den maadi leni nni ki yedi yaa maama n tie na:

¹⁰ «Ŋan ga yaaba n ye ti yonbidi n teni Helidayi, Tobija leni Yedayeya yaa paabu ke bi cuani yeni. Bani yaaba n cuani yeni den cani Sofoni bijua, Josiasi denpo, ban den ñani Babilona ki cua. Dinla, dinla ŋan fii ki gedi lipo.

¹¹ Ŋan taa ŋanjilifa leni wula, ki duadi ki tieni mu badifogilimu ki cibini Yehotisadaka bijua bi kopadicianba bado Josue.

¹² Ŋan yedi ke Li Miali Diedo, U Paaciamu Kuli Daano yedi ke ja baa cua, ki yi li “Benkpeli”. O baa kpeli wan ye naani, ki maa Li Miali Diedo diegu.

¹³ O baa yaa pia li bali maalima ki kaa o gbandi po ki die. O kopadiciamo baa yaa ye o kani, ke bikuli taa ñoabu ki tuuni.

¹⁴ Mu badifogilimu baa yaa ye mini Li Miali Diedo diegu nni ki tie yaala n tiadi Helidayi leni Tobija leni Yedayeya leni Sofoni bijua, Josiasi.»

¹⁵ Bi niba baa ña hali foagima, ki cua ki todi ban goa ki maa Li Miali Diedo diegu. Lani, yi baa bandi ke Li Miali Diedo, U Paaciamu Kuli Daano n soani nni moamoani. Laa bonla kuli baa tieni, yi yaa tuo ki ŋua Li Miali Diedo, yi Tienu.