Sakari 1 - Gourmanchéma Bible

U Tienu yini o niba ke ban guani o kani

¹ O bado Daliyusa bali binlieli yaa ciniilo, Li Miali Diedo den maadi leni Ido yaabili, Belekia bijua Sakali, ki yedi o ke wan waani Isalele yaaba yaa maama n tie na:

² «Li Miali Diedo, U Paaciamu Kuli Daano pali den beni yi yaajanba po boncianla.

³ Ama, moala, yin lebidi ki guani mani n kani, n moko baa guani yikani.

⁴ Yin da tua mani nani yi yaajanba yeni. Hali yogu, n sawalipuaba den wangi ba ke n yedi ban lebidi ki ŋa bi sanbiadi leni bi bontienkabiadila. Ama bi den yie kaa cengi nni, baa den tuo ki ŋoadi min den yedi ba yaala.

⁵ Yi yaajanba, bi ye le? Bi sawalipuaba mo te, naani bani wani den baa ye ki kan kpe?

⁶ Ama min den teni n naacenba, bi sawalipuaba yaa ñoabona leni yaa mabilikaama kuli den cuo yi yaajanba pala. Bi den lebidi bi tagi ki yedi: ‹Li Miali Diedo, U Paaciamu Kuli Daano soani ti nani ti tagi leni ti tuona n den teni ke o jagi ke o baa soani ti maama.› »

Sakali bonlekakpiala: i taami

⁷ Daliyusa bali binlieli binli, piiga cilo piilie n danaali daali, lani n tie Sebati ŋmaalo, Li Miali Diedo den maadi leni Belekia bijua, Ido yaabili o sawalipualo Sakali yaa maama n tie na:

⁸ Laa ñiagu n den laa li bonlekaala. N den laa o tanjagilo ke o jagi tanmoano ki se joaloangu nni, militi tiidi yaa siiga. Tantoe den se o puoli po, ke bine moani, bine mo moani ki bua ki yaa boani, bine mo pieni.

⁹ N den buali: «I naa taami mo tie be, n Diedo?» Lane maleki yua n den maadi leni nni den goa ki yedi nni: «N baa bundi apo ban tie yaala.»

¹⁰ Wani yua n den se militi siiga den pugini ki yedi: «Bi tie Li Miali Diedo n soani yaaba ban goandi mi tinfanma.»

¹¹ Bi den maadi leni Li Miali Diedo Maleki yua n se militi tiidi siiga yeni ki yedi: «Ti goandi mi tinfanma ki sua ke mi yanduanma bebe n ye lienni.»

¹² Lanwani Li Miali Diedo Maleki yeni den maadi ki yedi: «Li Miali Diedo, U Paaciamu Kuli Daano, dinla n tie bina piilele leni a pali n beni Jelusalema yaaba po leni Juda dogi yaaba po. Moala gbadi bipo mi niñima.»

¹³ Li Miali Diedo den guani Maleki yeni yaa maama n pia li papaali leni i baagi.

¹⁴ Lani Li Miali Diedo Maleki yeni den yedi min kpaani ki waani ke Li Miali Diedo, U Paaciamu Kuli Daano yedi yaa maama n tie na: «N pia Jelusalema yaaba po leni Siyono juali po yaa buama n yaba boncianla.

¹⁵ Ama n pali be boncianla yaa nilanbuoli n jigini bi yula po, kelima n pali n da den be Isalele yaaba po waamu waamu yaa yogunu, i nilanbuoli yeni den taani ki cuani bi tingbali.

¹⁶ Li tie lani yaa po ke Li Miali Diedo, U Paaciamu Kuli Daano yedi yaa maama n tie na: ‹N go baa lebidi ki cua Jelusalema leni mi niñingbadima. N diegu go baa goa ki maa, u dogu moko go baa goa ki maa.› »

¹⁷ Maleki go den yedi nni ke min waani yaa maama n tie na: «Li Miali Diedo, U Paaciamu Kuli Daano yedi ke o dogi go baa gbie leni mi piama. O go baa baagi Siyono yaaba. O go baa guani ki gandi Jelusalema.»