Ruti 3 - Gourmanchéma Bible

¹ Luta yaanaa Naomi den ti yedi o: «N bisalo, n bua ki lingi apo u kaanu ke a yema n yaa mani.

² Ŋan den yen caa ki ŋua Boasa yua yaa tuonsoanba puoli ki liegi yeni tie ti kpiilo, nani ŋan bani maama. Dinla ñiagu o baa lendi u jalu nni *olije.

³ Ŋan wali ki tieni tulale, ki yie a tiadi yaadi n ŋani ki cie, ki gedi u jalu po. Die ŋan da tuo Boasa n bandi ke a ye likani, hali wan ban je ki go ño ki gbeni no.

⁴ O yaa gedi ki baa duani yaa yogunu, ŋan kpaagi ki le wan duani naani. Ŋan nagini ki pindi o kpalibu o taana po ki bali ki duani. Wani oba n baa waani a ŋan baa tieni yaala.»

⁵ Luta den goa ki yedi: «N baa tieni ŋan yedi yaala kuli.»

⁶ O den gedi u jalu po ki tieni o yaanaa n yedi o yaala.

⁷ Boasa den dini ki go ñuni ke o pali mangi ke o gedi ki duani olije tinli kani. Lane Luta den tieni dindini ki gedi ki pindi o kpalibu o taana po ki bali ki duani.

⁸ Ku yagisiigu Boasa den jie ki fundi ki tibini ki diidi ki laa ke o pua dua o taana kani.

⁹ O den yedi: «Ŋme yo?» O pua yeni den goa ki yedi: «N daano, mini Luta yo. Ŋan taa nni ki nagini a kani ki kubi nni, kelima nani ŋan tie n calo kpiilo yeni a pia u sanu ki taa nni ki nagini a kani.»

¹⁰ Boasa den yedi: «Li Miali Diedo n seligi a n bisalo! Ŋan cua n kani ki naa lingi jawaaba, yaaba n luo bi yaaba n pia yeni, li doagidi a buama ki cie ŋan den kpa tieni yaala kuli.

¹¹ Moala ŋan da go jie liba kuli. N baa tieni apo ŋan yedi yaala kuli, kelima u dogu yaaba kuli bani ke a tie pomoano.

¹² Li tie moamoani ke n tie a calo kpiilo ki pia u sanu ki taa ŋa ki kubi a, ama nitoa ye ki kpi leni a calo ki cie nni.

¹³ Ŋan duani ne hali lan faa. Saala o yaa sua ke o bua ki taa ŋa ki kubi ŋa nani lan bili ke o pia u sanu ki taa ŋa maama, wan taa ŋa. O yaa bua mo, hali U Tienu po, mini wani n baa taa ŋa ki kubi a. Duani hali lan faa.»

¹⁴ O den dua o taana kani ki faa fii hali ke li daa yendi. Boasa ki den bua ban bandi ke o pua kua u jalu nni.

¹⁵ Boasa den yedi Luta: «Tandi ŋan pini yaa kpalibu, ki mubini bu bonŋanla.» Luta den tandi o kpalibu ke o biigi olije nani yiemu luoba. Ki tuni o. Li yaa puoli o den goa ki gedi u dogu po.

¹⁶ Luta den pundi o yaanaa Naomi kani ke o yedi o: «Li ban tua lede, n bisalo?» Lane Luta den togidi o Boasa n tieni opo yaala kuli.

¹⁷ O go den pugini ki yedi: «O puni nni olije yiemu luoba ki yedi ke n kan guani apo nukuomu.»

¹⁸ Lanwani Naomi den yedi: «Duani a yama, n bisalo, hali ŋan baa bandi laa bonla kuli n baa juodi maama yaa yogunu. Boasa kan pa o yuli fuodima o yaa ŋanbi ki gbeni laa maama dinla.»